Tollywood : కొరియోగ్రాఫర్ జానీ మాస్టర్ కు బిగ్ షాక్

Tollywood : టాలీవుడ్ ప్రముఖ కొరియోగ్రాఫర్ జానీ మాస్టర్‌కు తెలుగు ఫిల్మ్ ఫెడరేషన్ గట్టి షాకిచ్చింది. ఫెడరేషన్ నిబంధనలకు విరుద్ధంగా, వ్యతిరేక కార్యకలాపాలకు పాల్పడ్డారనే ఆరోపణలపై ఆయనకు షోకాజ్ నోటీసులు జారీ చేసింది. ఈ వివాదానికి సంబంధించి వాస్తవాలను తెలుసుకునేందుకు ఫెడరేషన్ కమిటీ ఈ నెల 14న జానీ మాస్టరిని విచారణకు రావాల్సిందిగా ఆదేశించింది. అయితే, ఆయన ఈ విచారణకు హాజరుకాకపోవడాన్ని ఫెడరేషన్ తీవ్రంగా పరిగణించింది. ఈ నేపథ్యంలో, ఫెడరేషన్‌కు వ్యతిరేకంగా చేసిన పనులపై జానీ మాస్టర్ తక్షణమే బహిరంగ క్షమాపణలు చెప్పాలని డిమాండ్ చేసింది. ఒకవేళ నిర్ణీత సమయంలోగా క్షమాపణలు చెప్పని పక్షంలో, ఆయనపై కఠినమైన క్రమశిక్షణా చర్యలు తీసుకుంటామని ఫెడరేషన్ వర్గాలు గట్టిగా హెచ్చరించాయి.

సుమలత తీరుపై ఆగ్రహం.. జనరల్ బాడీ నిర్ణయమే ఫైనల్!

మరోవైపు, ఈ వ్యవహారంలో డాన్సర్స్ అసోసియేషన్ అధ్యక్షురాలు, జానీ మాస్టర్ భార్య అయిన సుమలత వ్యవహరించిన తీరుపై కూడా తెలుగు ఫిల్మ్ ఫెడరేషన్ తీవ్ర అసంతృప్తిని, ఆగ్రహాన్ని వ్యక్తం చేసింది. అసోసియేషన్‌లో బాధ్యతాయుతమైన పదవిలో ఉంటూ ఫెడరేషన్ నియమ నిబంధనలను పక్కనబెట్టడం సరికాదని మండిపడింది. ఫెడరేషన్‌కు సంబంధించిన జనరల్ బాడీ తీసుకునే నిర్ణయాలకు ప్రతి ఒక్కరూ కట్టుబడి ఉండాల్సిందేనని, ఇందులో ఎలాంటి మినహాయింపులు ఉండవని స్పష్టం చేసింది. టాలీవుడ్ డ్యాన్స్ యూనియన్‌లో అంతర్గత విభేదాలు, వివాదాలు ఈ నోటీసులతో ఒక్కసారిగా వీధిలోకి రావడంతో ఫిల్మ్ నగర్ సర్కిల్స్‌లో ఈ అంశం ఇప్పుడు హాట్ టాపిక్‌గా మారింది.