దేశవ్యాప్తంగా ఉన్న ఎన్ఐటీల్లో 2025-26 విద్యా సంవత్సరానికి బీటెక్, బీఆర్క్ కోర్సుల సీట్ల భర్తీ కోసం నిర్వహించిన జేఈఈ మెయిన్ 2025 సెషన్ 2 తుది ఫలితాలు నేడు (ఏప్రిల్ 17) విడుదల కానున్నాయి. ఈ ఫలితాలను నేషనల్ టెస్టింగ్ ఏజెన్సీ (NTA) అధికారికంగా ప్రకటించనుంది.
జేఈఈ మెయిన్ పరీక్షలు ఈసారి రెండు విడతలుగా నిర్వహించబడ్డాయి. ఈ ఏడాది జనవరిలో జేఈఈ మెయిన్ తొలి విడత పరీక్షలు జరుగగా ఏప్రిల్ 2 నుంచి 9వ తేదీ వరకు తుది విడత పరీక్షలు జరిగాయి. ఏప్రిల్ 2, 3, 4, 7, 8 తేదీల్లో పేపర్-1 (బీఈ/ బీటెక్) పరీక్షలు, ఏప్రిల్ 9వ తేదీన పేపర్-2ఏ, 2బీ (బీఆర్క్/బీ ప్లానింగ్) ప్రవేశ పరీక్షలు జరిగాయి. అయితే ఈ రెండు విడతల పరీక్షల్లోని ఉత్తమ స్కోర్ను పరిగణనలోకి తీసుకొని విద్యార్ధులకు ర్యాంకులు కేటాయిస్తారు.
ఫైనల్ ఆన్సర్ కీ & ర్యాంకులు
జేఈఈ మెయిన్ 2025 తుది ఆన్సర్ కీపై అభ్యంతరాల సమర్పణ గడువు ఏప్రిల్ 13 (ఆదివారం) అర్ధరాత్రితో ముగిసింది. ఆ అభ్యంతరాలను నిపుణుల కమిటీ పరిశీలించి, తుది ఆన్సర్ కీతో పాటు ర్యాంకులను ఈ రోజు విడుదల చేయనున్నారు. కేటగిరీల వారీగా కటాఫ్ స్కోర్ నిర్ణయించి ర్యాంకులు ప్రకటిస్తారు. జనరల్ కేటగిరీకి 93% – 95% , ఓబీసీ, ఈడబ్ల్యూఎస్ కేటగిరీలకు 91% – 93%, ఎస్సీ కేటగిరీకి 82% – 86%, ఎస్టీ కేటగిరీకి 73% – 80% వరకు ఉండే అవకాశం ఉన్నట్లు నిపుణులు అభిప్రాయపడుతున్నారు. ఈ రోజు విడుదలయ్యే ఫలితాలతో పాటు, జేఈఈ అడ్వాన్స్డ్ 2025 రాసేందుకు అర్హులైన అభ్యర్థుల జాబితాను కూడా ప్రకటిస్తారు. ఉత్తమ స్కోర్ సాధించిన టాప్ 2.50 లక్షల మంది విద్యార్థులు మాత్రమే మే 18వ తేదీన జరగనున్న జేఈఈ అడ్వాన్స్డ్ పరీక్షకు అర్హులవుతారు.
Read also: Pareeksha :మూల్యాంకనంలో లోపాలు విద్యార్థుల భవిష్యత్తుకు ప్రమాదం
