Jitender Reddy: కాన్‌స్టిట్యూషన్‌ క్లబ్ కోశాధికారిగా మాజీ ఎంపీ

తెలంగాణ రాష్ట్రానికి చెందిన సీనియర్ రాజకీయ నాయకుడు, మహబూబ్‌నగర్ మాజీ ఎంపీ, ప్రస్తుత తెలంగాణ ప్రభుత్వ సలహాదారు ఏపీ జితేందర్ రెడ్డి మరో కీలక పదవికి ఎంపికయ్యారు. దేశ రాజధానిలోని ప్రతిష్టాత్మక కాన్‌స్టిట్యూషన్ క్లబ్ కోశాధికారిగా ఆయన ఏకగ్రీవంగా ఎన్నిక కావడం గర్వించదగ్గ అంశంగా మారింది.ఈ మేరకు ఎన్నికల అధికారి శుక్రవారం అధికారిక ప్రకటన విడుదల చేశారు. ఈ కీలక పదవిలో జితేందర్‌రెడ్డి (Jitender Reddy) ఐదేళ్లపాటు కొనసాగనున్నారు. 1947లో భారత రాజ్యాంగ సభ సభ్యులచే ఏర్పాటు చేయబడిన ఈ క్లబ్, ప్రస్తుతం పార్లమెంటు ఉభయ సభలకు ప్రాతినిధ్యం వహిస్తున్న ఎంపీలు, మాజీ ఎంపీలు సమావేశాలు, చర్చలు నిర్వహించుకోవడానికి ఒక ముఖ్యమైన వేదికగా ఉపయోగపడుతుంది. ఈ సంస్థకు లోక్‌సభ స్పీకర్ ఓంబిర్లా అధ్యక్షుడిగా, రాజ్యసభ డిప్యూటీ ఛైర్మన్ హరివంశ్ ప్రధాన కార్యదర్శిగా, కేంద్ర పట్టణాభివృద్ధిశాఖ మంత్రి మనోహర్‌లాల్ వైస్‌ ప్రెసిడెంట్‌గా వ్యవహరిస్తున్నారు.

సార్వత్రిక ఎన్నికల్లో

ఇటువంటి ప్రతిష్టాత్మక సంస్థలో కోశాధికారిగా జితేందర్‌రెడ్డి ఎన్నిక కావడం ఆయన రాజకీయ ప్రస్థానంలో ఒక మైలురాయిగా చెప్పవచ్చు. ఏపీ జితేందర్‌రెడ్డి సుదీర్ఘకాలంగా రాజకీయాల్లో ఉన్నారు. వివిధ హోదాల్లో ప్రజలకు సేవలందించారు. ఆయన తెలుగుదేశం పార్టీ (టీడీపీ) ద్వారా రాజకీయాల్లోకి ప్రవేశించారు. 1999లో మహబూబ్‌నగర్ (Mahabubnagar) లోక్‌సభ నియోజకవర్గం నుంచి టీడీపీ తరఫున ఎంపీగా గెలిచి పార్లమెంటులో అడుగుపెట్టారు. ఆ సమయంలో ఉమ్మడి ఆంధ్రప్రదేశ్‌లో ఆయన చురుకైన పాత్ర పోషించారు. తెలంగాణ రాష్ట్ర ఏర్పాటు ఉద్యమం ఉధృతమయ్యాక, జితేందర్‌రెడ్డి తెలంగాణ రాష్ట్ర సమితి (ప్రస్తుత బీఆర్‌ఎస్‌)లో చేరారు. తెలంగాణ వాదానికి మద్దతుగా నిలిచారు. 2014లో తెలంగాణ రాష్ట్రం ఏర్పడిన తర్వాత జరిగిన సార్వత్రిక ఎన్నికల్లో మహబూబ్‌నగర్ నుంచి టీఆర్‌ఎస్‌ అభ్యర్థిగా పోటీ చేసి మరోసారి ఎంపీగా విజయం సాధించారు.

బాధ్యతలు

పార్లమెంటులో తెలంగాణ ప్రయోజనాల కోసం గట్టిగా తన వాదనను వినిపించారు.2019 ఎన్నికల తర్వాత ప్రత్యక్ష రాజకీయాల నుంచి కాస్త పక్కకు జరిగినా ఆయనకు అప్పటి ముఖ్యమంత్రి కేసీఆర్ ప్రభుత్వ సలహాదారుగా బాధ్యతలు అప్పగించారు. ఈ పదవిలో ఉంటూ రాష్ట్ర ప్రభుత్వానికి విలువైన సలహాలు, సూచనలు అందించారు. అనంతరం బీజేపీలో చేరారు. ఆ పార్టీలో చురుగ్గా వ్యవహరించారు. అనంతరం తెలంగాణలో అసెంబ్లీ ఎన్నికల తర్వాత ఆయన కాంగ్రెస్ పార్టీలో చేరారు. ప్రస్తుతం కాంగ్రెస్ (Congress) ప్రభుత్వం ఆయన్ను తెలంగాణ ప్రభుత్వ సలహాదారుగా నియమించింది. ఆ పదవిలో కొనసాగుతూనే తాజాగా,కాన్‌స్టిట్యూషన్‌ క్లబ్‌ కోశాధికారిగా ఎన్నికయ్యారు.

ఏపీ జితేందర్ రెడ్డి ఎవరు?

ఏపీ జితేందర్ రెడ్డి ఒక ప్రముఖ రాజకీయ నాయకుడు. ఆయన మహబూబ్‌నగర్ పార్లమెంటు నియోజకవర్గం నుంచి మాజీ లోక్‌సభ సభ్యుడు. ప్రస్తుతం ఆయన తెలంగాణ రాష్ట్ర ప్రభుత్వానికి పాలన సలహాదారుగా ఉన్నారు.