మేషరాశి వారికి ఈ సంవత్సరం తృతీయం, చతుర్ధం, పంచమంలో గురువు, పంచమం, చతుర్దంలో కేతువు, లాభం, దశమంలో రాహువు, వ్యయంలో శనీశ్వరుడు గ్రహాల సంచారం గలదు. శని గ్రహ స్థానాన్ని, గురుగ్రహ స్థానాన్ని పరిశీలించుకుని తగిన శాంతి క్రతువులు జరిపించండి. సత్ఫలితాలు పొందుతారు. ఈ రాశిలో జన్మించిన వారు మన్యు పాశుపత హోమం జరిపించండి. చేతికి కుబేర కంకణం ధరించండి. వృత్తి, ఉద్యోగ, వ్యాపారాలలో మంచి ఫలితాలను అందుకుంటారు. ఎంతో కష్టపడి శ్రమిస్తే గాని మీ ఆశించిన టార్గెట్స్‌ను రీచ్ కాలేరు. కానీ మీ జీవితం చూసిన వారికి పూలబాటలాగా అనిపిస్తుంది. మీరు అక్కర్లేనంత శ్రమ పడుతూ ఆందోళన చెందే పరిస్థితులు ఉంటాయి.

వ్యాపారంలో సమస్యలను ఎదుర్కొని ఎన్నో అవరోధాలను దాటుకొని వ్యాపారాన్ని నిలబెట్టుకుంటారు. మంచి ప్రణాళికలు, స్నేహితుల సహాయంతో మార్పును సాధిస్తారు. వస్తున్న ఆదాయం సరిపోక కొత్త రుణాలపై ఆలోచిస్తారు. సహోదర సహోదరీ వర్గంతో కొంతకాలం విభేదాలు ఉండవచ్చు. వస్త్ర వ్యాపారస్తులకు పెట్టుబడులు వృథా అయిన భావన కలుగుతుంది. మీ పేరు లేదా జీవిత భాగస్వామి పేరుమీద కొత్త స్థలం లేదా పొలం కొనాలనే ఆలోచన పెరుగుతుంది. ఆధ్యాత్మిక చింతన పెరిగి దేవాలయ దర్శనాలు చేస్తారు. వ్యాపార విస్తరణ కోసం కొత్త పరికరాలు కొనుగోలు చేస్తారు. కుటుంబ అభివృద్ధి సాధించి సంతానం భవిష్యత్తు కోసం మంచి ప్రణాళికలు రూపొందిస్తారు.

కొన్ని సందర్భాల్లో ఇతరులు ఇచ్చే సలహాలు నచ్చకపోయినా తిరస్కరించలేక పాటిస్తున్నట్టు ప్రవర్తిస్తారు. గృహ నిర్మాణ పనులు ఆలస్యమై ఆర్థిక భారం పెరుగుతుంది. తరచూ తాత్కాలిక ప్రయాణాలు చేయాల్సి వచ్చి మంచి ఫలితాలు పొందుతారు. మెడికల్ ఫీల్డ్ మరియు మెడికల్ ఏజెన్సీలు నడిపేవారికి అనుకూల కాలం ఉంటుంది. రెన్యూవల్స్ సమయంలో కొంత ఇబ్బంది వచ్చినా తెలిసిన వారి సహాయంతో ప్రయత్నిస్తే విజయాలు సాధిస్తారు. వ్యాపార వ్యూహాలను మార్చుకుంటూ కొత్త కస్టమర్లను ఆకర్షిస్తారు. సోషల్ మీడియాను ఉపయోగించి వ్యాపార విస్తరణకు శ్రమిస్తారు. కొన్ని సందర్భాల్లో స్త్రీలతో విభేదాలు కలిగి ఇబ్బందులు ఎదురవుతాయి కానీ సరైన సమయానికి చేపట్టిన పనులు కలిసి వస్తాయి.