Actor Naresh: ప్రాంతాల వారీగా సినిమాలను విడదీయడం సరికాదు.. నరేశ్

Actor Naresh: తెలుగు చిత్ర పరిశ్రమలో సినిమాలను ప్రాంతాల వారీగా విభజించడం ఏమాత్రం సరికాదని, ఉన్నది ఒకే ఒక్క తెలుగు సినిమా అని సీనియర్ నటుడు నరేశ్ వ్యాఖ్యానించారు. ఇటీవల తెలంగాణ సినిమా, రాయలసీమ సినిమా, ఉత్తరాంధ్ర సినిమా అంటూ ముద్రలు వేయడం ఒక ఫ్యాషన్‌గా మారిపోయిందని ఆయన తీవ్ర అసహనం వ్యక్తం చేశారు. హైదరాబాద్‌లోని రామానాయుడు స్టూడియోస్‌లో జరిగిన ‘గరివిడి లక్ష్మి’ బయోపిక్ ట్రైలర్ విడుదల కార్యక్రమంలో ఆయన ఈ వ్యాఖ్యలు చేశారు.

Actor Naresh: సినిమాలకు, పాటలకు సరిహద్దులు ఉండవు

ఈ సందర్భంగా నరేశ్ మాట్లాడుతూ.. “పాటలకు, సంగీతానికి ఎలాగైతే సరిహద్దులు ఉండవో, సినిమాకు కూడా ఎలాంటి ప్రాంతీయ భేదాలు ఉండవు. మన ప్రేక్షకులు కొరియన్, మలయాళం, తమిళ సినిమాలను భాషతో సంబంధం లేకుండా ఆదరిస్తున్నప్పుడు, మన సినిమాలను మనం ఎందుకు ప్రాంతాల వారీగా విడదీస్తున్నాం?” అని నిలదీశారు. తమిళంలో వచ్చిన ‘మణ్ వాసనై’ (మట్టి వాసన) సినిమాను ఉదాహరణగా చెప్తూ… మట్టి వాసనకు ప్రాంతంతో సంబంధం లేదని, అది అందరినీ కలుపుతుందని వ్యాఖ్యానించారు. ‘గరివిడి లక్ష్మి’ కథ కూడా ప్రతి తెలుగు ప్రేక్షకుడి హృదయాన్ని కదిలిస్తుందని తెలిపారు.

‘మహానటి’ లాంటి బయోపిక్ – జాతీయ అవార్డులపై ధీమా

ప్రముఖ బుర్రకథ కళాకారిణి గరివిడి లక్ష్మి జీవిత కథ ఆధారంగా తెరకెక్కిన ఈ చిత్రంపై నరేశ్ పూర్తి విశ్వాసాన్ని వ్యక్తం చేశారు. “ఈ దసరాకు బాక్సాఫీస్ వద్ద విజయం సాధించే మొదటి చిత్రం ‘గరివిడి లక్ష్మి’ అవుతుంది. ఇది ‘మహానటి’లాగా వినోదం, భావోద్వేగాలు కలగలిపిన అద్భుతమైన బయోపిక్. ఈ చిత్రానికి జాతీయ అవార్డులు కూడా వస్తాయని ఆశిస్తున్నాను” అని ఆయన ధీమా వ్యక్తం చేశారు. పీపుల్ మీడియా ఫ్యాక్టరీ నిర్మించిన ఈ చిత్రం అక్టోబర్ 17న థియేటర్లలో ప్రపంచవ్యాప్తంగా విడుదల కానుంది.