ఉగ్రవాదుల అంతానికి భారత్కు సహకరించండి: అమెరికా ఉపాధ్యక్షుడు జెడి వాన్స్ వ్యాఖ్యలు
పహల్గాంలో పర్యాటకులపై ఉగ్రవాదులు జరిపిన దారుణ దాడి దేశవ్యాప్తంగా తీవ్ర ఆవేదనకు కారణమైంది. ఈ ఘటన నేపథ్యంలో భారత్–పాకిస్థాన్ల మధ్య ఉద్రిక్తతలు మళ్లీ ముదురుతున్నాయి. ఈ తరుణంలో అమెరికా ఉపాధ్యక్షుడు జెడి వాన్స్ స్పందిస్తూ, ఈ దాడి భారత ప్రజలపై తీవ్రమైన దాడిగా అభివర్ణించారు.జెడి వాన్స్ మాట్లాడుతూ, “భారత్ ఈ ఘటనపై ఎలా స్పందిస్తుందన్నది ప్రపంచ దేశాల కంటపడి ఉంది. కానీ ఈ ప్రతిస్పందన ప్రాంతీయ యుద్ధ స్థితికి దారి తీయకూడదనే మా ఆకాంక్ష. పాకిస్థాన్ కూడా బాధ్యతాయుతంగా వ్యవహరించాలి. ఉగ్రవాదులపై న్యూఢిల్లీ చేపడుతున్న చర్యలకు పాక్ సహకరించాలి,” అని సూచించారు.పహల్గాంలో బైసరన్ లోయలో ఉగ్రదాడి జరిగిన సమయంలో అమెరికా ఉపాధ్యక్షుడు సతీసమేతంగా భారత్ పర్యటనలో ఉన్నారు. అప్పటికే ఆయన ఈ దాడిని ఖండిస్తూ, “భారత్ ఉగ్రవాదంపై పోరాటంలో అమెరికా అవసరమైన సహకారాన్ని అందించేందుకు సిద్ధంగా ఉంది,” అని హామీ ఇచ్చారు.
JD Vance : అమెరికా ఉపాధ్యక్షుడు జెడి వాన్స్ వ్యాఖ్యలు
ఈ ఉగ్రదాడిలో 26 మంది పర్యాటకులు ప్రాణాలు కోల్పోయారు. ఈ ఘటనను అమెరికా అధ్యక్షుడు డొనాల్డ్ ట్రంప్ సహా పలు అగ్రరాజ్యాల నేతలు ఖండించారు. భారత్కు తమ మద్దతు ప్రకటించారు.ఇదిలా ఉండగా, భారత్-పాకిస్థాన్ సరిహద్దుల్లో ఉద్రిక్త పరిస్థితులు కొనసాగుతున్నాయి. నియంత్రణ రేఖ వెంబడి పాక్ సైన్యం కాల్పుల విరమణ ఒప్పందాన్ని పలు మార్లు ఉల్లంఘిస్తోంది. కుప్వారా, బారాముల్లా, పూంచ్, నౌషెరా, అఖ్నూర్ సెక్టార్లలో పాక్ బలగాలు అక్రమ కాల్పులకు తెగబడినట్టు భారత ఆర్మీ వెల్లడించింది.భారత ఆర్మీ ఇందుకు సమర్థవంతంగా ప్రతిస్పందించింది. గత కొన్ని వారాలుగా ఇలాంటి ఘటనలు వరుసగా జరుగుతున్నాయి. ఇది పాక్ తరఫున ఎనిమిదోసారి కాల్పుల విరమణ ఒప్పందం ఉల్లంఘన కావడం గమనార్హం.ఉగ్రవాదంపై పోరాటంలో అంతర్జాతీయ మద్దతు భారత్కు ఊతమిస్తుండగా, పాకిస్థాన్ మాత్రం ఇప్పటికీ ఈ విషయంలో చిత్తశుద్ధిని చూపించకపోవడం భద్రతా విశ్లేషకుల్లో ఆందోళన కలిగిస్తోంది. పహల్గాం ఘటన వంటి ఘటనలు మానవతా విలువలకు భంగం కలిగించడమే కాక, ఉగ్రవాదంపై గట్టి చర్యలు తీసుకోవాల్సిన అవసరాన్ని మళ్లీ స్పష్టంగా చూపిస్తున్నాయి.
Read More : America :భారత్కు మా సంపూర్ణ మద్దతు.. టామీ బ్రూస్
