తిరుమలలో భక్తులకు మరింత సౌకర్యం కల్పించేందుకు టీటీడీ (TTD) మరో మంచి నిర్ణయం తీసుకుంది. టీటీడీ అదనపు ఈవో వెంకయ్య చౌదరి వెల్లడించిన వివరాల ప్రకారం, భక్తులు ఇప్పుడు తిరుమలలో ఒక ప్రదేశం నుంచి మరొక ప్రదేశానికి ఆర్టీసీ బస్సుల ద్వారా ఉచితంగా (Free ) ప్రయాణించవచ్చు. ఈ సేవలు ఇప్పటికే ఉన్న ధర్మ రథాలకు అదనంగా అందుబాటులోకి తీసుకొచ్చారు.
ధర్మ రథాల రూట్లోనే ఆర్టీసీ సేవలు
ఈ ఉచిత బస్సు సేవలు ఇప్పటికే తిరుమలలో నడుస్తున్న ధర్మ రథాల మార్గాల్లోనే కొనసాగనున్నాయి. తిరుమల గిరులపై పలు ముఖ్యమైన ప్రాంతాలకు వెళ్లే భక్తులకు ఇవి ఎంతో ఉపయోగకరంగా ఉంటాయి. ముఖ్యంగా వృద్ధులు, మహిళలు, చిన్నారులు వంటి వారికి ఈ సేవలు ఎంతో సౌలభ్యాన్ని కలిగిస్తాయని టీటీడీ అధికారులు ఆశిస్తున్నారు. తిరుమలలో నిత్యం వేలాది భక్తులు రాకపోకలు చేయడం వల్ల ఇటువంటి సేవల అవసరం తప్పనిసరిగా మారింది.
ప్రైవేటు వాహనాల అదుపులో భాగం
ఈ నిర్ణయం ద్వారా ప్రయాణ ఖర్చులను తగ్గించడమే కాకుండా, ట్రాఫిక్ నియంత్రణ, వాతావరణ కాలుష్యాన్ని తగ్గించడంలో టీటీడీ ముందడుగు వేసింది. ప్రైవేటు వాహనదారులు అధిక ఛార్జీలు వసూలు చేస్తుండటంతో భక్తులు ఇబ్బందులు ఎదుర్కొంటున్నారు. ఇకపై ఆర్టీసీ ఉచిత సేవలతో ఆ సమస్య తీరనుంది. ఈ చర్య తిరుమలలో భక్తులకు మంచి అనుభూతిని కలిగించడంలో సహాయపడుతుంది.
Read Also : Child Rights : బాలల హక్కుల కమిషన్ నియామకాల దరఖాస్తులకు గడువు పొడిగింపు
