యునైటెడ్ కింగ్డమ్ (UK) లో భారత సంతతికి చెందిన ప్రజలపై జరుగుతున్న జాత్యాహంకార దాడులు తాజాగా మరోసారి కలకలం రేపుతున్నాయి. ఒల్డ్బరీ పట్టణంలో చోటుచేసుకున్న ఈ దారుణ ఘటన, అక్కడి సిక్కు సమాజాన్ని తీవ్రంగా కలచివేసింది.
దారుణం ఎలా జరిగింది?
ఈ అమానుష ఘటన సెప్టెంబర్ నెలలోని ఒక మంగళవారం ఉదయం 8:30 గంటల ప్రాంతంలో, టేమ్ రోడ్ సమీపంలో చోటుచేసుకుంది. 20 ఏళ్ల సిక్కు యువతి, ఒంటరిగా వెళ్తుండగా, ఇద్దరు వ్యక్తులు ఆమెపై లైంగిక దాడికి పాల్పడ్డారు. దాడితో సరిపోక, ఆమెపై జాత్యాహంకార వ్యాఖ్యలు చేశారు.
“నీ దేశానికి వెళ్లిపో” — కించపరిచిన దాడిదారులు
దుండగులు బాధితురాలిని మానసికంగా క్షోభకు గురిచేస్తూ, “మీ దేశానికి తిరిగి వెళ్లిపో” అంటూ వాదించారు. ఇది జాతివివక్షతో కూడిన అగ్రహోదర దాడిగా పోలీసులు పేర్కొన్నారు. బాధితురాలి ఫిర్యాదు మేరకు కేసు నమోదు చేసి, విచారణ చేపట్టారు.
నిందితుల గాలింపు కొనసాగుతోంది
బాధితురాలు తెలిపిన వివరాల ప్రకారం, ఇద్దరూ శ్వేతజాతికి చెందినవారని, ఒకరు గుండుతో, ముదురు రంగు స్వెట్షర్ట్ ధరించాడని, మరొకరు బూడిద రంగు టాప్ వేసుకున్నాడని వెల్లడించింది. పోలీసులు సీసీటీవీ ఫుటేజ్, ఫోరెన్సిక్ ఆధారాలతో నిందితుల వివరాలను సేకరిస్తున్నారు. ప్రజల సహకారంతో వీరిని త్వరలోనే పట్టుకుంటామంటూ ఆశాభావం వ్యక్తం చేశారు.
సిక్కు సమాజంలో తీవ్ర ఆగ్రహం
ఈ సంఘటనపై స్థానిక సిక్కు సంఘాలు తీవ్రంగా స్పందించాయి. తరచూ భారతీయులపై జరుగు ఈ తరహా దాడులు బహుళ సంస్కృతి దేశంగా యూకేకు మచ్చతెచ్చే ఘటనలుగా అభివర్ణించారు. సిక్కులకు భద్రత కల్పించేందుకు బహుళ పోలీసు గస్తీ ఏర్పాటు చేయాలని వారు డిమాండ్ చేస్తున్నారు.
ఎంపీలు తీవ్ర ఖండనలు
ఈ ఘటనపై బ్రిటన్ పార్లమెంటు సభ్యులు తీవ్రంగా స్పందించారు.
ఎంపీ ప్రీత్ కౌర్ గిల్ (MP Preet Kaur Gill)మాట్లాడుతూ:”ఇది అత్యంత హింసాత్మక చర్య. ‘మీరు ఈ దేశానికి చెందిన వారు కాదు’ అని బాధితురాలితో అనడం దారుణం. కానీ ఆమె ఇక్కడికి చెందినవారే. ప్రతీ సమాజానికి సురక్షితంగా, గౌరవంగా జీవించే హక్కు ఉంది” అని పేర్కొన్నారు. మరో ఎంపీ జస్ అత్వాల్ స్పందిస్తూ, “దేశంలో పెరుగుతున్న జాతి వివక్ష ఉద్రిక్తతల ఫలితమే ఈ హేయమైన దాడి. దీనివల్ల ఓ యువతి జీవితాంతం మానసిక క్షోభ అనుభవించాల్సి వస్తోంది” అని ఆవేదన వ్యక్తం చేశారు.
కాగా, నెల రోజుల క్రితం వోల్వర్హాంప్టన్లో ఇద్దరు వృద్ధ సిక్కులపై ముగ్గురు యువకులు దాడి చేసిన ఘటన మరువక ముందే ఈ దారుణం జరగడం గమనార్హం.
Read hindi news: epaper.vaartha.com
Read Also:
