ప్రతి వ్యక్తి తన జీవితంలో కొన్నిసార్లు ఒంటరితనాన్ని అనుభవిస్తాడు. ఇలాంటి పరిస్థితుల్లో కొందరు మానసికంగా తీవ్ర ఒత్తిడిని ఎదుర్కొంటారు. కొన్నిసార్లు ద్రోహం, వైఫల్యం, సంఘర్షణ లేదా ఏదైనా వ్యక్తిగత సమస్యల కారణంగా బాధపడటం ప్రారంభిస్తారు. అటువంటి పరిస్థితుల్లో, వ్యక్తి నిరాశ (డిప్రెషన్) బారిన పడే అవకాశం ఉంది. అయితే, చాలా మందికి తాము డిప్రెషన్తో బాధపడుతున్నారని తెలియదు. ఈ సమస్యను గుర్తించడం, సమయానికి చికిత్స తీసుకోవడం చాలా అవసరం.
ఎప్పుడూ విచారంగా ఉండటం
ఎప్పుడూ విచారంగా, ఒంటరిగా ఉండటం డిప్రెషన్ ముఖ్య లక్షణం. మీరు రెండు లేదా అంతకంటే ఎక్కువ వారాల పాటు నిరంతరం బాధగా, జీవితంలో ఆసక్తి లేకుండా ఉంటే, అది డిప్రెషన్ సంకేతం కావచ్చు.
నిద్ర సమస్యలు
నిద్ర లేమి లేదా అతి నిద్ర రెండూ డిప్రెషన్కు సంకేతాలు. కొందరు రాత్రివేళల్లో నిద్ర పట్టక ఇబ్బంది పడతారు, మరికొందరు అధికంగా నిద్రపోతారు. నిద్ర సరైన విధంగా లేకపోతే, మనశ్శాంతి దెబ్బతింటుంది.
శరీర శక్తి తగ్గిపోవడం
డిప్రెషన్ బారిన పడిన వ్యక్తులకు ఎప్పుడూ అలసటగా అనిపిస్తుంది. ఎంత విశ్రాంతి తీసుకున్నా శక్తి కోల్పోయినట్లు ఉంటుంది. చిన్న చిన్న పనులు చేయడానికి కూడా ఆసక్తి లేకుండా ఉంటుంది.
ఆకలి మార్పులు
ఆకలి నియంత్రణ లేకపోవడం లేదా ఆకలి పూర్తిగా తగ్గిపోవడం డిప్రెషన్ లక్షణాల్లో ఒకటి. కొందరు ఆకలిని పూర్తిగా కోల్పోతారు, మరికొందరు అధికంగా తినడం ప్రారంభిస్తారు.
ఏ పనిలోనూ ఆసక్తి లేకపోవడం
డిప్రెషన్ ఉన్న వ్యక్తులు తమకు ఇష్టమైన పనులను కూడా ఆసక్తిగా చేయలేరు. సామాజిక జీవితం నుంచి దూరంగా ఉండటం, కుటుంబం, స్నేహితులతో మమేకం కాకుండా పోవడం చూస్తే, వారు డిప్రెషన్తో బాధపడుతున్నట్లు భావించాలి.
మానసిక ఆందోళన, నెగటివ్ ఆలోచనలు
డిప్రెషన్ ఉన్న వ్యక్తులు తరచుగా నెగటివ్ ఆలోచనలకు లోనవుతారు. భయాలు, అనవసర ఆందోళన, ఆత్మనిందా భావనలు పెరిగి, కొన్నిసార్లు ఆత్మహత్యా ఆలోచనలకు దారితీసే అవకాశం ఉంటుంది.
శారీరక నొప్పులు
తలనొప్పి, కడుపు నొప్పి, కీళ్ల నొప్పులు, ముసలితనానికి ముందుగా అనిపించే లక్షణాలు డిప్రెషన్కు సంబంధించివుండొచ్చు. ఒత్తిడి పెరిగే కొద్దీ శరీరం తగిన విధంగా స్పందించదు.
డిప్రెషన్ నుండి బయటపడేందుకు చిట్కాలు
వైద్య సహాయం తీసుకోవడం: మానసిక ఆరోగ్య నిపుణులను సంప్రదించడం ఉత్తమ మార్గం.
యోగా, ధ్యానం: మానసిక ప్రశాంతతను మెరుగుపరిచే అద్భుతమైన సాధనాలు.
స్వస్థమైన ఆహారం: పోషకాహారాన్ని తీసుకోవడం శరీరానికి, మానసిక స్థితికి సహాయపడుతుంది.
స్నేహితులు, కుటుంబ సభ్యులతో మాట్లాడడం: ఒంటరితనం తగ్గించుకోవడానికి ఇదే ఉత్తమ మార్గం.
రోజువారీ వ్యాయామం: ఫిజికల్ యాక్టివిటీ మూడ్ని మెరుగుపరిచేందుకు సహాయపడుతుంది.
మీకు తెలిసిన ఎవరైనా ఆత్మహత్యా ఆలోచనలతో బాధపడితే, వెంటనే మానసిక నిపుణులను సంప్రదించండి.
