Rohit Sharma: 2027 వన్డే ప్రపంచకప్‌లో రోహిత్ శర్మ అవసరం ఉంది

టీమిండియా మాజీ కెప్టెన్ రోహిత్ శర్మ (Rohit Sharma) భవిష్యత్తుపై ప్రస్తుతం క్రికెట్ వర్గాల్లో ఆసక్తికరమైన చర్చ నడుస్తోంది. ఇప్పటికే 38 ఏళ్లు పూర్తి చేసుకున్న రోహిత్,ఇంకోసారి ప్రపంచకప్ ఆడతాడా? అనే ప్రశ్నలు అభిమానులను, నిపుణులను కుతూహలానికి గురిచేస్తున్నాయి.ముఖ్యంగా, రాబోయే 2027 వన్డే ప్రపంచకప్లో రోహిత్ శర్మ పాల్గొనడం గురించి అనేక ఊహాగానాలు వినిపిస్తున్నాయి.

ఈ నేపథ్యంపై భారత మాజీ వికెట్ కీపర్, వ్యాఖ్యాత దినేశ్ కార్తీక్ (Dinesh Karthik) చేసిన తాజా వ్యాఖ్యలు ఇప్పుడు చర్చనీయాంశంగా మారాయి.కార్తీక్ మాట్లాడుతూ, రోహిత్ శర్మ ఇంకా భారత జట్టుకు ఎంతో అవసరమని, అతని అనుభవం, నాయకత్వం రాబోయే సంవత్సరాల్లో కూడా కీలకమని అభిప్రాయపడ్డాడు. “2023 వన్డే ప్రపంచకప్ (2023 ODI World Cup) ఫైనల్‌లో ఓటమి తర్వాత రోహిత్ మనసులో ఇంకా ఆ బాధ మిగిలే ఉంది.

50 ఓవర్ల ప్రపంచకప్‌ను గెలవాలని అతనికి ఉన్న తపన ఇప్పటికీ తగ్గలేదు” అని ఆయన తెలిపారు.రోహిత్ శర్మ (Rohit Sharma) బ్యాటింగ్ ఫామ్‌ను కార్తీక్ ప్రత్యేకంగా ప్రశంసించాడు. “2023 ప్రపంచకప్ తర్వాత రోహిత్ గణాంకాలు చూస్తే ఆశ్చర్యం కలుగుతుంది. అతను 48 సగటుతో వెయ్యికి పైగా పరుగులు సాధించాడు.

వ్యక్తిగత మైలురాళ్ల కోసం ఆడటం లేదు

అతని స్ట్రైక్ రేట్ గురించి మనందరికీ తెలిసిందే. రాబోయే 2027 వరల్డ్ కప్‌ను దృష్టిలో ఉంచుకుంటే, బ్యాటర్‌గా రోహిత్ జట్టుకు చాలా ముఖ్యం. అతను పూర్తి మనసు పెట్టి ఆడితే, కచ్చితంగా ఆ టోర్నీలోనూ రాణిస్తాడనే నమ్మకం నాకుంది” అని డీకే పేర్కొన్నాడు.పవర్‌ప్లేలో రోహిత్ ఆడే దూకుడైన ఆట జట్టుకు ఎంతగానో ఉపయోగపడుతుందన్నాడు.

“రోహిత్ ఫామ్‌లో ఉన్నప్పుడు అతని బ్యాటింగ్ చూడటానికి చాలా అద్భుతంగా ఉంటుంది. ముఖ్యంగా పవర్‌ప్లేలో బౌలర్లపై నిర్భయంగా దాడి చేసి, మిగతా బ్యాటర్లకు బలమైన పునాది వేస్తాడు. అతను ఇప్పుడు వ్యక్తిగత మైలురాళ్ల కోసం ఆడటం లేదు, జట్టు కోసం ఆడుతున్నాడు. అతని నిస్వార్థ వైఖరి జట్టుకు ఎంతో స్ఫూర్తినిస్తోంది” అని దినేశ్‌ కార్తీక్ కొనియాడాడు.