SIR : అర్హుల ఓట్లను తొలగిస్తే ఊరుకోం

SIR : తెలంగాణలో ఓటరు జాబితాల ప్రత్యేక సమగ్ర సవరణ (SIR) ప్రక్రియపై రాజకీయంగా చర్చ మొదలైంది. ఓటరు జాబితాల ప్రక్షాళన పేరుతో అర్హులైన పౌరుల ఓట్లను తొలగిస్తే సహించేది లేదని రాష్ట్ర మంత్రి ఉత్తమ్ కుమార్ రెడ్డి తీవ్రంగా హెచ్చరించారు. ఈ మేరకు SIR ప్రక్రియపై ఆయన ప్రత్యేక ప్రకటన విడుదల చేశారు. ఓటరు జాబితాల్లో అక్రమాలు, నకిలీ ఓట్లు, అనర్హుల పేర్లను తొలగించడం అవసరమే అయినప్పటికీ, ఆ ప్రక్రియలో నిజమైన ఓటర్లకు అన్యాయం జరగకూడదని స్పష్టం చేశారు. ప్రజాస్వామ్యంలో ఓటు హక్కు అత్యంత కీలకమైనదని, అర్హత కలిగిన ప్రతి పౌరుడికి ఓటు వేసే అవకాశం ఉండాలని పేర్కొన్నారు. జాబితాల సవరణ పేరుతో ఎలాంటి కారణం లేకుండా పౌరుల పేర్లను తొలగించడం ప్రజాస్వామ్య హక్కులను దెబ్బతీయడమే అవుతుందని ఆయన అభిప్రాయపడ్డారు.

deadline for sir voter list objections and claims ends tomorrow

తొలగించిన ప్రతి ఓటుకు కారణం చెప్పాలి.. అప్పీల్‌కు అవకాశం కల్పించాలి!

ఓటరు జాబితాల నుంచి ఏదైనా పేరు తొలగించినప్పుడు అందుకు గల కారణాలను సంబంధిత వ్యక్తికి తప్పనిసరిగా తెలియజేయాలని ఉత్తమ్ కుమార్ రెడ్డి సూచించారు. అంతేకాకుండా, పేరు తొలగింపుపై సంబంధిత పౌరుడికి ముందస్తు సమాచారం అందించి, తన వాదనను వినిపించుకునేందుకు తగిన అవకాశం కల్పించాలని కోరారు. అధికారుల పొరపాట్లు లేదా సాంకేతిక కారణాల వల్ల అర్హులైన ఓటర్ల పేర్లు తొలగిపోయిన సందర్భాల్లో వాటిని వెంటనే పునరుద్ధరించే సమర్థమైన వ్యవస్థను ఏర్పాటు చేయాలని సూచించారు. ఓటరు జాబితాల ప్రక్షాళన పారదర్శకంగా, నిష్పక్షపాతంగా జరగాలని, ఏ ఒక్క అర్హుడూ తన ఓటు హక్కును కోల్పోకూడదని స్పష్టం చేశారు. అర్హులైన పౌరుల ఓట్లను తొలగించే ప్రయత్నాలు జరిగితే తీవ్రంగా ప్రతిఘటిస్తామని ఆయన హెచ్చరించడంతో తెలంగాణ రాజకీయాల్లో SIR అంశం మరోసారి చర్చనీయాంశంగా మారింది.