Meta : మెటాకు మరో షాక్.. కేంద్రం నోటీసులు?

Meta : ప్రముఖ సామాజిక మాధ్యమ దిగ్గజం ‘మెటా’ (Meta) సంస్థకు కేంద్ర ప్రభుత్వం మరో గట్టి షాక్ ఇచ్చేందుకు సిద్ధమైంది. ఇప్పటికే వాట్సాప్ నిబంధనల విషయంలో పలు వివాదాలు ఎదుర్కొంటున్న ఈ మాతృ సంస్థ, ఇప్పుడు ఇన్‌స్టాగ్రామ్ (Instagram) వేదికగా జరుగుతున్న తీవ్రమైన ఉల్లంఘనలపై చిక్కుల్లో పడింది. ఇన్‌స్టాగ్రామ్‌లో చిన్నారులపై లైంగిక వేధింపులను ప్రోత్సహించే విధంగా ఉన్న కంటెంట్, దానికి సంబంధించిన ప్రకటనలు (Ads) దర్శనమివ్వడంపై కేంద్ర ఐటీ మంత్రిత్వ శాఖ అత్యంత తీవ్రంగా స్పందించింది. ఇటువంటి అసాంఘిక, అక్రమ కంటెంట్‌ను ప్రమోట్ చేసే యాడ్స్ అసలు మీ ప్లాట్‌ఫారమ్‌పైకి ఎలా వచ్చాయో తక్షణమే వివరణ ఇవ్వాలని మెటా సంస్థకు నోటీసులు జారీ చేయాలని కేంద్ర సమాచార సాంకేతిక (IT) శాఖ మంత్రి అశ్వినీ వైష్ణవ్ అధికారులను ఆదేశించినట్లు ప్రభుత్వ నమ్మకమైన వర్గాలు వెల్లడించాయి.

Google cloud platform capacity limit meta ai tokens usage reduction

అడ్డుకునేందుకు తీసుకున్న చర్యలేమిటి?

డిజిటల్ ప్లాట్‌ఫారమ్‌లలో చిన్నారుల భద్రతకు అత్యంత ప్రాధాన్యత ఇస్తున్న కేంద్ర ప్రభుత్వం, ఈ విషయాన్ని చాలా సీరియస్‌గా పరిగణిస్తోంది. ఇన్‌స్టాగ్రామ్ లాంటి ప్రపంచస్థాయి పాపులర్ యాప్‌లలో ఇటువంటి అశ్లీల, వేధింపుల కంటెంట్‌ను పర్యవేక్షించడంలో మెటా యాజమాన్యం ఎందుకు విఫలమైందనే కోణంలో కేంద్రం ప్రశ్నించనుంది. భవిష్యత్తులో ఇలాంటి కంటెంట్‌ను పూర్తిగా అడ్డుకునేందుకు, తక్షణమే వాటిని తొలగించేందుకు మీ వద్ద ఉన్న సాంకేతిక వ్యవస్థలు ఏమిటి, ప్రస్తుతం తీసుకుంటున్న కఠిన చర్యలు ఏంటో స్పష్టం చేయాలని నోటీసుల ద్వారా డిమాండ్ చేయనున్నట్లు సమాచారం. ఒకవేళ మెటా సంస్థ ఇచ్చే వివరణ సంతృప్తికరంగా లేకపోతే, దేశంలోని ఐటీ చట్టాల ప్రకారం సంస్థపై మరిన్ని కఠిన చట్టపరమైన చర్యలు తీసుకునే అవకాశం ఉందని నిపుణులు భావిస్తున్నారు.