తెలంగాణ అప్పు గురించి ఇటీవల సీఎం రేవంత్ రెడ్డి (Revanth Reddy) చేసిన వ్యాఖ్యలు పెద్ద చర్చనీయాంశంగా మారాయి. కేసీఆర్ ప్రభుత్వం 8 లక్షల కోట్లు అప్పు చేసిందంటూ ఆయన ఆరోపణలు గుప్పించారు.అయితే, ఇప్పుడు ఈ ఆరోపణలకు కేంద్రం నుంచే స్పష్టత వచ్చింది. నిజం ఏంటో స్వయంగా కేంద్ర ప్రభుత్వమే చెప్పిందని బీఆర్ఎస్ నేత కేటీఆర్ వెల్లడించారు.రాష్ట్ర అప్పులపై బీజేపీ, కాంగ్రెస్ చేసిన ఆరోపణలు వాస్తవానికి దూరమని కేటీఆర్ (KTR) అన్నారు. మా పాలనలో అప్పు రూ. 8 లక్షల కోట్లు కాదు, అని ఆయన తేల్చిచెప్పారు.మొత్తం అప్పు కేవలం రూ. 3,50,520 కోట్లు మాత్రమే, అని వివరించారు. పార్లమెంట్లో కేంద్రం ఇచ్చిన గణాంకాలే దీన్ని నిరూపించాయన్నారు.
బీఆర్ఎస్పై చేసిన ప్రచారం పూర్తిగా అవాస్తవమే
ఓటర్లను తప్పుదోవ పట్టించడానికే కాంగ్రెస్ ఈ నకిలీ నంబర్లతో వచ్చింది, అని కేటీఆర్ అన్నారు. ఇవన్నీ ఎన్నికల సమయంలో నమ్మించి గెలవాలన్న కుట్రలే, అని మండిపడ్డారు.రేవంత్ రెడ్డి ‘అప్పు రాజకీయం’ వల్ల ఇప్పుడు ఆయన ముఖం ఎక్కడ పెట్టుకోవాలో తెలియని స్థితిలో ఉన్నారని ఎద్దేవా చేశారు.బీఆర్ఎస్ ప్రభుత్వం అప్పు తీసుకున్న మాట వాస్తవమే, కానీ అది అవసరమైన సందర్భాల్లో మాత్రమే తీసుకున్నారని కేటీఆర్ వివరించారు.
ప్రజల భవిష్యత్తు కోసం, మౌలిక వసతుల అభివృద్ధి కోసం మాత్రమే అప్పు తీసుకున్నాం, అన్నారు.
మిషన్ భగీరథ, కాళేశ్వరం… అభివృద్ధికే అప్పు వినియోగం
కేటీఆర్ మాట్లాడుతూ, “అప్పుతో నీటి పథకాల్ని తీర్చాము. మిషన్ భగీరథ, మిషన్ కాకతీయ లాంటి ప్రాజెక్టులకే ఎక్కువగా నిధులు వినియోగించాం,” అన్నారు.కాళేశ్వరం ప్రాజెక్ట్, పాలమూరు-రంగారెడ్డి ఎత్తిపోతల పథకాలు కూడా అప్పుతో నిర్మించినవేనని చెప్పారు.2023-24 ఆర్థిక సంవత్సరం ముగిసే నాటికి తెలంగాణ అప్పు రూ. 3,50,520 కోట్లు. అదే సమయంలో రాష్ట్ర ఆస్తుల విలువ మాత్రం రూ. 4,15,099 కోట్లుగా ఉంది.ఈ గణాంకాల ప్రకారం రాష్ట్ర ఆస్తులు అప్పులకు మించి ఉన్నాయి. మొత్తం రూ. 64,579 కోట్లు ఆస్తుల విలువ ఎక్కువగా ఉందని కేటీఆర్ వివరించారు.
అసత్య ఆరోపణలతో ప్రజల నమ్మకాన్ని దోచుకోవద్దు
కేటీఆర్ చివరగా అన్నారు – “తప్పుడు ప్రచారాలూ, అసత్యాలూ ప్రజలకు మేలు చేయవు. ప్రజలు ఇప్పుడు నిజాన్ని తెలుసుకునే స్థాయికి వచ్చారు. డేటా స్పష్టంగా ఉంది.”
Read Also : Perni Nani : ఓటుకు పది వేలు ఇస్తున్నారు: పేర్ని నాని
