తెలంగాణ కాంగ్రెస్ పార్టీలో అంతర్గత విబేధాలు మళ్లీ తెరపైకి వచ్చినట్లు తెలుస్తోంది. మునుగోడు ఎమ్మెల్యే కోమటిరెడ్డి రాజగోపాల్ రెడ్డి (Rajagopal) ముఖ్యమంత్రి రేవంత్ రెడ్డికి వ్యతిరేకంగా 25 మంది కాంగ్రెస్ ఎమ్మెల్యేలతో రహస్య సమావేశం నిర్వహించినట్లు సమాచారం. ఈ సమావేశం రెండు రోజుల క్రితం జరిగినట్లు, ఈ సమాచారం ఇంటెలిజెన్స్ వర్గాల ద్వారా ముఖ్యమంత్రి రేవంత్ రెడ్డికి చేరినట్లు విశ్వసనీయ వర్గాలు వెల్లడించాయి. గతంలో కూడా రేవంత్ రెడ్డికి వ్యతిరేకంగా సమావేశమైన కొంతమంది ఎమ్మెల్యేలు ఈ తాజా మీటింగ్లో పాల్గొన్నారని సమాచారం.
ఢిల్లీలో రాజగోపాల్ రెడ్డి
రహస్య సమావేశం తర్వాత కోమటిరెడ్డి రాజగోపాల్ రెడ్డి ప్రస్తుతం ఢిల్లీ(Delhi)లో ఉన్నట్లు తెలుస్తోంది. ఈ పరిణామం రాష్ట్ర రాజకీయాల్లో తీవ్ర ఉత్కంఠకు దారితీసింది. సీఎం రేవంత్ రెడ్డికి వ్యతిరేకంగా రాజగోపాల్ రెడ్డి చేపట్టిన ఈ చర్యలు పార్టీలో ఎలాంటి పరిణామాలకు దారితీస్తాయోనని రాజకీయ వర్గాల్లో చర్చ జరుగుతోంది. ఇప్పటికే పార్టీలో ఉన్న అసంతృప్త నేతలను ఏకం చేసి, సొంత వర్గాన్ని ఏర్పాటు చేసుకోవడానికి రాజగోపాల్ రెడ్డి ప్రయత్నిస్తున్నట్లు ఊహాగానాలు వినిపిస్తున్నాయి.
పార్టీలో కలవరం
ఈ రహస్య సమావేశం వార్త కాంగ్రెస్ (Congress) పార్టీలో కలకలం రేపింది. ఎన్నికల తర్వాత అధికారంలోకి వచ్చిన కాంగ్రెస్ పార్టీలో అంతర్గత విభేదాలు బయటపడటం పార్టీ అధిష్టానానికి తలనొప్పిగా మారింది. కోమటిరెడ్డి రాజగోపాల్ రెడ్డి వర్గం, రేవంత్ రెడ్డి వర్గం మధ్య ఉన్న విభేదాలు తాజా సమావేశంతో మరోసారి స్పష్టమయ్యాయి. ఈ పరిణామాలపై పార్టీ అధిష్టానం ఎలా స్పందిస్తుందో, ఈ సమస్యను ఎలా పరిష్కరిస్తుందోనని రాజకీయ పరిశీలకులు ఆసక్తిగా గమనిస్తున్నారు.
