జీవితాన్ని విజ్ఞానానికి అంకితం చేసిన ఓ శాస్త్రవేత్తకు పార్కింగ్ స్థల వివాదమే మృత్యువుకు కారణమైంది. ఇటీవలే ఆరోగ్య సమస్యలతో స్విట్జర్లాండ్ నుండి భారత్కు వచ్చిన అతడు, పంజాబ్లో శాస్త్రవేత్తగా కొత్త జీవితం ప్రారంభించాడు. కానీ అనుకోని ఘటనలో తన ప్రాణాలను కోల్పోయాడు. ఈ ఘటన దేశవ్యాప్తంగా చర్చనీయాంశంగా మారింది.
జార్ఖండ్లోని ధన్బాద్కు చెందిన అభిషేక్ స్వర్ణకార్ (39) తన విద్య, పరిశోధనలు అంతర్జాతీయ స్థాయికి తీసుకెళ్లాడు. అతను స్విట్జర్లాండ్లో ఉన్నత స్థాయి శాస్త్రవేత్తగా పలు పరిశోధనలు చేశాడు. అంతర్జాతీయ జర్నల్స్లో అనేక వ్యాసాలు రాసి, భారత శాస్త్రసాంకేతిక రంగానికి ఎంతో పేరు తెచ్చాడు. అయితే కొన్ని ఆరోగ్య సమస్యలు చుట్టుముట్టడంతో స్విట్జర్లాండ్ వదిలి భారతదేశానికి తిరిగి వచ్చాడు. అతని కిడ్నీలు దెబ్బతినడంతో వైద్యులు కిడ్నీ ట్రాన్స్ప్లాంటేషన్ చేయాల్సి వచ్చింది. ఈ ఆపరేషన్లో అభిషేక్ సోదరి తన కిడ్నీ దానం చేసి అతనికి కొత్త జీవితం ఇచ్చింది. ఆపరేషన్ తర్వాత కొద్దికాలం విశ్రాంతి తీసుకున్న అభిషేక్, పంజాబ్ మొహాలీలోని ఇండియన్ ఇన్స్టిట్యూట్ ఆఫ్ సైన్స్ ఎడ్యుకేషన్ అండ్ రీసర్చ్ (IISER) లో శాస్త్రవేత్తగా చేరాడు. తన శరీర స్థితిగతులు బాగుండేందుకు తరచుగా డయాలసిస్ చేయించుకోవాల్సి వచ్చేది. అయినా, తన పని మీదే దృష్టి పెట్టాడు.
పార్కింగ్ స్థలమే గొడవకు కారణం
అభిషేక్ పంజాబ్ మొహాలీలోని సెక్టార్ 37 ప్రాంతంలో అద్దె ఇంట్లో నివాసం ఉంటున్నాడు. బుధవారం సాయంత్రం తన టూ వీలర్ పార్క్ చేసే సమయంలో పక్కింటి వ్యక్తి మాంటీ గొడవకు దిగాడు. మాంటీ తన వాహనం అక్కడే ఉండాలని, అభిషేక్ వేరే చోట పార్క్ చేయాలని చెప్పాడు. ఇది ఇద్దరి మధ్య వాగ్వాదానికి దారితీసింది. వాగ్వాదం కాస్తా హింసాత్మకంగా మారింది. కోపంతో ఊగిపోయిన మాంటీ అభిషేక్ను అధిక బలంతో భూమికి తన్నివేసాడు. ఇటీవలే కిడ్నీ ట్రాన్స్ప్లాంటేషన్ జరిగినందున పడిపోయిన వెంటనే అతనికి తీవ్రమైన నొప్పి వచ్చింది. కానీ మాంటీ మాత్రం వెనుకాడలేదు. అభిషేక్ మీద అడపా దడపా దాడులు చేస్తూ, తిరిగి లేవనీయకుండా కొట్టాడు. ఇప్పటికే శరీరం బలహీనంగా ఉన్న అభిషేక్, ఈ దాడిని తట్టుకోలేక అచేతనంగా పడిపోయాడు. చుట్టుపక్కల వాళ్లు భయంతో చూస్తూ ఉండిపోయారు. అయితే కొందరు అభిషేక్ను ఆస్పత్రికి తరలించడానికి ప్రయత్నించారు. కానీ ఆలస్యం అయ్యింది. ఆస్పత్రికి తీసుకెళ్లేసరికే వైద్యులు అతడు మరణించాడని ధృవీకరించారు.
పోలీసుల నిందితుడి అరెస్ట్
ఘటన గురించి తెలుసుకున్న స్థానికులు పోలీసులకు సమాచారం ఇచ్చారు. వెంటనే ఘటనా స్థలానికి చేరుకున్న పోలీసులు సీసీటీవీ ఫుటేజీ ఆధారంగా నిందితుడిని గుర్తించారు. మాంటీని అదుపులోకి తీసుకుని కేసు నమోదు చేశారు. పోలీసుల విచారణలో పార్కింగ్ వివాదం చిన్నదే కానీ, మాంటీ ఆగ్రహం ఎక్కువై హత్యకు దారి తీసిందని తెలిసింది. ఈ ఘటన భారత శాస్త్రసాంకేతిక రంగానికి నష్టం కలిగించిన ఘటనగా మిగిలిపోతుంది. అభిషేక్ స్వర్ణకార్ అంతర్జాతీయ స్థాయిలో రీసెర్చ్ చేయగల శాస్త్రవేత్త. తాను శరీర సమస్యలతో బాధపడుతూ కూడా భారతదేశానికి సేవ చేయాలనే లక్ష్యంతో ఇక్కడికొచ్చాడు. కానీ అనుచిత హింస అతడి జీవితాన్ని ఛేదించింది. ఈ ఘటనలో న్యాయం జరిగేలా చూడడం, ఇలాంటి సంఘటనలు మళ్లీ జరగకుండా చట్టాలను కఠినతరం చేయడం అవసరం. మన దేశానికి సేవ చేయాలనే ఒక శాస్త్రవేత్త అనుకోని ఘటనలో ప్రాణాలు కోల్పోవడం బాధాకరం. అభిషేక్ స్వర్ణకార్ మృతి భారత శాస్త్రసాంకేతిక రంగానికి తీరని లోటు.
