Karsan Ghavri: కోహ్లీ, రోహిత్‌ల టెస్ట్ రిటైర్మెంట్‌పై మాజీ

భారత క్రికెట్ దిగ్గజాలు విరాట్ కోహ్లీ, రోహిత్ శర్మలు టెస్ట్ క్రికెట్‌కు అనూహ్యంగా వీడ్కోలు పలకడం ఇప్పటికీ అభిమానులు జీర్ణించుకోలేకపోతున్నారు. ఈ నిర్ణయం వారు స్వచ్ఛందంగా తీసుకోలేదని, బీసీసీఐ (BCCI) అంతర్గత రాజకీయాల వల్లే రిటైర్మెంట్ ప్రకటించాల్సి వచ్చిందని భారత మాజీ క్రికెటర్ కర్సన్ ఘవ్రి సంచలన ఆరోపణలు చేశారు.2025 మే నెలలో ఇంగ్లండ్‌తో టెస్ట్ సిరీస్‌కు కొన్ని రోజుల ముందు కోహ్లీ, రోహిత్‌లు రిటైర్మెంట్ ప్రకటించిన విషయం తెలిసిందే. ఈ ప్రకటన భారత క్రికెట్ వర్గాల్లో షాక్ వేవ్స్ సృష్టించగా, ఇప్పుడు ఘవ్రి చేసిన వ్యాఖ్యలు మరోసారి ఈ అంశాన్ని చర్చకు తెచ్చాయి. ఆయన ప్రకారం, కోహ్లీ, రోహిత్‌ (Kohli and Rohit) లు ఇంకా రెండేళ్లు సులభంగా ఆడగల సామర్థ్యం ఉన్నప్పటికీ, సెలక్షన్ కమిటీ, బీసీసీఐలోని కొందరి కుట్రల కారణంగా వారిని బలవంతంగా తప్పించారని ఆరోపించారు.

భారత క్రికెట్‌కు ఎన్నో విజయాలు

“బీసీసీఐలోని అంతర్గత రాజకీయాలను అర్థం చేసుకోవడం చాలా కష్టం. ఈ కుటిల రాజకీయాలే ఈ నిర్ణయానికి కారణమయ్యాయి. నిజానికి కోహ్లీ, రోహిత్‌లు ఇంకా ఆడాలని అనుకున్నారు. కానీ సెలక్టర్లు వేరే ఆలోచనలో ఉన్నారు. అందువల్లే వారికి రిటైర్మెంట్ ప్రకటించాల్సి వచ్చింది” అని ఘవ్రి (Karsan Ghavri) ఒక ఇంటర్వ్యూలో తెలిపారు.ఇంత పెద్ద స్థాయికి ఎదిగి, భారత క్రికెట్‌కు ఎన్నో విజయాలు అందించిన విరాట్ కోహ్లీకి కనీసం ఒక వీడ్కోలు మ్యాచ్ ఇవ్వకపోవడాన్ని ఆయన తీవ్రంగా విమర్శించారు. “కోహ్లీ లాంటి ఆటగాడు ఇంకా రెండేళ్లు కనీసం టెస్ట్ క్రికెట్‌లో కొనసాగగలడు. కానీ ఆయనపై తీవ్రమైన ఒత్తిడి తెచ్చారు.

త్వరలోనే వన్డేల నుంచి కూడా తప్పుకోవచ్చని

ఇది కేవలం ఒక ఆటగాడి వ్యక్తిగత నష్టం మాత్రమే కాదు, కోట్లాది అభిమానుల నిరాశ కూడా. ఇంతటి క్రికెట్ దిగ్గజానికి ఘనమైన వీడ్కోలు ఇవ్వాల్సింది. కానీ బీసీసీఐ ఆ గౌరవాన్ని కూడా ఇవ్వలేదు” అని ఘవ్రి ఆవేదన వ్యక్తం చేశారు.ఈ ఇద్దరు స్టార్ ఆటగాళ్లు త్వరలోనే వన్డేల నుంచి కూడా తప్పుకోవచ్చని, దాంతో 2027 ప్రపంచకప్ ఆడే అవకాశం కోల్పోతారని వార్తలు వస్తున్న నేపథ్యంలో ఘవ్రి చేసిన ఈ వ్యాఖ్యలు మరింత ప్రాధాన్యత సంతరించుకున్నాయి. కాగా, వన్డే ఫార్మాట్‌లో విరాట్ 14,181 పరుగులు, రోహిత్ 11,168 పరుగులు చేసి భారత్‌కు ఎన్నో చిరస్మరణీయ విజయాలు అందించారు.