“AIR” వెబ్ సిరీస్: విద్యార్థుల చుట్టూ అల్లుకున్న ఆసక్తికరమైన కథ!
తల్లిదండ్రులు, పిల్లలు, చదువులు – ఈ మూడు విషయాలు ఎప్పుడూ ఒక పజిల్ లాగే ఉంటాయి. ఎంత చర్చించినా ఒక స్పష్టత రాదు. ముఖ్యంగా ఇంటర్మీడియట్ విద్యార్థుల జీవితంలో ఒక కీలక మలుపు. అలాంటి ఇంటర్మీడియట్ విద్యార్థుల జీవితాల చుట్టూ అల్లుకున్న కథే ‘AIR’ (AIR movie) (ఆల్ ఇండియా ర్యాంకర్స్) (All India rankers movie) వెబ్ సిరీస్. మొత్తం 7 ఎపిసోడ్లతో రూపొందిన ఈ సిరీస్, ఈ రోజు నుంచి స్ట్రీమింగ్ (Streaming from today) అవుతోంది. జోసెఫ్ క్లింటన్ దర్శకత్వం వహించిన ఈ సిరీస్ ప్రేక్షకులను ఎంతవరకు ఆకట్టుకుందో చూద్దాం.
కథా నేపథ్యం
All India rankers movie: కథ 2012లో మొదలవుతుంది. అర్జున్ (హర్ష్ రోషన్), రాజు (జయతీర్థ), ఇమ్రాన్ (భానుప్రకాశ్) వేర్వేరు పాఠశాలల్లో పదో తరగతి పూర్తి చేస్తారు. అప్పటికే జయశ్రీ (అక్షర) పట్ల ఆకర్షితుడైన అర్జున్, ఆమె విజయవాడలోని ప్రతిష్టాత్మకమైన AIR (ఆల్ ఇండియా ర్యాంకర్స్) జూనియర్ కాలేజీలో చేరుతుందని తెలుసుకుని, తానూ అందులోనే చేరతాడు. అయితే, జయశ్రీ ఆ కాలేజీలో చేరడం లేదని తెలిసిన అర్జున్, అక్కడి నుంచి బయటపడాలని నిర్ణయించుకుంటాడు. సరిగ్గా అదే సమయంలో అతనికి రాజు, ఇమ్రాన్ పరిచయమవుతారు. ఇమ్రాన్ ఉచిత సీటు కారణంగా ఆ కాలేజీలో చేరతాడు, కానీ హాస్టల్ ఫీజు కట్టుకోవడం అతనికి భారంగా మారుతుంది. మారుమూల పల్లెటూరిలో పెరిగిన ఇమ్రాన్కు హాస్టల్ వాతావరణం అస్సలు సరిపడదు. దాంతో, అతను కూడా అక్కడి నుంచి వెళ్లిపోవాలని భావిస్తాడు. ఇక, స్కూల్ ఎగ్గొట్టి తిరిగే రాజుకి హాస్టల్ ఒక పంజరంలా అనిపిస్తుంది. సాధ్యమైనంత త్వరగా కాలేజీ నుంచి బయటపడాలనే ఆలోచనలోనే అతను ఉంటాడు. ఇలా, ముగ్గురి లక్ష్యం ఒక్కటి కావడంతో వారు స్నేహితులుగా మారతారు. మేనేజ్మెంట్ తమను కాలేజీ నుంచి పంపించేలా చేయాలని నిర్ణయించుకుంటారు. అందుకోసం వారు ఎలాంటి ప్రణాళికలు వేస్తారు? ఆ ప్రయత్నాలు ఎలాంటి పరిణామాలకు దారితీస్తాయి? తమ పిల్లలు మంచి ర్యాంకులు సాధించాలని కలలు కన్న వారి తల్లిదండ్రుల కోరిక నెరవేరుతుందా? జయశ్రీతో కలిసి చదువుకోవాలనే అర్జున్ కోరిక తీరుతుందా? అనేది మిగతా కథ.
విశ్లేషణ
తల్లిదండ్రులు తమ పిల్లలు మంచి ర్యాంకులు సాధించాలని కోరుకుంటారు. ఆర్థికపరమైన ఇబ్బందులు ఉన్నా, పిల్లలను విడిచి ఉండలేకపోయినా పెద్ద కాలేజీలలో చేర్పిస్తారు. ఆ కాలేజీలు సెక్షన్స్ చేసి, తమ కాలేజీకి ర్యాంకులు తెచ్చిపెట్టేవారిపైనే ఎక్కువ దృష్టి సారిస్తూ ఉంటాయి. ఈ మధ్యలో పిల్లలు బలిపశువులవుతుంటారు. ఈ అంశాన్ని ప్రధానంగా చేసుకుని రూపొందించినదే ఈ సిరీస్. ఒకవైపు తల్లిదండ్రులు, మరోవైపు కాలేజీ మేనేజ్మెంట్, ఇంకోవైపు విద్యార్థులు – ఈ మూడు కోణాల నుంచి ఈ కథ నడుస్తుంది. మొదట విద్యార్థులకు, ఆ తరువాత కాలేజీ మేనేజ్మెంట్కు, చివరగా తల్లిదండ్రులకు ప్రాధాన్యతనిస్తూ కథనం సాగుతుంది. కాలేజీ క్యాంపస్ను, హాస్టల్ వాతావరణాన్ని దర్శకుడు ఆవిష్కరించిన విధానం సహజత్వానికి చాలా దగ్గరగా అనిపిస్తుంది. సరదా సన్నివేశాలతో పాటు భావోద్వేగాలు కూడా బాగా పండాయి.
మొత్తం 7 ఎపిసోడ్లలో (7 episodes) మొదటి మూడు ఎపిసోడ్లు చాలా ఆసక్తికరంగా సాగుతాయి. 4-5 ఎపిసోడ్లు కాస్త నిదానంగా అనిపించినా, 6, 7 ఎపిసోడ్ల నుంచి కథ మళ్లీ వేగం పుంజుకుంటుంది. సునీల్, చైతన్యరావు, హర్ష చెముడు వంటి వారిని ప్రత్యేకమైన పాత్రలలో పరిచయం చేసిన తీరు బాగుంది. మొదటి మూడు ఎపిసోడ్లలో మెరిసిన డైలాగ్లు ఆ తరువాత లేకపోవడం ఒక లోటుగానే అనిపిస్తుంది.
సాంకేతిక విలువలు
దర్శకుడు జోసెఫ్ క్లింటన్ అక్కడక్కడా కాస్త నెమ్మదించినప్పటికీ, కథ, కథనం విషయంలో మెప్పించాడు. టీనేజ్లో పిల్లల మధ్య ఉండే ఆకర్షణకు సంబంధించిన ట్రాక్ వేసినా, దానిని సరిగ్గా పట్టించుకోకపోవడం నిరాశను కలిగిస్తుంది. సినిజిత్ అందించిన నేపథ్య సంగీతం సందర్భానికి తగినట్టుగా ఉంది. మనోజ్ ఫోటోగ్రఫీ బాగుంది. శ్రీకాంత్ పట్నాయక్ ఎడిటింగ్ ఓకే. ప్రధానమైన పాత్రలను పోషించిన ముగ్గురు పిల్లలు – హర్ష్ రోషన్, జయతీర్థ, భానుప్రకాశ్ – నటన ఆకట్టుకుంటుంది. సమీర్, జీవన్, సందీప్ రాజ్ కూడా తమ పాత్రలకు న్యాయం చేశారు. ‘ఇంటర్ లో సమ్మరే ఉంటుంది… హాలిడేస్ ఉండవు’, ‘లోకల్ అయినా హాస్టల్లో ఉండాల్సిందే’, ‘ఫీజు తగ్గితే ర్యాంక్ తగ్గుతుంది’, ‘ఫ్రీడమ్ కోసం పంజరాన్ని ఎంచుకోవడమంటే ఇదే’, ‘ఊరు దాటి బయటికొచ్చాక గెలిచే వెళ్లాలి’ వంటి సంభాషణలు మనసుకు హత్తుకుంటాయి.
ముగింపు
సరదాగా సాగిపోతూ, అక్కడక్కడా భావోద్వేగాలను స్పృశించే ఈ సిరీస్, వినోదంతో పాటు మంచి సందేశాన్ని కూడా అందిస్తుంది. విద్యార్థుల జీవితాలను, వారిపై తల్లిదండ్రుల అంచనాలను, విద్యావ్యవస్థలోని కొన్ని వాస్తవాలను ఈ సిరీస్ చక్కగా చూపించింది. ఇంటర్మీడియట్ విద్యార్థుల జీవితాలను దగ్గరగా చూసిన వారికి, లేదా అలాంటి అనుభవాలు ఉన్నవారికి ఈ సిరీస్ మరింత కనెక్ట్ అవుతుంది.
Read hindi news: hindi.vaartha.com
Read also: Squid Game 3: స్క్విడ్ గేమ్ 3 ఫైనల్ సీజన్ రివ్యూ!
