కర్ణాటక (Karnataka) లోని హసన్ జిల్లాలో ఘోర ప్రమాదం చోటుచేసుకుంది. గణేష్ నిమజ్జనం సందర్భంగా ఊరేగింపు జరుగుతుండగా ఆ ఆనందం ఒక్కసారిగా విషాదంగా మారింది. డ్యాన్సులు, పాటలతో హోరెత్తిస్తున్న భక్తుల మధ్యలో ఓ భారీ ట్యాంకర్ (Heavy tanker) అదుపు తప్పి దూసుకుపోవడంతో ప్రాంతమంతా అల్లకల్లోలమైంది.హసన్-మైసూర్ జాతీయ రహదారి-373పై మోస్లెహోసల్లి గ్రామం వద్ద ఈ ప్రమాదం జరిగింది. శోభాయాత్రలో వందలాది మంది పాల్గొంటున్న వేళ ఆ ట్యాంకర్ నియంత్రణ కోల్పోయి నేరుగా గుంపులోకి దూసుకెళ్లింది. హ్యాపీగా డ్యాన్సులు చేస్తున్న ప్రజలు కాసేపు ఏమైందో గ్రహించలేకపోయారు. తేరుకునేలోపే మృతదేహాలు రోడ్డు మీద చెల్లాచెదురుగా పడి కనిపించాయి.
ఎనిమిది ప్రాణాలు బలై, ఇరవై మందికి పైగా గాయాలు
ఈ భయంకర ప్రమాదంలో ఎనిమిది మంది అక్కడికక్కడే మృతి చెందారు. 20 మందికి పైగా తీవ్రంగా గాయపడ్డారు. గాయపడిన వారిని సమీపంలోని ఆసుపత్రులకు తరలించారు. కొంతమంది పరిస్థితి విషమంగా ఉందని వైద్యులు తెలిపారు. మృతుల సంఖ్య మరింత పెరిగే అవకాశం ఉందని అధికారులు హెచ్చరించారు.ప్రమాదం జరిగిన వెంటనే స్థానికులు, పోలీసులు ముందుకు వచ్చి సహాయక చర్యలు చేపట్టారు. గాయపడిన వారిని వేగంగా ఆసుపత్రికి తరలించడంతో అనేకమందికి ప్రాణభయంనుంచి ఉపశమనం లభించింది. ఈ ఘటనకు సంబంధించిన వీడియోలు సోషల్ మీడియాలో వేగంగా వైరల్ అవుతున్నాయి.
కేసు నమోదు – డ్రైవర్ కోసం గాలింపు
ప్రమాదంపై పోలీసులు ఇప్పటికే కేసు నమోదు చేశారు. ట్యాంకర్ డ్రైవర్ కోసం గాలింపు ప్రారంభమైంది. అతడు అదుపు తప్పాడా లేక నిర్లక్ష్యంగా నడిపాడా అనే అంశంపై దర్యాప్తు జరుగుతోంది. స్థానిక ప్రజాప్రతినిధులు, అధికారులు సంఘటన స్థలానికి చేరుకుని పరిస్థితిని సమీక్షించారు.గణేష్ నిమజ్జనం రోజు ఈ విషాదం సంభవించడంతో గ్రామమంతా దుఃఖంలో మునిగిపోయింది. ఆనందోత్సవం జరగాల్సిన రోజు కన్నీటి వాతావరణంగా మారింది. ప్రతి ఒక్కరి ఇంట్లో ఆవేదన నెలకొంది.
సీఎం సిద్ధరామయ్య సంతాపం
ముఖ్యమంత్రి సిద్ధరామయ్య ఈ ఘటనపై తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రభుత్వం తరపున ఒక్కొక్కరికి రూ.5 లక్షల పరిహారం అందిస్తామని ఆయన ప్రకటించారు. గాయపడిన వారి వైద్య ఖర్చులను కూడా ప్రభుత్వమే భరిస్తుందని హామీ ఇచ్చారు. “గణేష్ నిమజ్జనం సందర్భంగా ఇలా ప్రాణ నష్టం జరగడం చాలా బాధాకరం. గాయపడిన వారు త్వరగా కోలుకోవాలి” అని సీఎం ఎక్స్లో పోస్టు చేశారు.
డిప్యూటీ సీఎం స్పందన
డిప్యూటీ సీఎం డీకే శివకుమార్ కూడా ఈ ప్రమాదాన్ని అత్యంత భయంకరమని పేర్కొన్నారు. బాధిత కుటుంబాలకు ప్రభుత్వం అండగా నిలుస్తుందని హామీ ఇచ్చారు.ఆనందోత్సవంగా సాగాల్సిన గణేష్ ఊరేగింపు విషాదకర రోడ్డు ప్రమాదంతో ముగిసింది. మృతుల కుటుంబాలు శోకసంద్రంలో మునిగిపోగా, గాయపడిన వారు ఆసుపత్రిలో చికిత్స పొందుతున్నారు. ఈ ఘటన కర్ణాటక ప్రజల హృదయాలను కలచివేసింది.
Read Also :
