Indus Waters Treaty: ఎండుతున్న పాక్ డ్యామ్ లు

పహల్గామ్ ఉగ్రదాడికి ప్రతిస్పందనగా భారత ప్రభుత్వం చేపట్టిన వ్యూహాత్మక చర్యలు ఇప్పుడు గణనీయమైన ప్రభావం చూపిస్తున్నాయి. భారత్ – పాకిస్థాన్ మధ్య గతంలో కొనసాగిన సింధు జలాల ఒప్పందం (Indus Waters Treaty)ని రద్దు చేయడంతో, పాకిస్థాన్ వ్యవసాయరంగం తీవ్ర సంక్షోభంలోకి నెట్టబడుతోంది.

పహల్గామ్ ఉగ్రదాడికి వ్యూహాత్మక ప్రతీకారం

జమ్మూ కాశ్మీర్‌లోని పహల్గామ్ సమీపంలో జరిగిన ఉగ్రదాడిలో అమాయక యాత్రికులు ప్రాణాలు కోల్పోయిన ఘటనపై భారత్ తీవ్ర స్థాయిలో స్పందించింది. భారత్‌పై నిరంతరం పాకిస్థాన్ మద్దతుతో జరుగుతున్న ఉగ్రవాద చర్యలపై రాజకీయంగా, మౌలికసదుపాయాల పరంగా గట్టి జవాబు అవసరమన్న నెపథ్యంలో, సింధు జలాల ఒప్పందాన్ని నిలిపివేయడం కీలక నిర్ణయంగా నిలిచింది.

సింధు ఒప్పంద రద్దుతో నీటి కొరత – పాకిస్థాన్‌ వ్యవసాయం కష్టాల్లో

కేంద్ర ప్రభుత్వం తీసుకున్న ఈ వ్యూహాత్మక నిర్ణయం ప్రస్తుతం ప్రభావం చూపిస్తోంది. సింధు జలాలను నిలిపివేయడంతో పాకిస్థాన్ లో నీటి కరవు ఏర్పడింది. ఇది పాకిస్థాన్ లో వ్యవసాయ రంగంపై తీవ్ర ప్రతికూల ప్రభావం చూపుతోంది. పాకిస్థాన్‌లోని కీలకమైన మంగ్లా (జీలం నదిపై), తర్బేలా (సింధు నదిపై) డ్యామ్‌లలో నీటి నిల్వలు గణనీయంగా పడిపోవడంతో ఖరీఫ్ (వేసవి పంటల) సాగు ప్రమాదంలో పడింది. ఈ రెండు డ్యామ్‌లు పాకిస్థాన్‌లోని పంజాబ్, సింధ్ ప్రావిన్స్‌లలో వ్యవసాయానికి, జలవిద్యుత్ ఉత్పత్తికి అత్యంత కీలకం. ప్రస్తుత నీటి కొరత ఈ నెలలో ఖరీఫ్ సాగు ప్రారంభమయ్యే నాటికి మరింత తీవ్రరూపం దాల్చవచ్చని అధికారులు ఆందోళన వ్యక్తం చేస్తున్నారు.

షెహబాజ్ షరీఫ్ ఆరోపణలు – భారత్‌పై నిందలు

ఈ పరిస్థితులపై పాకిస్థాన్ ప్రధాని షెహబాజ్ షరీఫ్ తీవ్ర ఆగ్రహం వ్యక్తం చేశారు. “భారత్ సింధు ఒప్పందాన్ని ఏకపక్షంగా, చట్టవిరుద్ధంగా నిలిపివేసింది” అంటూ ఆయన ఆరోపించారు. శుక్రవారం జరిగిన హిమానీనదాల పరిరక్షణపై అంతర్జాతీయ సదస్సులో ఆయన మాట్లాడుతూ, సింధు నదీ బేసిన్ నీటి పంపకాన్ని నియంత్రించే సింధు జలాల ఒప్పందాన్ని భారత్ ఏకపక్షంగా, చట్టవిరుద్ధంగా నిలిపివేసిందని ఆరోపించారు. సింధు నదీ వ్యవస్థ అథారిటీ (ఐఆర్‌ఎస్‌ఏ) తాజా అంచనాల ప్రకారం, పాకిస్థాన్ మొత్తం నీటి ప్రవాహంలో 21% కొరతను, రెండు కీలక డ్యామ్‌లలో దాదాపు 50% నీటి నిల్వల కొరతను ఎదుర్కొంటోంది.

ఉగ్రవాదమే అసలైన ఒప్పంద ఉల్లంఘన

పాకిస్థాన్ ఆరోపణలకు భారత్ తక్షణమే ప్రతిస్పందించింది. తజికిస్థాన్‌లోని దుషాన్‌బేలో జరిగిన ఐక్యరాజ్యసమితి హిమానీనదాల సదస్సులో కేంద్ర పర్యావరణ శాఖ సహాయ మంత్రి కీర్తి వర్ధన్ సింగ్ మాట్లాడుతూ, పాకిస్థానే ఉగ్రవాదం ద్వారా ఒప్పందాన్ని ఉల్లంఘిస్తోందని అన్నారు. “ఈ వేదికను దుర్వినియోగం చేసి, సంబంధం లేని అంశాలను ప్రస్తావించడానికి పాకిస్థాన్ చేసిన ప్రయత్నాన్ని మేము తీవ్రంగా ఖండిస్తున్నాము అని ఆయన వ్యాఖ్యానించారు.