ప్రతి ఏడాది లాగే ఈ సంవత్సరం కూడా హైదరాబాద్ (Hyderabad) నాంపల్లి ఎగ్జిబిషన్ గ్రౌండ్ వద్ద చేప ప్రసాదం (Fish Prasadam) పంపిణీ కార్యక్రమం ఘనంగా ప్రారంభమైంది. కానీ ఈ పవిత్ర కార్యక్రమం మొదటి రోజే ఒక్కసారిగా విషాద ఛాయలు అలుముకున్నాయి. 77 ఏళ్ల వృద్ధ భక్తుడు సత్యనారాయణ గుండెపోటుతో మృతి చెందడం అందరినీ కలచివేసింది. ఓ ఆశతో వచ్చి, ప్రసాదం తీసుకునే ముందు ఇలా ప్రాణాలు కోల్పోవడం ఎంతో విషాదకరం.
గుండెపోటుతో ప్రాణాలు కోల్పోయిన సత్యనారాయణ
మెదక్ జిల్లాకు చెందిన ‘సత్యనారాయణ (Satyanarayana) (77)’గా గుర్తించారు. ప్రాథమిక అంచనాల ప్రకారం ఆయనకు తీవ్ర గుండెపోటు వచ్చిందని, ఈ కారణంగానే రద్దీగా ఉన్న క్యూలైన్లోనే తుది శ్వాస విడిచి ఉంటారని అధికారులు పేర్కొన్నారు. సత్యనారాయణ మరణం చేప ప్రసాదం పంపిణీ నిర్వాహకుల్లో, అలాగే క్యూలైన్లోని ఇతర భక్తుల్లో తీవ్ర దిగ్భ్రాంతిని కలిగించింది. ఒక ఆశతో వచ్చిన భక్తుడు ఇలా ప్రాణాలు కోల్పోవడం శోచనీయం.
భక్తుల విశ్వాసానికి ప్రతీక – చేప ప్రసాదం
బత్తిని కుటుంబం తరతరాలుగా కొనసాగిస్తున్న ఈ చేప ప్రసాదం పంపిణీ, శ్వాస సంబంధిత రుగ్మతలకు, ముఖ్యంగా ఆస్తమాకు ఒక సాంప్రదాయ చికిత్సగా ప్రసిద్ధి చెందింది. ఈ ప్రసాదాన్ని స్వీకరించడం ద్వారా రోగాల నుంచి ఉపశమనం లభిస్తుందని దేశంలోని వివిధ ప్రాంతాల నుంచి లక్షలాది మంది భక్తులు ప్రగాఢంగా విశ్వసిస్తారు. నేడు ఉదయమే పంపిణీ ప్రారంభం కాగా రేపు (జూన్ 9) కూడా కొనసాగుతుంది. ఈ భారీ కార్యక్రమానికి ప్రభుత్వం కట్టుదిట్టమైన ఏర్పాట్లు చేసింది. భక్తుల రద్దీని నియంత్రించడానికి సుమారు 140 ఆర్టీసీ ప్రత్యేక బస్సులను కేటాయించారు. నాంపల్లి ఎగ్జిబిషన్ గ్రౌండ్స్ పరిసరాల్లో ట్రాఫిక్ ఆంక్షలు అమలులో ఉన్నాయి.
ఎక్కువ భద్రతా ఏర్పాట్ల మధ్య విషాదం
ఈసారి పంపిణీకి ముందు తెలంగాణ ప్రభుత్వం, నగర పోలీసులు భారీ భద్రతా ఏర్పాట్లు చేశారు. సుమారు 1000 మందికి పైగా పోలీసు సిబ్బంది, 42 క్యూలైన్లు, సీసీటీవీ పర్యవేక్షణ, మేడికల్ సిబ్బంది, వైద్యశిబిరాలు, అంబులెన్స్లు తదితర ఏర్పాట్లు చేసారు. అయినప్పటికీ, వృద్ధుడు ప్రాణాలు కోల్పోవడం ఈ ఏర్పాట్లపై ప్రశ్నలు రేకెత్తిస్తోంది. అతని మృతితో లక్షలాది భక్తులు తరలివచ్చే ఇలాంటి భారీ ఆధ్యాత్మిక వేడుకల్లో వృద్ధులు, వికలాంగులు, పిల్లలు, మహిళల భద్రత ఎంత కీలకమో మరోసారి స్పష్టమైంది.
ప్రభుత్వం, నిర్వాహకుల జాగ్రత్తలు
ప్రభుత్వం ఇప్పటికే ట్రాఫిక్ ఆంక్షలు, ప్రత్యేక బస్సులు, గేటు ఆధారంగా విభజన వంటి చర్యలు తీసుకుంది. వి.ఐ.పి.ల కోసం నాలుగో గేటు, దివ్యాంగులు, వృద్ధుల కోసం మూడో గేటు, సామాన్య భక్తులకు అజంతా గేటు నుంచి ప్రవేశాన్ని అనుమతిస్తారు. తాగునీరు, వైద్య శిబిరాలు, అంబులెన్స్లు వంటి అత్యవసర సేవలు కూడా అందుబాటులో ఉంచారు. గతంలో ఇలాంటి ఘటనలు పునరావృతం కాకుండా చూడటానికి అధికారులు అన్ని జాగ్రత్తలు తీసుకుంటున్నప్పటికీ, ఈ విషాదం అలజడిని సృష్టించింది.
Read also: KTR: గోపీనాథ్ మృతి పార్టీకి తీరని లోటు: కేటీఆర్
Etela Rajender: కేసీఆర్ ను కాపాడాల్సిన అవసరం నాకేంటి: ఈటల రాజేందర్
