Planet Parade: రేపు ఆకాశంలో గ్రహాల పరేడ్ ఒకే వరుసలో ఆరు గ్రహాలు

ఆకాశాన్ని ప్రేమించే వారికి రేపు ప్రత్యేకమైన ఖగోళ కానుక లభించనుంది. జుపిటర్, మెర్క్యూరీ , యురేనస్ , నెప్ట్యూన్ , వీనస్ , సాటర్న్ ఒకే సరళ రేఖలో దర్శనమివ్వనున్నాయి. ఈ విశేషాన్ని ఖగోళ శాస్త్రవేత్తలు “గ్రహాల పరేడ్”గా పేర్కొంటున్నారు.

ఎలా, ఎప్పుడు చూడాలి?

సూర్యాస్తమయం అనంతరం కొద్ది సేపటికి ఆకాశం మేఘరహితంగా, వెలుతురు కాలుష్యం తక్కువగా ఉంటే ఈ గ్రహాలను సులభంగా గమనించవచ్చు. పశ్చిమ దిశ వైపు చూసినప్పుడు బుధుడు, శుక్రుడు, బృహస్పతి, శని గ్రహాలు మామూలు కంటితోనే కనిపించే అవకాశం ఉంది.
అయితే యురేనస్, నెప్ట్యూన్ వంటి దూరగ్రహాలు మసకబారిన కాంతితో ఉండటంతో వాటిని స్పష్టంగా చూడాలంటే బైనాక్యులర్లు లేదా టెలిస్కోప్ ఉపయోగించడం మంచిది.

ఈ సంఘటన ఎందుకు ప్రత్యేకం?

సాధారణంగా గ్రహాలు సూర్యుని చుట్టూ తమ తమ కక్ష్యల్లో సంచరిస్తూ వేర్వేరు స్థానాల్లో ఉంటాయి. కానీ కొన్నిసార్లు భూమి దృక్కోణంలో అవి ఒకే దిశలో వరుసగా కనిపిస్తాయి. ఇది అరుదుగా జరిగే ఖగోళ సమన్వయం. ఇలాంటి దృశ్యాలు ప్రతి సంవత్సరం జరగవు కాబట్టి, ఖగోళ ఆసక్తి గలవారు ఈ అవకాశాన్ని కోల్పోకుండా చూడాలని నిపుణులు సూచిస్తున్నారు.