అమెరికా, రష్యా మధ్య మాటల యుద్ధం రోజురోజుకీ తీవ్రమవుతోంది. రష్యా మాజీ అధ్యక్షుడు, ప్రస్తుత భద్రతా మండలి డిప్యూటీ ఛైర్మన్ దిమిత్రి మెద్వెదేవ్ (Deputy Chairman Dmitry Medvedev) చేసిన ఘాటు వ్యాఖ్యలతో పరిస్థితి మరింత ఉద్రిక్తమైంది. దీనిపై అమెరికా అధ్యక్షుడు డొనాల్డ్ ట్రంప్ (Donald Trump) కీలక నిర్ణయం తీసుకున్నారు.ట్రంప్ రెండు అణు జలాంతర్గాములను తక్షణమే కీలక ప్రాంతాలకు మోహరించాలని ఆదేశించారు. ఈ నిర్ణయంతో రెండు దేశాల మధ్య ఉద్రిక్తతలు ఒక్కసారిగా పెరిగాయి. తన సోషల్ మీడియా ఖాతాలో ట్రంప్ ఈ విషయాన్ని వెల్లడించారు.
ట్రంప్ వ్యాఖ్యలు
“మెద్వెదేవ్ చేసిన వ్యాఖ్యలు అవివేకంగా, రెచ్చగొట్టేలా ఉన్నాయి. ఈ వ్యాఖ్యల వెనుక మరింత ప్రమాదం దాగి ఉందేమోనన్న అనుమానం కలిగింది. అందుకే జలాంతర్గాములను తగిన ప్రాంతాలకు పంపమని ఆదేశించాను. మాటలు ఊహించని పరిణామాలకు దారితీస్తాయి. ఇది అలాంటి పరిస్థితి కాకూడదని ఆశిస్తున్నాను” అని ట్రంప్ పేర్కొన్నారు.ట్రంప్ భారత, రష్యా ఆర్థిక వ్యవస్థలను ‘చచ్చిపోయిన ఆర్థిక వ్యవస్థలు’గా విమర్శించారు. దీనిపై మెద్వెదేవ్ టెలిగ్రామ్లో కఠినంగా స్పందించారు. ఆయన ‘డెడ్ హ్యాండ్’ వ్యవస్థను ప్రస్తావించడం వివాదానికి దారి తీసింది. ఈ వ్యవస్థ దేశ రక్షణ వ్యవస్థ నాశనమైనా, శత్రువులపై అణు ప్రతిదాడి స్వయంచాలకంగా జరిపే విధంగా ఉంటుంది.
వ్యాపార లావాదేవీలపై వ్యాఖ్యలు
ట్రంప్ రష్యా, అమెరికాల మధ్య పెద్ద వ్యాపార లావాదేవీలు లేవని చెప్పారు. అవి అలాగే ఉండాలని వ్యాఖ్యానించారు. మెద్వెదేవ్ మాటలు జాగ్రత్తగా వాడాలని హెచ్చరించారు.ఉక్రెయిన్లో కాల్పుల విరమణకు అంగీకరించాలని ట్రంప్ రష్యాకు పది రోజుల గడువు ఇచ్చారు. లేకపోతే భారీ సుంకాలు విధించబడతాయని హెచ్చరించారు. అయితే మాస్కో మాత్రం ఈ గడువుకు కట్టుబడే సూచనలు కనిపించడం లేదు.అమెరికా-రష్యా మధ్య పెరుగుతున్న ఈ ఉద్రిక్తతలు అంతర్జాతీయ స్థాయిలో ఆందోళన కలిగిస్తున్నాయి. అణు జలాంతర్గాముల మోహరింపుతో పరిస్థితి మరింత క్లిష్టమవుతుందేమోనన్న భయం వ్యక్తమవుతోంది.
Read Also : Operation Sindoor : ‘ఆపరేషన్ సిందూర్’ తర్వాత పాక్ కొత్త వ్యూహం
