అమెరికాలో ట్రంప్ గెలుపుకు విశేష కృషి చేసిన ఎలాన్ మస్క్కు విపరీతమైన పేరు వచ్చింది. సోషల్ మీడియాలో రోజూ ఒక న్యూస్ ఆయన గురించి వస్తూనే ఉంటుంది. తాజాగా స్పేస్ ఎక్స్, టెస్లా సీఈవో ఎలాన్ మస్క్ తన పేరును మార్చుకున్నారు. తన సొంత సోషల్ మీడియా ప్లాట్ఫామ్ ఎక్స్ (ట్విట్టర్)లో తన పేరును మస్క్కు బదులుగా ‘కేకియస్ మాక్సిమస్’గా మార్చుకున్నారు. ఇది చూసిన నెటిజన్లు ఆ పేరుకు అర్థం ఏంటా…? అని వెతికే పనిలో పడ్డారు.
అలాగే తన ప్రొఫైల్ పిక్ను కూడా మార్చేశారాయన. ‘పెపే ది ఫ్రాగ్’ మీమ్ను తన ప్రొఫైల్ పిక్గా పెట్టుకున్నారు. అయితే, కేకియస్ అనేది ఓ క్రిప్టో కరెన్సీ టోకెన్. పలు బ్లాక్ చెయిన్ ప్లాట్ఫామ్స్లో అందుబాటులో ఉంది. ఇది ఇటీవల క్రిప్టోకరెన్సీ మార్కెట్లో పెట్టుబడిదారులు, ఔత్సాహికుల దృష్టిని బాగా ఆకర్షించింది. డిసెంబర్ 27 నాటికి కేకియస్ దాదాపు 0.005667 డాలర్ల వద్ద అమ్ముడవుతుండగా.. 24 గంటల్లోనే ఏకంగా 497.56 శాతం పెరుగుదలను నమోదు చేసింది.
ఇదిలాఉంటే.. ఎలాన్ మస్క్ ఇటీవలే ఓ అరుదైన రికార్డు సృష్టించిన సంగతి తెలిసిందే. ఆయన వ్యక్తిగత సంపద ఏకంగా 400 బిలియన్ డాలర్ల మార్కును దాటేసింది. ఇప్పటిదాకా ఈ మైలురాయిని ఎవరూ అధిగమించలేదు.
