అమెజాన్ వ్యవస్థాపకుడు జెఫ్ బెజోస్ (Jeff Bezos) మాజీ భార్య మెకెంజీ స్కాట్ (MacKenzie Scott ) మరోసారి తన దాతృత్వం ద్వారా ప్రపంచ దృష్టిని ఆకర్షించారు. ఇటీవల ఆమె అమెరికాలోని శాన్ రాఫెల్ ప్రాంతానికి చెందిన ‘10,000 డిగ్రీస్’ అనే విద్యాసంస్థకు 42 మిలియన్ అమెరికన్ డాలర్లు (భారత కరెన్సీ ప్రకారం దాదాపు రూ. 372 కోట్లు) విరాళంగా అందించారు. ఈ సంస్థ ఆర్థికంగా వెనుకబడిన విద్యార్థులకు ఉన్నత విద్యలో ప్రవేశం కల్పించడం, స్కాలర్షిప్లు ఇవ్వడం, కెరీర్ మార్గదర్శనం చేయడం వంటి సేవలు అందిస్తుంది. మెకెంజీ ఇచ్చిన ఈ విరాళం ఆ సంస్థ చరిత్రలోనే అత్యంత పెద్దదిగా నిలిచింది. దీనివల్ల వేలాది మంది విద్యార్థులకు ఉన్నత విద్యలో కొత్త అవకాశాలు లభించనున్నాయి.
Latest News: Archery Premier League: మోదీని కలిసిన రామ్ చరణ్ దంపతులు
మెకెంజీ స్కాట్ తన దాతృత్వానికి పేరొందిన వ్యక్తి. గతంలో ఆమె ‘నేటివ్ ఫార్వర్డ్’ అనే సంస్థకు కూడా 10 మిలియన్ డాలర్లు విరాళమిచ్చారు. ఆ సంస్థ అమెరికాలోని స్థానిక ప్రజల విద్యా అభివృద్ధికి కృషి చేస్తుంది. మెకెంజీ ప్రత్యేకత ఏమిటంటే … ఆమె ఇచ్చే విరాళాలపై ఎలాంటి షరతులు ఉండవు. “ఈ డబ్బును మీరు మీకు అవసరమైన విధంగా వినియోగించుకోండి” అనే పూర్తి స్వేచ్ఛను అందిస్తారు. చాలా మంది బిలియనీర్లు విరాళాలను కేవలం తమ పేరు కోసం ఇస్తే, మెకెంజీ మాత్రం నిస్వార్థంగా, సమాజ అభివృద్ధిని లక్ష్యంగా చేసుకుని దాతృత్వాన్ని కొనసాగిస్తున్నారు.
గత కొన్ని సంవత్సరాలుగా మెకెంజీ స్కాట్ విద్య, మహిళా సాధికారత, సామాజిక సమానత్వం, ఆరోగ్య రంగాల్లో పలు సంస్థలకు వేల కోట్ల రూపాయల విరాళాలు అందించారు. అమెజాన్ షేర్ల విక్రయంతో ఆమెకు వచ్చిన సంపదలో పెద్ద భాగాన్ని సమాజ సేవకు వినియోగించడం ఆమె జీవిత లక్ష్యంగా ప్రకటించారు. మెకెంజీ చర్యలు ప్రస్తుత ప్రపంచంలో ధనికులు సామాజిక బాధ్యతను ఎలా నిర్వర్తించాలో చూపిస్తున్న ఉదాహరణగా నిలుస్తున్నాయి. ఆమె చేసిన ఈ తాజా విరాళం మరోసారి మానవతా విలువలను గుర్తుచేస్తూ, సమాజానికి మార్గదర్శకంగా నిలిచింది.
Read hindi news: https://hindi.vaartha.com
Epaper : https://epaper.vaartha.com/
