సినిమా వేడుకల్లో హీరోయిన్ల వస్త్రధారణపై నటుడు శివాజీ చేసిన వ్యాఖ్యలు రాష్ట్రవ్యాప్తంగా పెను దుమారం రేపాయి. ఈ వివాదం నేపథ్యంలో తెలంగాణ మహిళా కమిషన్ నోటీసులు జారీ చేయడంతో, శనివారం ఆయన కమిషన్ ముందు హాజరై తన వివరణ ఇచ్చారు.
‘దండోరా’ చిత్ర ప్రీ-రిలీజ్ ఈవెంట్లో హీరోయిన్ల డ్రెస్సింగ్ సెన్స్పై శివాజీ చేసిన వ్యాఖ్యలు మహిళా లోకాన్ని కించపరిచేలా ఉన్నాయని ఆరోపణలు వచ్చాయి. దీనిపై విచారణ చేపట్టిన తెలంగాణ మహిళా కమిషన్ ఛైర్ పర్సన్ నేరెళ్ల శారద ముందు శివాజీ హాజరయ్యారు. కమిషన్ అడిగిన ప్రశ్నలకు సమాధానమిస్తూ, తన వ్యాఖ్యల వెనుక ఎవరినీ నొప్పించాలనే ఉద్దేశం లేదని ఆయన స్పష్టం చేశారు. ఒకవేళ తన మాటలు ఎవరినైనా బాధించి ఉంటే, ఆ వ్యాఖ్యలను బేషరతుగా వెనక్కి తీసుకుంటున్నట్లు ప్రకటించారు. ఆడపిల్లలకు తండ్రిలాగా హితవు చెప్పాలని మాత్రమే తాను భావించానని, కానీ అది వివాదానికి దారితీయడం దురదృష్టకరమని ఆయన పేర్కొన్నారు.
మహిళా కమిషన్ కార్యాలయం వెలుపల మీడియాతో మాట్లాడిన శివాజీ, తనపై పెద్ద ఎత్తున కుట్ర జరుగుతోందని సంచలన ఆరోపణలు చేశారు. తనకెంతో సన్నిహితంగా ఉండేవారే జూమ్ మీటింగ్లు పెట్టుకుని మరీ తనను టార్గెట్ చేశారని ఆవేదన వ్యక్తం చేశారు. గతంలో ఎంతోమంది ఇలాంటి వ్యాఖ్యలు చేసినా పట్టించుకోని వారు, ఇప్పుడు తనను కావాలనే బలిపశువును చేస్తున్నారని ఆయన ఆరోపించారు. ఈ విషయంలో సోషల్ మీడియాలో భిన్నాభిప్రాయాలు వ్యక్తమవుతున్నాయి. ఒకవైపు ఆయనకు మద్దతు పెరుగుతుండగా, మరోవైపు గాయని చిన్మయి, యాంకర్ అనసూయ వంటి వారు ఆయన ధోరణిని తప్పుబట్టారు. వీరికి మద్దతుగా నటులు నాగబాబు, ప్రకాష్ రాజ్ నిలవడంతో ఈ వివాదం వ్యక్తిగత విమర్శల స్థాయికి చేరింది.
Congress CWC meeting : కాంగ్రెస్ CWC కీలక సమావేశం ఖర్గే అధ్యక్షతన హై లెవల్ చర్చలు
ఈ వివాదం నుంచి తాను ఒక ముఖ్యమైన పాఠాన్ని నేర్చుకున్నట్లు శివాజీ తెలిపారు. “మంచి చెప్పడం కూడా తప్పే అని నాకు అర్థమైంది, ఇకపై ఎవరికీ అనవసరంగా సలహాలు ఇవ్వను” అని ఆయన విరాగంతో వ్యాఖ్యానించారు. భారతీయ కుటుంబ వ్యవస్థపై గౌరవంతోనే తాను మాట్లాడానని, ఎవరి వ్యక్తిగత స్వేచ్ఛను హరించాలని చూడలేదని చెప్పారు. ఒకవేళ సినిమాల్లో అవకాశాలు రాకపోయినా తన సొంత ఊరికి వెళ్లి వ్యవసాయం చేసుకుని బతుకుతానని, కానీ తన ఆత్మగౌరవాన్ని వదులుకోనని అన్నారు. ఈ విషయాన్ని ఇక్కడితో వదిలేయాలని, అందరి అభిప్రాయాలను గౌరవించడమే ప్రజాస్వామ్యమని పేర్కొంటూ ఆయన తన ప్రసంగాన్ని ముగించారు.
