Russia: రష్యాలో మరోసారి భూకంపం

రష్యాలో ఒకవైపు భూకంపం, మరోవైపు అగ్నిపర్వతాల విస్ఫోటనం కల్లోలం రేపుతున్నాయి. ఆదివారం కురిల్ దీవులలో సంభవించిన శక్తివంతమైన భూకంపం, సమీపంలోని కమ్చట్కా ద్వీపకల్పంలో అగ్నిపర్వతాలు ఉవ్వెత్తున ఎగిసిపడటం స్థానిక ప్రజలను తీవ్ర భయాందోళనలకు గురి చేశాయి. ప్రకృతి శక్తి విరుచుకుపడటంతో ఆ ప్రాంతంలో పరిస్థితి ఆందోళనకరంగా మారింది.యునైటెడ్ స్టేట్స్ జియోలాజికల్ సర్వే (USGS), జపాన్ వాతావరణ శాఖ నివేదికల ప్రకారం, రష్యా కురిల్ దీవుల తీరంలో రిక్టర్ స్కేల్‌పై 7.0 తీవ్రతతో భూకంపం నమోదైంది. భూమి గర్భంలో దాదాపు 60 కిలోమీటర్ల లోతులో ఉద్భవించిన ఈ భూకంపం, తీర ప్రాంతాల్లో బలంగా అనిపించింది. భూకంపం ప్రభావంతో భవనాలు కంపించడంతో ప్రజలు భయంతో ఇళ్లను వదిలి బయటకు పరుగులు తీశారు.

అగ్నిపర్వతాలు

భూకంపం తీవ్రత దృష్ట్యా రష్యా (Russia) అత్యవసర సేవల మంత్రిత్వ శాఖ కొన్ని ప్రాంతాల్లో సునామీ ప్రమాదం ఉండొచ్చని హెచ్చరికలు జారీ చేసింది. సముద్ర జలస్థాయిలో స్వల్ప మార్పులు నమోదైనప్పటికీ, ఇప్పటి వరకు పెద్ద సునామీ అలల లక్షణాలు కనిపించలేదని అధికారులు వెల్లడించారు. అయినప్పటికీ తీర ప్రాంత ప్రజలను అప్రమత్తంగా ఉండాలని సూచించారు.ఇప్పటివరకు ప్రాణ, ఆస్తి నష్టానికి సంబంధించిన వివరాలు తెలియరాలేదు.ఇదిలా ఉండగా, కమ్చట్కా ద్వీపకల్పంలో శనివారం అర్ధరాత్రి అగ్నిపర్వతాలు బద్దలయ్యాయి. దాదాపు 600 సంవత్సరాలుగా నిద్రాణంగా ఉన్న క్రాషెన్నినికోవ్ అగ్నిపర్వతం ఒక్కసారిగా విస్ఫోటనం చెందింది. ఈ విస్ఫోటనంతో సుమారు 6,000 మీటర్ల ఎత్తు వరకు బూడిద ఎగసిపడినట్లు రష్యా అధికారులు తెలిపారు. దీనితో పాటు, అత్యంత చురుగ్గా ఉండే క్ల్యూచెస్కీ అగ్నిపర్వతం కూడా బద్దలైనట్లు స్థానిక మీడియా పేర్కొంది.