Seethakka : అక్బరుద్దీన్ ఒవైసీని ఉద్దేశించి మంత్రి సీతక్క వ్యాఖ్యలు తెలంగాణ మంత్రిగా ఉన్న సీతక్క శాసనసభ వేదికగా తన అభిప్రాయాలను స్పష్టంగా వెల్లడించారు. “నేను తెలుగు గడ్డ మీదే పుట్టాను. నా మాతృభాష తెలుగు. అందుకే నేను హిందీ, ఇంగ్లీష్ మాట్లాడలేను. నేను గర్వంగా చెప్పగలను, నేను తెలుగు వ్యక్తిని” అంటూ తన మనోభావాలను వ్యక్తం చేశారు. మజ్లిస్ పార్టీ శాసనసభా పక్ష నేత అక్బరుద్దీన్ ప్రభుత్వంపై తీవ్ర విమర్శలు చేస్తున్నారని, ఇది బాధాకరమని ఆమె అన్నారు. తనకు హిందీ, ఇంగ్లీష్ మాట్లాడే అవసరం లేదని, ఎందుకంటే తాను తెలుగు రాష్ట్రంలోనే జన్మించానని వివరించారు. గ్రామీణ ప్రాంతాల్లో పుట్టి పెరిగిన వ్యక్తిగా ప్రజల సమస్యలను అర్థం చేసుకోగలనని స్పష్టం చేశారు.
పంచాయతీరాజ్ సవరణ బిల్లుకు ఆమోదం
తెలంగాణ శాసనమండలిలో పంచాయతీరాజ్ సవరణ బిల్లుపై జరిగిన చర్చలో సభ్యులు అనేక కీలక సూచనలు చేశారు. ఈ చర్చలో పాల్గొన్న మంత్రి సీతక్క, సభ్యుల ప్రశ్నలకు సమాధానమిచ్చారు.”సభ్యుల సూచనలు చాలా విలువైనవి. వారు ప్రస్తావించిన అంశాలను పరిశీలించేందుకు సిద్ధంగా ఉన్నాం. ప్రతిపాదనలు పంపిస్తే, వాటిపై సమగ్రంగా ఆలోచించి ముందుకు వెళ్లుతాం” అని మంత్రి పేర్కొన్నారు.
ఏజెన్సీ ప్రాంతాల అభివృద్ధి
రాష్ట్రపతి ఉత్తర్వుల మేరకు ఆదిలాబాద్ నుంచి అచ్చంపేట వరకు షెడ్యూల్ ఏరియాలుగా గుర్తించినట్లు ఆమె తెలిపారు. ఈ ప్రాంతాల్లో 1/70 చట్టం అమలులో ఉందని, దీని ద్వారా స్థానిక ప్రజలకు ప్రత్యేక హక్కులు లభిస్తున్నాయని వివరించారు. ఏజెన్సీ ప్రాంతాలను గుర్తించి అభివృద్ధి జరిపేందుకు ప్రభుత్వం కృషి చేస్తోందని స్పష్టం చేశారు.
మున్సిపాలిటీగా ములుగు
“ములుగును మున్సిపాలిటీగా మారుస్తున్నాం. ప్రజల అభిప్రాయాలను అనుసరించి, కలెక్టర్ల పంపిన ప్రతిపాదనల ఆధారంగా మున్సిపాలిటీలుగా పంచాయతీలను నవీకరిస్తున్నాం” అని మంత్రి సీతక్క వెల్లడించారు. కొన్ని గ్రామాలు ఒక మండల పోలీస్ స్టేషన్ పరిధిలో ఉండటం, రెవెన్యూ పరంగా మరో మండలంలో ఉండటం వంటి సమస్యల పరిష్కారానికి ప్రత్యేక దృష్టి సారిస్తున్నామని చెప్పారు. 42% రిజర్వేషన్లు కల్పించే బిల్లును మనం ఇప్పటికే ఆమోదించాం. కేంద్రం దీనికి చట్టబద్ధత కల్పిస్తే మరింత అధిక రిజర్వేషన్లు కల్పించగలుగుతాం. అందుకే అన్ని పార్టీలు కేంద్రంపై ఒత్తిడి తీసుకురావాలి అని మంత్రి సీతక్క అన్నారు.
