Latest News: Virat Kohli - తొక్కిసలాటపై స్పందించిన విరాట్ కోహ్లీ

రాయల్ ఛాలెంజర్స్ బెంగళూరు (ఆర్‌సీబీ) (RCB) ఈ సీజన్‌లో ఐపీఎల్ టైటిల్ గెలిచి, ఫ్రాంచైజీ చరిత్రలో ఎన్నో ఏళ్లుగా ఎదురుచూస్తున్న కలను నిజం చేసింది. అభిమానుల కోసం, ఆటగాళ్ల కోసం, మేనేజ్‌మెంట్ కోసం ఇది ఎంతో విశేషమైన ఘట్టం. కానీ ఆ ఆనందోత్సవం దుర్ఘటనగా మారడం అందరినీ తీవ్రంగా కలచివేసింది. జూన్ 4న విజయోత్సవాల సందర్భంగా తొక్కిసలాట ఘటన చోటుచేసుకోవడంతో పలువురు అభిమానులు ప్రాణాలు కోల్పోవడం, మరికొందరు గాయపడటం జరిగింది. ఈ సంఘటనపై ఇప్పటి వరకు మౌనం పాటించిన ఆర్‌సీబీ స్టార్ ఆటగాడు, మాజీ కెప్టెన్ విరాట్ కోహ్లీ తొలిసారిగా స్పందించాడు.

తన అధికారిక ప్రకటనలో విరాట్ కోహ్లీ (Virat Kohli) తీవ్ర భావోద్వేగానికి లోనయ్యాడు. “జూన్ 4న జరిగిన సంఘటన మా జీవితాల్లో ఎప్పటికీ చెరగని ముద్ర వేసింది. ఫ్రాంచైజీ చరిత్రలో గొప్పగా నిలవాల్సిన రోజు విషాదకరంగా మారింది. మా అభిమానుల ఆనందం కోసం జరిపిన వేడుక ఇలాంటి బాధను మిగిల్చుతుందని ఊహించలేదు. ప్రాణాలు కోల్పోయిన కుటుంబాలకు, నా హృదయపూర్వక సానుభూతి. గాయపడిన అభిమానులు త్వరగా కోలుకోవాలని కోరుకుంటున్నాను” అని కోహ్లీ తన ప్రకటనలో పేర్కొన్నాడు.

కొత్త కార్యక్రమాన్ని

ఈ ఏడాది ఆర్‌సీబీ తమ తొలి ఐపీఎల్ ట్రోఫీ (IPL trophy) గెలిచిన సందర్భంగా బెంగళూరులో ఏర్పాటు చేసిన విజయోత్సవ ర్యాలీలో తొక్కిసలాట జరిగి 11 మంది అభిమానులు ప్రాణాలు కోల్పోయిన విషయం తెలిసిందే. ఈ ఘటనపై స్పందించిన ఆర్‌సీబీ యాజమాన్యం, మృతుల కుటుంబాలకు అండగా నిలిచింది. ప్రతి కుటుంబానికి రూ. 25 లక్షల నష్టపరిహారాన్ని ప్రకటించింది. అంతేకాకుండా, ‘ఆర్‌సీబీ కేర్స్’ పేరుతో ఒక కొత్త కార్యక్రమాన్ని ప్రారంభించింది. దీని ద్వారా తమ అభిమానులకు మద్దతుగా నిలుస్తామని, వారికి సాధికారత కల్పిస్తామని హామీ ఇచ్చింది. భవిష్యత్తులో ఇలాంటి సంఘటనలు పునరావృతం కాకుండా ఐపీఎల్, కర్ణాటక రాష్ట్ర క్రికెట్ సంఘం (కేఎస్‌సీఏ)తో కలిసి పటిష్ఠ‌మైన జన నియంత్రణ ప్రమాణాలను రూపొందిస్తామని తెలిపింది.

మరోవైపు, ఈ తొక్కిసలాట ఘటనపై కర్ణాటక ప్రభుత్వం ఏర్పాటు చేసిన జస్టిస్ జాన్ మైఖేల్ డి కున్హా కమిషన్ తన నివేదికను సమర్పించింది. చిన్నస్వామి స్టేడియం నిర్మాణం, దాని డిజైన్ భారీ జనసమూహాలను నిర్వహించడానికి ఏమాత్రం సురక్షితం కాదని, అనువుగా లేదని కమిషన్ తన నివేదికలో స్పష్టం చేసింది. ఈ నివేదిక తీవ్ర పరిణామాలకు దారితీసింది. కమిషన్ నివేదిక ఆధారంగా 2025లో జరగనున్న ఐసీసీ మహిళల వన్డే ప్రపంచకప్‌ వేదికల జాబితా నుంచి బెంగళూరును తొలగించారు. ఆ స్థానంలో నవీ ముంబైకి మ్యాచ్‌లను కేటాయిస్తున్నట్లు ఐసీసీ సవరించిన షెడ్యూల్‌లో ప్రకటించింది.