ప్రతిష్ఠాత్మక మిస్ వరల్డ్ 2025 పోటీలో థాయ్లాండ్కు చెందిన ఓపల్ సుచాత చువాంగ్ విజేతగా నిలిచి, దేశానికి మొట్టమొదటి వరల్డ్ కిరీటాన్ని అందించి చరిత్ర సృష్టించారు. భారత్లోని హైదరాబాద్ నగరంలో జరిగిన ఈ అంతర్జాతీయ స్థాయి అందాల పోటీ, ప్రపంచవ్యాప్తంగా 107 దేశాల నూతన ప్రతినిధులను ఒకే వేదికపైకి తెచ్చింది. అందులో ఓపల్ అద్భుత ప్రతిభ, ఆత్మవిశ్వాసం, సామాజిక దృక్పథంతో విజయం సాధించడం విశేషం.
విజయం వెనుక ఓపల్కి ఉన్న నమ్మకం, లక్ష్యంపై నిలకడ
తన విజయ రహస్యాన్ని వివరిస్తూ, “ఎల్లప్పుడూ మిమ్మల్ని మీరు నమ్మండి. మీ మౌలిక విలువలకు కట్టుబడి ఉండండి. నా లక్ష్యాన్ని పట్టుకుని, నన్ను నేను నమ్ముకున్నందువల్లే ఈరోజు ఇక్కడ ఉన్నాను. ఈ ప్రయాణంలో మిమ్మల్ని మీరు ప్రేమించుకోవడం కూడా మర్చిపోవద్దు” అని సుచాత మీడియాకు వివరించారు. “ఇది ఎప్పుడూ సులువు కాదు, కొన్నిసార్లు అలసటగా, నిరుత్సాహంగా అనిపించవచ్చు. కానీ మీరు ఎప్పుడూ వదిలిపెట్టకపోతే మీరు ఎక్కడ ఉండాలనుకుంటున్నారో అక్కడికి తప్పకుండా చేరుకుంటారు” అని ఆమె తెలిపారు.
థాయ్లాండ్కు తొలి మిస్ వరల్డ్ టైటిల్
ఈ పోటీల ఫైనల్లో ఇథియోపియాకు చెందిన హసెట్ డెరెజీ అడ్మాసు రన్నరప్గా నిలిచారు. కిరీటధారణ వేడుక కోసం సుచాత, ఓపల్ రత్నాల వంటి పూలతో అలంకరించిన తెలుపు రంగు గౌను ధరించారు. ఈ గౌను హీలింగ్, బలానికి ప్రతీకగా నిలిచింది. గత ఏడాది మిస్ వరల్డ్ కిరీటాన్ని గెలుచుకున్న చెక్ రిపబ్లిక్కు చెందిన క్రిస్టినా పిస్కోవా, కొత్త ప్రపంచ సుందరి ఓపల్ సుచాతకు కిరీటాన్ని అలంకరించారు. ప్రపంచవ్యాప్తంగా 107 దేశాల జాతీయ విజేతలను ఓడించి సుచాత ఈ ఘనత సాధించారు. అందాల పోటీల చరిత్రలో థాయ్లాండ్కు ఇదే తొలి మిస్ వరల్డ్ కిరీటం కావడం విశేషం.
ఫైనల్లో పోటీదారులు – భారతదేశం నిరాశ చెందిన రోజు
కాగా, ఈ పోటీల్లో భారత్ ఆశలు త్వరగానే ఆవిరయ్యాయి. భారతదేశానికి ప్రాతినిధ్యం వహించిన నందిని గుప్తా టాప్ 8 ఫైనలిస్టుల జాబితాలో స్థానం దక్కించుకోలేకపోయారు. గత ఏడాది, 28 ఏళ్ల విరామం తర్వాత భారతదేశం (ముంబై)లో జరిగిన 71వ మిస్ వరల్డ్ పోటీల్లో చెక్ రిపబ్లిక్కు చెందిన క్రిస్టినా పిస్కోవా విజేతగా నిలిచిన విషయం తెలిసిందే. ఆ పోటీలో లెబనాన్కు చెందిన యాస్మినా జైటౌన్, ట్రినిడాడ్, టొబాగోకు చెందిన అచె అబ్రహమ్స్, బోట్స్వానాకు చెందిన లెసెగో చోంబోలను క్రిస్టినా ఓడించారు. భారత్ ఇప్పటివరకు ఆరుసార్లు మిస్ వరల్డ్ కిరీటాన్ని గెలుచుకోగా, నటి మానుషి చిల్లర్ చివరిసారిగా భారత్ తరఫున ఈ టైటిల్ను సాధించారు.
Read also: Miss World 2025 : మిస్ వరల్డ్ 2025 విజేతగా థాయ్లాండ్ సుందరీ
