వలస పాలన మిగిల్చిన పేదరికాన్ని జయించేందుకు భారతదేశం, పాకిస్థాన్ (India, Pakistan) పోరు సాగిస్తున్నాయి. కానీ ఈ పోరులో రెండు దేశాలు తీసుకున్న దిశలు బహుదా భిన్నంగా ఉన్నాయి. ప్రపంచ బ్యాంకు (World Bank)తాజాగా విడుదల చేసిన గణాంకాలు ఈ తేడాను స్పష్టంగా చూపుతున్నాయి.భారతదేశం అభివృద్ధి పథంలో ముందంజ వేస్తోంది. ‘పావర్టీ అండ్ షేర్డ్ ప్రాస్పెరిటీ’ అనే ప్రపంచ బ్యాంకు నివేదిక ప్రకారం, రోజుకు ఒక్కొక్కరు కనీసం 3 డాలర్లు సంపాదించే స్థాయిలో ఉన్నారని లెక్క వేసినప్పుడు, పేదరికం తీవ్రంగా తగ్గినట్టు వెల్లడైంది.2011-12లో 27.1 శాతంగా ఉన్న తీవ్ర పేదరికం 2022-23 నాటికి కేవలం 5.3 శాతానికి పడిపోయింది. ఇదే కాలంలో 34 కోట్ల 44 లక్షల మంది పేదరికంలో ఉన్న వారిలో 26 కోట్ల 90 లక్షల మంది ఆ స్థితిని తాత్కాలికంగా అయినా అధిగమించారు. ఇదే పాకిస్థాన్ మొత్తం జనాభాతో పోలిస్తే అధికమే.ఈ ఫలితాలు భారత ప్రభుత్వం చేపట్టిన అభివృద్ధి కార్యక్రమాలు, సామాజిక సంక్షేమ పథకాల విజయాన్ని చూపిస్తున్నాయి. ప్రతి కుటుంబం ఎదగాలని లక్ష్యంగా పెట్టుకున్న పథకాలు దేశ ఆర్థిక స్వావలంబనకు మార్గం ఏర్పరుస్తున్నాయి.
పాకిస్థాన్ పరిస్థితి మాత్రం భిన్నంగా..
దీనికి భిన్నంగా పాకిస్థాన్ పరిస్థితి మరింత దిగజారుతోంది. 2017-18 నుంచి 2020-21 మధ్య కాలంలో అక్కడి తీవ్ర పేదరికం 4.9 శాతం నుండి ఏకంగా 16.5 శాతానికి పెరిగింది. ఇదే కాలంలో రోజుకు ఒక్కరికి 4.2 డాలర్ల ఆదాయ ప్రమాణంతో లెక్కించితే, మొత్తం పేదరిక రేటు 39.8 శాతం నుంచి 44.7 శాతానికి చేరింది.పాకిస్థాన్ ఆర్థిక వ్యవస్థ ఐఎంఎఫ్, ఇతర దేశాల రుణాలపై ఎక్కువగా ఆధారపడి ఉంది. ఇప్పటికే 25 బెయిలౌట్ ప్యాకేజీలు పొందినప్పటికీ, అక్కడి పాలనలో పారదర్శకత లేకపోవడం, నిధుల దుర్వినియోగం, భద్రతాపరమైన వ్యయాలు ఎక్కువవటం వంటి అంశాలు సమస్యలను ముదుర్చాయి.పాక్ పాలకులు సైనిక ఖర్చులను పెద్దపీట వేసినా, ప్రజా సంక్షేమం దిశగా మళ్లకపోవడం తీవ్రంగా దెబ్బతీసింది. ఉగ్రవాదంపై సడలిన వైఖరి కూడా విదేశీ పెట్టుబడులకు అడ్డుగా మారింది.
భారత్ విజయం.. పాక్ జాగ్రత్త
ఈ గణాంకాలు రెండు దేశాల మధ్య ఉన్న అభివృద్ధి తేడాను స్పష్టంగా చెబుతున్నాయి. భారత్ అభివృద్ధి మార్గాన్ని సుస్పష్టం చేస్తుంటే, పాకిస్థాన్ మాత్రం అప్పుల ఊబిలో మునిగి పోతోంది. భారతదేశం పేదరిక నిర్మూలన దిశగా దృఢ సంకల్పంతో నడుస్తూ ప్రపంచానికి ఆదర్శంగా నిలుస్తోంది.అయితే పాకిస్థాన్ ఉదంతం ఒక్క దేశానికే కాక, అభివృద్ధి చెందుతున్న అన్ని దేశాలకు ఒక గుణపాఠంగా నిలుస్తోంది. సరైన ప్రాధాన్యతలు లేకపోతే ఎంతటి పతనం సంభవించొచ్చో అది చూపిస్తోంది.ప్రపంచ బ్యాంకు నివేదికలోని గణాంకాలు ఆర్థిక విధానాల ప్రభావాన్ని అద్దం పట్టిస్తున్నాయి. అభివృద్ధికి పక్కా ప్రణాళికలు, జవాబుదారీ పాలన అవసరమని మరోసారి నిరూపితమవుతోంది.
