Mamata Banerjee : అర్ధరాత్రి బదిలీలపై మమత ఆగ్రహం, ఈసీపై విమర్శ

Mamata Banerjee : పశ్చిమ బెంగాల్‌లో కీలక ఉన్నతాధికారులను కేంద్ర ఎన్నికల సంఘం బదిలీ చేయడంపై ముఖ్యమంత్రి మమతా బెనర్జీ తీవ్ర ఆగ్రహం వ్యక్తం చేశారు. అర్ధరాత్రి సమయంలో ఈ బదిలీలు చేపట్టడం ప్రజాస్వామ్యానికి విరుద్ధమని ఆమె వ్యాఖ్యానించారు.

సోమవారం అర్ధరాత్రి రాష్ట్ర చీఫ్ సెక్రటరీ నందిని చక్రవర్తి, హోం సెక్రటరీ జేపీ మీనా, డీజీపీ మరియు కోల్‌కతా పోలీస్ కమిషనర్‌ను కేంద్ర ఎన్నికల సంఘం బదిలీ చేసింది. ఈ చర్యపై స్పందించిన మమతా బెనర్జీ తీవ్ర అసంతృప్తి వ్యక్తం చేశారు.

ఆమె మాట్లాడుతూ అర్ధరాత్రి ఒంటి గంట సమయంలో తనకు మెసేజ్ వచ్చిందని తెలిపారు. ఇలాంటి చర్యలు ఎప్పుడైనా జరిగాయా అని ప్రశ్నించారు. చీఫ్ సెక్రటరీ ఒక బెంగాలీ మహిళ అని, ఆమెను తొలగించడం సరైన చర్య కాదని వ్యాఖ్యానించారు.

ఈసీపై మమత ఆరోపణలు

గతంలో అధికారుల బదిలీకి ముందు రాష్ట్ర ప్రభుత్వం నుంచి ముగ్గురు పేర్లతో జాబితాను ఈసీ కోరేదని మమత తెలిపారు. కానీ ఈసారి ఎలాంటి సంప్రదింపులు లేకుండా ఏకపక్షంగా నిర్ణయం తీసుకున్నారని ఆమె ఆరోపించారు.

ఇదేమైనా ఢిల్లీ లడ్డూ అనుకుంటున్నారా? ఇది వారి జాగీరా అని ఆమె ప్రశ్నించారు. డీజీపీగా ఉన్న పీయూష్ పాండే బెంగాలీ కాదని, ఆయనను కూడా తొలగించారని గుర్తు చేశారు.

కేంద్రంపై విమర్శలు

వంటగ్యాస్ ధరల పెంపును నిరసిస్తూ కోల్‌కతాలో నిర్వహించిన నిరసన ర్యాలీలో పాల్గొన్న మమతా బెనర్జీ ఈ వ్యాఖ్యలు చేశారు. కేంద్ర ప్రభుత్వం బీజేపీకి అనుకూలంగా పనిచేసే అధికారులను మాత్రమే ఎంపిక చేస్తోందని ఆమె ఆరోపించారు.

రాష్ట్ర మంత్రి శశి పంజా ఇంటిపై దాడి జరిగినట్లే తన నివాసంపై కూడా దాడి చేసే అవకాశం ఉందని ఆమె ఆందోళన వ్యక్తం చేశారు.