తమిళనాడు రాజకీయాల్లో మరో సంచలనానికి తెరలేవబోతోంది. దివంగత ముఖ్యమంత్రి జయలలిత నెచ్చెలి, ఏఐఏడీఎంకే (AIADMK) మాజీ తాత్కాలిక ప్రధాన కార్యదర్శి వీకే శశికళ మళ్లీ రాజకీయాల్లో యాక్టివ్ అయ్యేందుకు సిద్ధమయ్యారు. గత కొంతకాలంగా మౌనంగా ఉన్న ఆమె, ఇప్పుడు సొంతంగా ఒక కొత్త రాజకీయ పార్టీని స్థాపించే దిశగా అడుగులు వేస్తున్నట్లు సంకేతాలిచ్చారు. జయలలిత జయంతి రోజైన ఫిబ్రవరి 24న తన కొత్త పార్టీ పేరును, జెండాను మరియు విధివిధానాలను అధికారికంగా ప్రకటించే అవకాశం ఉందని ఆమె సన్నిహిత వర్గాలు వెల్లడిస్తున్నాయి.
GHMC Triple : ట్రిపుల్ ఐటీ జంక్షన్ ట్రాఫిక్కు చెక్, భారీ ప్రాజెక్ట్!
ఈ ప్రకటన వెనుక బలమైన రాజకీయ వ్యూహం కనిపిస్తోంది. తమిళనాడులో వచ్చే ఏప్రిల్ లేదా మే నెలల్లో అసెంబ్లీ ఎన్నికలు జరగనున్నాయి. ఈ తరుణంలో శశికళ పార్టీ పెడితే అది రాష్ట్ర రాజకీయ ముఖచిత్రాన్ని మార్చే అవకాశం ఉంది. ముఖ్యంగా ఏఐఏడీఎంకే ఓటు బ్యాంకును చీల్చడం ద్వారా ఆమె తన ఉనికిని చాటుకోవాలని భావిస్తున్నారు. జయలలిత వారసురాలిగా తనను తాను ప్రొజెక్ట్ చేసుకుంటూ, “అమ్మ” ఆశయాల సాధన కోసమే ఈ పార్టీని పెడుతున్నట్లు ప్రజల్లోకి తీసుకెళ్లడం ఆమె ప్రధాన ఉద్దేశంగా కనిపిస్తోంది.
అయితే, ఎన్నికల బరిలో శశికళ ఎలాంటి వ్యూహాన్ని అనుసరిస్తారనేది ఇప్పుడు ఆసక్తికరంగా మారింది. ఆమె ఒంటరిగా పోటీ చేస్తారా లేక తన మేనల్లుడు దినకరన్ నేతృత్వంలోని ఏఎంఎంకే (AMMK) తో కలిసి ముందుకు సాగుతారా అన్నది తేలాల్సి ఉంది. ఒకవేళ ఆమె పార్టీ క్షేత్రస్థాయిలో పుంజుకుంటే, అది అటు డీఎంకే (DMK) కూటమికి లాభం చేకూరుస్తుందా లేదా ఏఐఏడీఎంకే-బీజేపీ కూటమికి నష్టం కలిగిస్తుందా అన్న సమీకరణాలపై రాజకీయ విశ్లేషకులు చర్చలు జరుపుతున్నారు. తమిళనాడు ఓటర్లు ‘చిన్నమ్మ’ రాజకీయ పునరాగమనాన్ని ఏ మేరకు ఆదరిస్తారో వేచి చూడాలి.
Read hindi news: hindi.vaartha.com
Read Also Epaper : epaper.vaartha.com
