ఆర్థిక సంక్షోభం.. అప్పుల భారం.. ఏడుగురు ఒకేసారి ఆత్మహత్య
ఆర్థిక ఇబ్బందులు, అప్పుల భారంతో హర్యానాలోని పంచకుల జిల్లాలో ఓ కుటుంబం బలవన్మరణానికి పాల్పడింది. మొత్తం ఏడుగురు ఒకే కారులో విషం తాగి ఆత్మహత్య చేసుకున్నారు. ఈ ఘటన రాష్ట్రవ్యాప్తంగా కలకలం రేపింది. డెహ్రాడూన్కు చెందిన మిట్టల్ కుటుంబం, ఓ ఆధ్యాత్మిక కార్యక్రమం నిమిత్తం పంచకుల వచ్చి తిరుగు ప్రయాణంలో ఈ దారుణ నిర్ణయం తీసుకుంది. ఈ దారుణ ఘటన పంచకుల సెక్టార్ 27లో వెలుగులోకి వచ్చింది. ఒక ఇంటిముందు పార్క్ చేసిన కారులో మృతదేహాలను గుర్తించి స్థానికులు సమాచారం అందించడంతో పోలీసులు అక్కడికి చేరుకున్నారు.
కుటుంబ సభ్యులంతా తాగి సేవించి ఆత్మహత్య
పోలీసులు సంఘటనా స్థలానికి చేరుకుని విచారణ చేపట్టారు. మృతులను ప్రవీణ్ మిట్టల్ (వయసు 42), ఆయన తల్లి, తండ్రి, భార్య, ఇద్దరు కుమార్తెలు మరియు కుమారుడిగా గుర్తించారు. వారు డెహ్రాడూన్ (Dehradun) నుంచి పంచకులలో జరిగిన బాబాగేశ్వర్ ధామ్ హనుమంతుని కథ అనే ఆధ్యాత్మిక కార్యక్రమానికి హాజరయ్యేందుకు వచ్చినట్లు సమాచారం. కార్యక్రమం ముగిసిన అనంతరం తిరుగు ప్రయాణంలో ఉన్నప్పుడు వారు కారులోనే విషం తాగి ఆత్మహత్య చేసుకున్నారు. కారును సెక్టార్ 27లోని ఓ ఇంటి ఎదుట నిలిపిన తర్వాత ఈ ఆత్మహత్య జరిగినట్లు అనుమానిస్తున్నారు.
సూసైడ్ నోట్తో ఆర్థిక పరిస్థితులపై సంకేతం
పోలీసులకు సంఘటనా స్థలంలో ఒక సూసైడ్ నోట్ లభించిందని అధికారులు తెలిపారు. అందులో కుటుంబం తీవ్రమైన ఆర్థిక సంక్షోభం, అప్పుల భారమే ఈ ఆత్మహత్యలకు కారణంగా ప్రాథమికంగా తెలుస్తోందని పోలీసు వర్గాలు పేర్కొన్నాయి. పోలీసు వర్గాలు మృతుల బ్యాంకు లావాదేవీలు, ఫైనాన్షియల్ రికార్డులు, అప్పుల పత్రాలు అన్నింటినీ సమీక్షిస్తున్నట్లు తెలిపారు.
సీనియర్ పోలీసు అధికారులు, ఫోరెన్సిక్ బృందం సంఘటన స్థలంలో
సమాచారం అందుకున్న వెంటనే పంచకుల (Panchkula) డీసీపీ హిమాద్రి కౌశిక్, డీసీపీ (Law and order) అమిత్ దహియా సహా పలువురు సీనియర్ పోలీసు అధికారులు సంఘటనా స్థలానికి చేరుకుని పరిస్థితిని సమీక్షించారు. ఫోరెన్సిక్ బృందం (Forensic team) కారును పరిశీలించి ఆధారాలు సేకరించింది. మృతదేహాలను పంచకులలోని ప్రైవేట్ ఆసుపత్రుల మార్చురీలకు తరలించారు. పూర్తి పోస్ట్మార్టం రిపోర్టు తర్వాత మరిన్ని వివరాలు వెలుగులోకి రానున్నాయి.
ఆత్మహత్యల వెనుక సామాజిక బాధ్యతపై చర్చ
ఈ సంఘటన సామాజికంగా తీవ్ర చర్చకు దారితీస్తోంది. ప్రస్తుతం పెరుగుతున్న ఆర్థిక ఒత్తిళ్లు, పెరిగిన జీవన వ్యయం, చిన్న వ్యాపారాలు ఎదుర్కొంటున్న కష్టాలు ఎన్నో కుటుంబాలను ఒత్తిడికి గురిచేస్తున్నాయని నిపుణులు చెబుతున్నారు. ప్రభుత్వం అందించే ఆర్థిక సహాయ కార్యక్రమాలు సమర్థంగా అందకుండా పోవడం, అప్పుల దుస్థితి నుంచి బయటపడేందుకు సరైన మార్గాలు లేకపోవడం వంటి అంశాలపై సమగ్రంగా చర్చ అవసరం.
Read also: Gaza: ఇజ్రాయెల్ దాడిలో పిల్లలను కోల్పోయిన ఓ వైద్యుడి దీన గాథ..
