Latest News: Rajasthan Royals - రాజస్థాన్ రాయల్స్

ఇండియన్ ప్రీమియర్ లీగ్‌ (ఐపీఎల్‌) లో అత్యంత పాత ఫ్రాంచైజీలలో ఒకటైన రాజస్థాన్ రాయల్స్‌ (Rajasthan Royals) ఇటీవల అంతర్గత సమస్యలతో వార్తల్లో నిలుస్తోంది. ఇప్పటికే జట్టు కెప్టెన్ సంజూ శాంసన్ భవిష్యత్తు గురించి అనేక ఊహాగానాలు వినిపిస్తున్న వేళ, ఇప్పుడు ఆ ఫ్రాంచైజీకి చెందిన చీఫ్ ఎగ్జిక్యూటివ్ ఆఫీసర్‌ (సీఈవో) జేక్ లష్ మెక్‌క్రమ్ తన పదవికి రాజీనామా చేయడం క్రీడాభిమానుల్లో చర్చనీయాంశమైంది.

క్రిక్‌బజ్ వంటి ప్రతిష్టాత్మక క్రీడా మీడియా వర్గాల సమాచారం ప్రకారం, మెక్‌క్రమ్ (Jake Lush McCrum) తన రాజీనామా నిర్ణయాన్ని ఇప్పటికే సహచర ఉద్యోగులకు, కొన్ని ఇతర ఐపీఎల్‌ ఫ్రాంచైజీలకు కూడా తెలియజేశారని తెలిసింది. అక్టోబర్‌ నాటికి ఆయన తన బాధ్యతలన్నింటినీ పూర్తి స్థాయిలో వీడే అవకాశం ఉందని అంచనా వేస్తున్నారు.

28 ఏళ్ల వయసులోనే సీఈవోగా పదోన్నతి

గతంలో జూనియర్ స్థాయిలో రాయల్స్‌లో చేరిన మెక్‌క్రమ్ ఆపరేషన్స్ విభాగంలో పనిచేసి 2021లో కేవలం 28 ఏళ్ల వయసులోనే సీఈవో (CEO) గా పదోన్నతి పొందారు. ఇటీవల జరిగిన సౌతాఫ్రికా టీ20 లీగ్ వేలంలో పార్ల్ రాయల్స్ టేబుల్ వద్ద ఆయన కనిపించకపోవడంతోనే ఆయన నిష్క్రమణపై ఊహాగానాలు మొదలయ్యాయి.

ఆ సమయంలో కోచ్ కుమార్ సంగక్కర ఫ్రాంచైజీ బాధ్యతలను ముందుండి నడిపించారు.ఈ పరిణామాలన్నీ గత ఐపీఎల్ సీజన్‌లో రాయల్స్ పేలవ ప్రదర్శన తర్వాతే మొదలయ్యాయి. 14 లీగ్ మ్యాచ్‌లలో కేవలం నాలుగింటిలో గెలిచి పట్టికలో తొమ్మిదో స్థానంలో నిలవడంతో జులైలో జట్టు ప్రదర్శనపై సమీక్ష జరిగింది. ఆ తర్వాతే ఈ కీలక మార్పులు చోటుచేసుకుంటున్నాయి. గత సీజన్ ముగిసిన వెంటనే మార్కెటింగ్ హెడ్ ద్విజేంద్ర పరాశర్ కూడా ఫ్రాంచైజీని వీడారు.

సంజూ శాంసన్ యాజమాన్యాన్ని కోరినట్టు

2026 ఐపీఎల్ వేలానికి ముందే తనను జట్టు నుంచి విడుదల చేయాలని లేదా ట్రేడ్ చేయాలని ఇటీవల సంజూ శాంసన్ యాజమాన్యాన్ని కోరినట్టు వార్తలు వచ్చాయి. చెన్నై సూపర్ కింగ్స్ ట్రేడింగ్ కోసం ఆసక్తి చూపినప్పటికీ, ఆ చర్చలు ముందుకు సాగలేదు. ఇప్పుడు వరుసగా కీలక వ్యక్తులు వైదొలగడంతో, జట్టు యజమాని మనోజ్ బదాలే నేరుగా రంగంలోకి దిగినట్టు తెలుస్తోంది. ఆయన ఫ్రాంచైజీ నాయకత్వ బాధ్యతలన్నింటినీ భారత్ నుంచి లండన్‌కు తరలిస్తున్నారని సమాచారం.