వ్యక్తిగత నమ్మకాలు కాదు.. ప్రజల విశ్వాసాలే రాజకీయాలకు ఆధారం..!
ఈ రోజుల్లో రాజకీయాలు వ్యక్తిగత నమ్మకాలతో సాగడం లేదు. ఒక రాజకీయ నాయకుడిగా సమాజంలోని విశ్వాసాలు, సెంటిమెంట్స్ను గౌరవించడం అత్యవసరం అయిపోయింది. దేవుడిని నమ్మడం, నమ్మకపోవడం అన్నది ఒక వ్యక్తిగత విషయం అయినా, ఇప్పుడు ప్రజా జీవితానికి, రాజకీయానికి అది అనివార్యంగా మారింది. ఇది తాజాగా బీఆర్ఎస్ వర్కింగ్ ప్రెసిడెంట్ కేటీఆర్ రాజన్న సిరిసిల్ల జిల్లాలో నిర్వహించిన ఆధ్యాత్మిక కార్యక్రమాల నేపథ్యంలో స్పష్టంగా కనిపిస్తోంది. హనుమాన్ దీక్ష పట్టుకున్న భక్తులతో కలిసి ఆయన భిక్షలో పాల్గొనడం, వారితో సహపంక్తి భోజనం చేయడం రాజకీయాల్లో కొత్త చర్చలకు దారితీసింది.
కేటీఆర్ హనుమాన్ దీక్ష భక్తులకు స్వయంగా ఆహ్వానం అందించి కార్యక్రమం నిర్వహించడం వెనుక రాజకీయ పునాది ఉందని ప్రతిపక్ష పార్టీలు ఆరోపిస్తున్నాయి. దీనిని భారతీయ జనతా పార్టీ ఓ అవకాశంగా మలచుకుంది. సోషల్ మీడియా వేదికగా కేటీఆర్పై ట్రోలింగ్ ప్రారంభించింది. గతంలో జై శ్రీరామ్ నినాదం కడుపు నింపదన్న ఆయన వ్యాఖ్యలను గుర్తుచేస్తూ, పిల్లలు జై శ్రీరామ్ అంటే వారిని ఎలా నమ్మాలి అనే విధంగా మీమ్స్ తయారు చేసి విస్తృతంగా ప్రచారం చేస్తోంది. ఇది కేవలం వ్యక్తిగత నమ్మకాల విషయంలో తలెత్తిన వివాదం కాదు, హిందుత్వ రాజకీయాలకు సంబంధించిన కీలక దిశగా చూస్తున్నారు విశ్లేషకులు.
హనుమాన్ భక్తుల చుట్టూ తిరుగుతున్న నాయకులు
తెలంగాణలో ఉత్తర భాగాల్లో హనుమాన్ భక్తులకు ఎంతో ఆదరణ ఉంది. ప్రతి గ్రామంలో హనుమాన్ దీక్షాపరులు ఉండడం, భక్తిగా మాల వేసుకునే వారి సంఖ్య అధికంగా ఉండటం చూసిన ప్రతీ రాజకీయ పార్టీ ఆ వర్గాన్ని ఆకర్షించేందుకు ప్రయత్నిస్తోంది. బీజేపీ తరఫున బండి సంజయ్, ధర్మపురి అరవింద్ వంటి నేతలు ఈ హిందూత్వ వేదికను బలంగా వినియోగిస్తున్నారు. గతంలో బీఆర్ఎస్కు ఈ ప్రాంతంలో బలమైన ఆధిక్యం ఉన్నప్పటికీ, 2024 లోక్సభ ఎన్నికల్లో బీజేపీ పైచేయిగా నిలిచింది.
ఈ పరిస్థితుల్లోనే కేటీఆర్ హనుమాన్ దీక్షాపరుల కార్యక్రమంలో పాల్గొనడం అనేక రాజకీయ వ్యాఖ్యానాలకు తావిస్తుంది. ప్రజల మధ్య దేవుడిపైన ఉన్న నమ్మకాన్ని అర్థం చేసుకుని, ఆ సెంటిమెంట్లను గౌరవించడం రాజకీయ నాయకుడిగా ఆయన బాధ్యతగా భావించారన్న అభిప్రాయం ఉంది. అయితే ఇది ఆయన మారిన అభిప్రాయమా? లేక ప్రజాభిప్రాయాన్ని మళ్లించేందుకు చేసిన వ్యూహమా? అన్నదానిపై ప్రశ్నలు తలెత్తుతున్నాయి.
భవిష్యత్ రాజకీయాలే హిందూత్వ దిశగా మారతాయా?
ఇప్పటికే దేశవ్యాప్తంగా హిందూత్వ రాజకీయాలు పెరిగిపోతున్న తరుణంలో, తెలంగాణలో కూడా అదే బాటలో ముందుకు సాగాలా అనే చర్చ బీఆర్ఎస్ పార్టీ లోపలే జరుగుతోంది. జై శ్రీరామ్, జై హనుమాన్ అనే నినాదాలు ప్రజలతో సన్నిహితంగా ఉండటానికి అవసరమా? లేక నిజమైన ప్రజాస్వామిక విలువలకు వ్యతిరేకమా? అనే అంశాల మధ్య తారతమ్యాన్ని ప్రజలు స్పష్టంగా తెలుసుకునే రోజులు దగ్గరలోనే ఉన్నాయి. ప్రస్తుతం ఎన్నికలు లేకున్నా, దేవుడిపైన నమ్మకం చుట్టూ రాజకీయంగా పరిస్థితులు మారుతున్నాయి. ఇది రాజకీయాల్లోని భావోద్వేగాలతో కూడిన చురుకు ప్రయత్నాలకు సంకేతం.
READ ALSO: Hanuman Jayanti : నేడు గ్రేటర్ హైదరాబాద్ లో ట్రాఫిక్ ఆంక్షలు
