Justice Ujjal Bhuyan: ఓటు హక్కు తొలగించడం రాజ్యాంగ విరుద్ధమే:

Justice Ujjal Bhuyan: దేశంలోని కోట్లాది మంది సాధారణ పౌరులను వారి ఓటు హక్కుకు దూరం చేసే ఏకపక్ష ప్రక్రియ ఏదైనా సరే అది పూర్తిగా రాజ్యాంగ విరుద్ధమని సుప్రీంకోర్టు న్యాయమూర్తి జస్టిస్‌ ఉజ్జల్‌ భుయాన్‌ తేల్చిచెప్పారు. ఇలాంటి చర్యల వల్ల పౌరులు తమ స్వదేశంలోనే ద్వితీయ శ్రేణి వ్యక్తులుగా మిగిలిపోయే ప్రమాదం ఉందని, ఇది నేరుగా రాజ్యాంగ మూలస్తంభాలపై జరుగుతున్న దాడి అని ఆయన తీవ్ర ఆందోళన వ్యక్తం చేశారు. ఎంతటి బలమైన కారణాలు చూపినప్పటికీ ఈ తరహా చర్యలను ఏమాత్రం సమర్థించలేమని ఆయన స్పష్టం చేశారు.

నల్సార్ వేదికగా కీలక వ్యాఖ్యలు

హైదరాబాద్‌లోని ప్రఖ్యాత నల్సార్‌ న్యాయ విశ్వవిద్యాలయంలో ఆదివారం జరిగిన 19వ జస్టిస్‌ బోధ్‌రాజ్‌ సావ్నీ స్మారక మూట్‌ కోర్టు పోటీల ముగింపు కార్యక్రమంలో ఆయన ముఖ్య అతిథిగా పాల్గొని ప్రసంగించారు. ఈ సందర్భంగా దేశంలోని ప్రతీ ఒక్క పౌరుడికి రాజ్యాంగం కల్పించిన ఓటు హక్కు ప్రాముఖ్యతను ఆయన గుర్తుచేశారు. ఓటు హక్కు కలిగినవారు, లేనివారు అంటూ పౌరులను రెండు వేర్వేరు వర్గాలుగా విభజించే చర్యను రాజ్యాంగ స్ఫూర్తి ఎట్టి పరిస్థితుల్లోనూ అంగీకరించబోదని ఆయన స్పష్టం చేశారు.

Justice Ujjal Bhuyan: ప్రాథమిక హక్కుల ఉల్లంఘనే

భారీ సంఖ్యలో పౌరుల పేర్లను ఓటర్ల జాబితా నుంచి తొలగించడం అనేది రాజ్యాంగంలోని 14వ అధికరణం ప్రసాదించిన సమానత్వ హక్కును, అలాగే 326వ అధికరణం నిర్దేశించిన సార్వత్రిక వయోజన ఓటు హక్కును ప్రత్యక్షంగా ఉల్లంఘించడమేనని జస్టిస్ భుయాన్ పేర్కొన్నారు. రాజ్యాంగ చట్టాలకంటే ఎవరూ అతీతులు కారని, పౌరుల హక్కులను హరించే ఇటువంటి చర్యలను ఏ అధికార సంస్థ చేపట్టినా లేదా ఏ న్యాయస్థానం సమర్థించినా అది చెల్లదని ఆయన పేర్కొన్నారు.

శరీరం నుంచి ఆత్మను వేరు చేసినట్టే

ఓటు హక్కు అనేది మన స్వాతంత్య్ర సంగ్రామ చరిత్రతో ముడిపడి ఉన్న అత్యున్నత హక్కు అని, ఇది రాజ్యాంగ మౌలిక స్వరూపంలో అంతర్భాగమని ఆయన అభివర్ణించారు. మరణించిన వ్యక్తుల పేర్లు మినహా, ఇతరుల పేర్లను తొలగించే ముందు సంబంధిత ఓటరుకు కచ్చితంగా నోటీసు ఇచ్చి వారి వాదన వినే అవకాశం కల్పించాలని స్పష్టం చేశారు. పౌరసత్వం నుంచి ఓటు హక్కును వేరు చేయడం అనేది అచ్చం మనిషి శరీరం నుంచి ఆత్మను వేరు చేసినట్లేనని ఆయన తీవ్రంగా వ్యాఖ్యానించారు.

ఎస్‌ఐఆర్ వివాదం నేపథ్యంలో ప్రాధాన్యం సంతరించుకున్న వ్యాఖ్యలు

ప్రస్తుతం ఎన్నికల సంఘం చేపట్టిన ఓటర్ల జాబితా ప్రత్యేక సమగ్ర సవరణ (SIR) ప్రక్రియలో భారీ సంఖ్యలో ఓట్లు తొలగిపోతున్నాయనే ఆరోపణలు, వివాదాలు కొనసాగుతున్న తరుణంలో జస్టిస్ ఉజ్జల్ భుయాన్ చేసిన ఈ వ్యాఖ్యలు దేశవ్యాప్తంగా అత్యంత ప్రాధాన్యతను సంతరించుకున్నాయి. ప్రస్తుతం ఈ అంశానికి సంబంధించిన పలు పిటిషన్లు సర్వోన్నత న్యాయస్థానం విచారణలో ఉండటం గమనార్హం.