కాంగ్రెస్ ఎంపీ, ప్రతిపక్షనేత రాహుల్ గాంధీ సోమవారం మహారాష్ట్రలో పర్యటించనున్నారు. ఈ పర్యటనలో ఆయన పర్భానీ జిల్లాలో చోటు చేసుకున్న హింసాత్మక ఘటనలో బాధిత కుటుంబాలను కలవనున్నారు. ఈ ఘటనలో ఇద్దరు ప్రాణాలు కోల్పోయారు. అనేక మంది గాయపడ్డారు. రాహుల్ గాంధీ ఈ పర్యటన ద్వారా అక్కడి బాధిత కుటుంబాలకు సానుభూతి తెలిపి, రాష్ట్ర ప్రభుత్వం తీసుకోవాల్సిన చర్యలపై ప్రస్తావించనున్నారు.
పర్భానీ జిల్లా హింసాత్మక ఘటన
మహారాష్ట్ర రాష్ట్రంలోని పర్భానీ జిల్లాలో ఇటీవల చోటుచేసుకున్న హింసాత్మక ఘటన రాష్ట్రంలో తీవ్ర ఆందోళన కలిగించింది. 2024 డిసెంబర్ మొదటి వారంలో గ్రామస్థులు, సామాజిక వర్గాల మధ్య తీవ్ర ఉద్రిక్తతలు ఏర్పడిన సంగతి తెలిసిందే. పోలీసు కస్టడీలో మరణించిన అంబేద్కరైట్ సోమనాథ్ సూర్యవంశీ, నిరసనల్లో పాల్గొని మరణించిన విజయ్ వాకోడే కుటుంబాలను రాహుల్ గాంధీ పరామర్శించనున్నారు. డిసెంబరు 10వ తేదీ సాయంత్రం, నగరంలోని రైల్వే స్టేషన్ వెలుపల డాక్టర్ బాబాసాహెబ్ అంబేద్కర్ విగ్రహం సమీపంలో రాజ్యాంగం ప్రతిరూపాన్ని ధ్వంసం చేసిన తర్వాత పర్భానీలో హింసాత్మక ఘటనలు జరిగాయి.
దేవేంద్ర ఫడ్నవీస్ వివరణ
అయితే తనను హింసించలేదని సూర్యవంశీ మేజిస్ట్రేట్కు చెప్పారని ముఖ్యమంత్రి దేవేంద్ర ఫడ్నవీస్ ఇటీవల అసెంబ్లీలో చెప్పారు. అంతే కాకుండా సీసీటీవీ ఫుటేజీలో క్రూరత్వానికి సంబంధించిన ఆధారాలు లేవు. రాహుల్ అనవసరంగా రాజకీయాలు చేస్తున్నారని దేవేంద్ర ఫడ్నవీస్ విమర్శించారు.
