Narendra Modi : ఖరీఫ్ పంటలకు మద్దతు ధర పెంచిన కేంద్రం

దేశవ్యాప్తంగా ఉన్న కోట్లాది మంది రైతులకు కేంద్రం నుంచి శుభవార్త వచ్చింది. 2025-26 ఖరీఫ్ సీజన్‌కు ( For the 2025-26 Kharif season) సంబంధించి కేంద్రం కీలక నిర్ణయం తీసుకుంది. 14 రకాల పంటల కనీస మద్దతు ధరలు (MSP)పెంచుతూ కేంద్ర ప్రభుత్వం బుధవారం కీలక ప్రకటన చేసింది.ఈ నిర్ణయాన్ని ఆర్థిక వ్యవహారాల కేబినెట్ కమిటీ (CCEA) ప్రధాని నరేంద్ర మోదీ (Narendra Modi) అధ్యక్షతన తీసుకుంది. మద్దతు ధరల పెంపు ద్వారా రైతుల ఆదాయం పెంపు, వ్యవసాయ రంగాన్ని స్థిరంగా ఉంచడమే ప్రధాన లక్ష్యం అని కేంద్ర మంత్రి అశ్వినీ వైష్ణవ్ తెలిపారు.

పెరిగిన ధరలు: ఎవరు ఎంత లాభపడుతున్నారు?

ఈసారి పలు పంటలపై MSP భారీగా పెరిగింది. రైతులకు ఇది పెద్ద ఊరట.
సాధారణ వరి ధర రూ. 69 పెరిగి రూ. 2,369కి చేరింది
‘ఏ’ గ్రేడ్ వరి ధర రూ. 2,389గా నిర్ణయించబడింది
మొక్కజొన్న ధర రూ. 2,225 నుండి రూ. 2,400కి పెరిగింది

అత్యధిక పెరుగుదల కలిగిన పంటలు:

నైజర్ సీడ్ (ఒడిసలు): రూ. 820 పెంపు
రాగి: రూ. 596
పత్తి: రూ. 589
నువ్వులు: రూ. 579

నూనె గింజలలో:

వేరుశనగపై రూ. 480 పెంపు
సోయాబీన్ ధర రూ. 436 పెరిగింది
పొద్దుతిరుగుడు విత్తనాల ధర రూ. 441 పెరిగింది

పప్పుధాన్యాలలో:

కందిపప్పు MSP రూ. 450 పెరిగింది
మినుములు రూ. 400 పెంపు
పెసరపప్పు రూ. 86 పెరిగింది

ఎంఎస్‌పీ ఎందుకు ముఖ్యం?

రైతులు పంటలు పండించి మార్కెట్‌లో అమ్మినప్పుడు ధరలు పడిపోవచ్చు. అప్పుడు కనీస మద్దతు ధర (MSP) రైతులకు భరోసాగా నిలుస్తుంది. ప్రభుత్వం ప్రకటించిన ధర కన్నా తక్కువ ధరకు మార్కెట్‌లో అమ్మకాలు జరిగినా, రైతులకు కనీసంగా MSP ధర దక్కేలా చూస్తారు.ఇది రైతుల ఆదాయాన్ని రక్షించడమే కాకుండా, పంటల ఎంపికలో స్పష్టతనూ ఇస్తుంది. రుతుపవనాల సీజన్ ప్రారంభానికి ముందే ఈ ప్రకటన రావడం వల్ల రైతులు ఎటువంటి పంటలు వేసుకోవాలో నిర్ణయించుకోవడంలో ఇది ఉపయోగపడుతుంది.

వడ్డీ రాయితీ పథకం కొనసాగింపు

ఎంఎస్‌పీ పెంపుతో పాటు రైతులకు మరొక మంచి వార్త ఇదే – సవరించిన వడ్డీ రాయితీ పథకం (MISS) కొనసాగుతోంది. ఈ పథకం ద్వారా రైతులకు స్వల్పకాలిక రుణాలపై 1.5% వడ్డీ రాయితీ వర్తించనుంది.కిసాన్ క్రెడిట్ కార్డ్ (KCC) ద్వారా రైతులు రూ. 3 లక్షల వరకూ రుణాలను 7% వడ్డీకే పొందవచ్చు. ఇందులో 1.5% కేంద్ర ప్రభుత్వం భరిస్తుంది.వారు రుణాన్ని సకాలంలో తిరిగి చెల్లిస్తే అదనంగా 3% ప్రోత్సాహక రాయితీ లభిస్తుంది. ఇలా మొత్తం 4% వడ్డీకే రైతులకు రుణం అందుతుంది.ఈ ప్రయోజనం పశుసంవర్ధక, మత్స్య పరిశ్రమల కోసం తీసుకునే రూ. 2 లక్షల వరకూ రుణాలకూ వర్తిస్తుంది.

రైతు భరోసా – పంటలకు మద్దతుతో పాటు రుణాల్లో ఊరట

ఈ నిర్ణయాలు రైతులకు ఆర్థికంగా నిలువెత్తు భరోసానిచ్చేవిగా ఉన్నాయి. పంటలు పండించడంలో భయం లేకుండా ముందుకెళ్లేందుకు వీలుగా మారాయి.రుణాలు తక్కువ వడ్డీకే అందుకోవడం, MSP పెంపు వల్ల రైతులు చైతన్యంతో సాగు పనులు ప్రారంభించగలుగుతారు.2025-26 ఖరీఫ్ సీజన్‌కు కేంద్రం తీసుకున్న ఈ నిర్ణయాలు రైతు సంక్షేమ దిశగా కీలక మలుపుగా నిలుస్తున్నాయి. ధరల భరోసా, రుణ సౌలభ్యం కలిసొచ్చే ఈ సమయంలో రైతులకు నిజమైన పండుగ వాతావరణమే.