క్రికెట్లో జట్టు కోసం ఆడతామా? లేక చరిత్ర సృష్టించాలా? ఈ రెండు ప్రశ్నల మధ్య కొన్నిసార్లు క్రీడాకారులు నిర్ణయాలు తీసుకోవాల్సి వస్తుంది. అలాంటి నిర్ణయం ఒకటి ఇప్పుడు క్రికెట్ వర్గాల్లో పెద్ద చర్చకు దారితీసింది.జింబాబ్వేతో బులవాయోలో జరిగిన రెండో టెస్టులో దక్షిణాఫ్రికా కెప్టెన్ వియాన్ ముల్డర్ (Vian Mulder) 367 పరుగుల వద్దే ఇన్నింగ్స్ను డిక్లేర్ చేశారు. ఇంకా కేవలం 34 పరుగుల దూరంలోనే బ్రియాన్ లారా (400) పేరిట ఉన్న అత్యధిక వ్యక్తిగత టెస్ట్ స్కోరు రికార్డు ఉంది. అయినా ఇన్నింగ్స్ను ఆపేయడం పలువురిని ఆశ్చర్యానికి గురి చేసింది.
క్రిస్ గేల్ తీవ్రంగా విమర్శించాడు
ఈ విషయంపై వెస్టిండీస్ మాజీ ఓపెనర్ క్రిస్ గేల్ (Chris Gayle) ఘాటుగా స్పందించారు. ‘‘ఆ రికార్డును అందుకోవాలన్న అవకాశం ముల్డర్కు లభించింది. కానీ అది వదులుకున్న తీరు జీర్ణించుకోలేకపోతున్నా. అలాంటి చరిత్రలు పదే పదే దక్కవు. ఆ స్థితిలో జట్టుపై ఒత్తిడి లేదనుకుంటే, ఇంకో 34 పరుగులకే ఆగిపోవడం తగదని నాకు అనిపిస్తోంది,’’ అని గేల్ వ్యాఖ్యానించారు.
అయితే ముల్డర్ చరిత్రలో నిలిచాడు
ఇన్నింగ్స్ను పూర్తి చేయకపోయినా, ముల్డర్ దక్షిణాఫ్రికా టెస్టు చరిత్రలో సరికొత్త రికార్డు నెలకొల్పాడు. ఇప్పటివరకు హషీమ్ ఆమ్లా పేరిట ఉన్న అత్యధిక టెస్ట్ స్కోరు (311)ను ముల్డర్ అధిగమించాడు. ఆయన 334 బంతుల్లో 49 ఫోర్లు, 4 సిక్సర్లు బాదుతూ 367 పరుగులు చేసి అజేయంగా నిలిచాడు.
జట్టు ప్రయోజనమే ప్రధానం అంటున్నవారు కూడా ఉన్నారు
వివాదం ఎంత ఉన్నా, ముల్డర్ నిర్ణయం వెనుక జట్టు విజయమే ఉన్నదని అంటున్నవారు కూడా ఉన్నారు. మ్యాచ్ గెలవాలంటే ప్రత్యర్థిని త్వరగా బౌల్ట్ చేయాలి. అందుకే ఇన్నింగ్స్ డిక్లేర్ చేశారని వారి వాదన.
Read Also : Narendra Modi : నరేంద్రమోదీకి నమీబియా అత్యున్నత పురస్కారం
