తెలంగాణ రాజకీయాల్లో పెను సంచలనం సృష్టించిన ఫార్ములా ఈ-కార్ రేసు కేసు కీలక మలుపు తిరిగింది. ఈ వ్యవహారంలో మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ను ఏ1 (ప్రధాన నిందితుడు) గా పేర్కొంటూ ఏసీబీ అధికారులు ఈ వారమే కోర్టులో చార్జిషీట్ దాఖలు చేసేందుకు సిద్ధమయ్యారు. ఇప్పటికే కేసు విచారణ దాదాపు పూర్తికాగా, ఐఏఎస్ అధికారి అర్వింద్ కుమార్ను (ఏ2) ప్రాసిక్యూట్ చేసేందుకు కేంద్ర పర్సనల్ అండ్ ట్రైనింగ్ విభాగం (DoPT) నుంచి తాజాగా అనుమతి లభించింది. దీంతో చార్జిషీట్ దాఖలుకు ఉన్న చివరి సాంకేతిక అడ్డంకి కూడా తొలగిపోవడంతో ఏసీబీ కసరత్తును వేగవంతం చేసింది.
TTD: తిరుమలలో భక్తుల రద్దీ సాధారణం
ఈ కేసులో ప్రధానంగా రూ. 75.88 కోట్ల మేర హెచ్ఎండీఏ (HMDA) నిధుల దుర్వినియోగం జరిగినట్లు ఏసీబీ అభియోగిస్తోంది. ఫార్ములా ఈ-ఆపరేషన్స్ సంస్థతో ఒప్పందం చేసుకున్న ‘ఏస్ నెక్స్ట్జెన్’ కంపెనీకి నిబంధనలకు విరుద్ధంగా నిధులు మళ్లించారని, అందుకు ప్రతిఫలంగా బీఆర్ఎస్ పార్టీకి రూ. 45 కోట్ల ఎలక్టోరల్ బాండ్లు అందాయని ఏసీబీ తన చార్జిషీట్లో పేర్కొనబోతోంది. దీనిని ఒక ‘క్విడ్ ప్రో కో’ (ప్రతిఫలం ఆశించి చేసిన సాయం) వ్యవహారంగా అధికారులు పరిగణిస్తున్నారు. ఇందుకు సంబంధించి బలమైన ఎలక్ట్రానిక్ మరియు డిజిటల్ సాక్ష్యాధారాలను కూడా ఏసీబీ సేకరించినట్లు సమాచారం.
నేరపూరిత కుట్ర, ప్రభుత్వ నిధుల మళ్లింపు, మరియు అధికార దుర్వినియోగం వంటి అంశాలను ప్రాధాన్యతగా తీసుకుని ఏసీబీ ఈ చార్జిషీట్ను రూపొందించింది. గతేడాది నవంబరులోనే గవర్నర్ నుంచి కేటీఆర్ ప్రాసిక్యూషన్కు అనుమతి లభించగా, ఇప్పుడు ఏసీబీ వేయబోయే చార్జిషీట్ ఆధారంగా ఈడీ (ED) కూడా రంగంలోకి దిగే అవకాశముంది. ఇప్పటికే ఈ కేసులో కేటీఆర్, అర్వింద్ కుమార్ సహా పలువురు అధికారులను ఏసీబీ విచారించింది. ఒకవేళ చార్జిషీట్ దాఖలై కోర్టు దీనిని విచారణకు స్వీకరిస్తే, కేటీఆర్కు ఇది రాజకీయంగా మరియు న్యాయపరంగా పెద్ద సవాలుగా మారే అవకాశం ఉంది.
Read hindi news: hindi.vaartha.com
Read Also Epaper : epaper.vaartha.com
