Karthika Masam: కార్తీక చివరి సోమవారం శివారాధన ప్రాముఖ్యం

కార్తీక మాసం(Karthika Masam)లో వచ్చే సోమవారాలు శివుడికి అత్యంత ప్రీతికరమైనవిగా భావిస్తారు. ఈ మాసంలో చేసే పూజలు, వ్రతాలు అపారమైన పుణ్యాన్ని ప్రసాదిస్తాయనే విశ్వాసం ఉంది. ప్రత్యేకంగా ఈ రోజు కార్తీక మాసం(Karthika Masam) చివరి సోమవారం కావడంతో, శివభక్తులు కొన్ని నియమాలను పాటిస్తే అశ్వమేధ యాగ ఫలితం వరకూ లభిస్తుందని పండితులు చెబుతున్నారు. శివకటాక్షం పొందేందుకు ఈ రోజున ఏ నియమాలను ఆచరించాలో చూద్దాం.

కార్తీక చివరి సోమవారం పాటించాల్సిన ఆచారాలు

• బ్రహ్మముహూర్తంలో లేవడం
సూర్యోదయానికి ముందే లేచి తలస్నానం చేయాలి. పవిత్ర నదుల్లో స్నానం చేయడం అత్యంత శ్రేయస్కరం అని శాస్త్రాలు పేర్కొంటాయి.

• ఇంట్లో పూజా కార్యక్రమాలు
స్నానం అనంతరం దేవుడి గదిని పూర్తిగా శుభ్రపరచి దీపం వెలిగించాలి. ఈ రోజున 365 వత్తుల దీపం వెలిగించడం ఎంతో పుణ్యప్రదమని పండితులు సూచిస్తున్నారు. కనీసం సాయంత్రం దీపారాధన తప్పకుండా చేయాలి.

• శివాభిషేకం
శివాలయంలో రుద్రాభిషేకం చేయడం లేదా ఇంటిలో శివలింగానికి పాలు, నీరు, తేనె మొదలైన ద్రవ్యాలతో అభిషేకం చేస్తే శివుని అనుగ్రహం లభిస్తుందని నమ్మకం.

• మంత్ర జపం
‘ఓం నమః శివాయ’ పంచాక్షరీ మంత్రాన్ని ధ్యానంతో జపిస్తే మనశ్శాంతి, ఆధ్యాత్మిక శోభ పెరుగుతుందని పండితులు చెబుతున్నారు.

• ఉపవాసం లేదా ఒక పూట భోజనం
ఈ రోజున ఉపవాసం ఉండడం లేదా ఒక పూట మాత్రమే భోజనం చేయడం శుభప్రదం.

ఆలయ దర్శనం మరియు దానం ప్రాధాన్యం

సమీపంలోని శివాలయాన్ని దర్శించడం, గుడిలో శివలింగం ముందు దీపం వెలిగించడం విశేష ఫలితాలను ఇస్తుందనీ నమ్మకం. ఆలయంలో దీపమాలికలు సమర్పించడం ద్వారా పాపాలు నశిస్తాయని పురాణాలు పేర్కొంటాయి. కార్తీక చివరి సోమవారంలో దానం అత్యంత పుణ్యమయమైన క్రతువుగా భావిస్తారు. అర్చకులకు లేదా పేదవారికి నువ్వులు, అన్నదానం లేదా దుప్పట్లు దానం చేస్తే అపారమైన ఫలితం లభిస్తుందని పండితులు అంటున్నారు.

ఈ వ్రతం ఫలితాలు

ఈ పవిత్ర రోజున భక్తిశ్రద్ధలతో శివారాధన చేస్తే—
• ఐశ్వర్యం, సుఖసంతోషాలు
• పాపక్షయం
• అడ్డంకుల నివారణ
• ఆధ్యాత్మిక శాంతి
• మోక్షప్రాప్తి సులభతరం అవుతుందని
పురాణాలు వెల్లడిస్తున్నాయి.

కార్తీక చివరి సోమవారం వ్రతం ఆచరించే వారికి శివ–కేశవుల సంపూర్ణ అనుగ్రహం లభిస్తుందని పండితులు చెబుతున్నారు.

Read hindi news: hindi.vaartha.com

Epaper : epaper.vaartha.com/