Crime News: వివాహేతర సంబంధం కోసం భార్యకి విషం ఇచ్చిన..

అమెరికా దంతవైద్యుడి విషాద గాథ: జీవిత ఖైదు

Crime News: అమెరికాలోని కొలరాడోకు చెందిన దంతవైద్యుడు జేమ్స్ క్రెయిగ్ తన భార్య ఏంజెలా క్రెయిగ్ హత్య కేసులో జీవిత ఖైదును అనుభవిస్తున్నాడు. తన సహోద్యోగితో వివాహేతర సంబంధం పెట్టుకున్న జేమ్స్, తన భార్యకు విడాకులు ఇస్తే డబ్బు, ఆస్తి కోల్పోతానని భయపడ్డాడు. దీంతో ఎవరికీ అనుమానం రాకుండా తన చదువును ఉపయోగించి భార్యను హత్య చేయాలని పథకం పన్నాడు. ఈ కేసులో విచారణ జరిపిన న్యాయస్థానం అతనికి పెరోల్ లేకుండా జీవిత ఖైదు విధించింది.

విషం ఇచ్చి హత్య

Crime News: జేమ్స్ తన భార్య ఏంజెలాకు ప్రోటీన్ షేక్‌లో మొదట ఆర్సెనిక్ విషం కలిపి ఇచ్చాడు. దీంతో ఆమె అనారోగ్యంతో ఆసుపత్రిలో చేరింది. అక్కడ కూడా జేమ్స్ ఆమెను వదలలేదు. చివరి ప్రయత్నంగా ఆమెకు ప్రాణాంతకమైన సైనైడ్ ఇంజక్షన్ (Cyanide injection) ఇచ్చాడు. ఈ ఘటనతో ఏంజెలా బ్రెయిన్ డెడ్ అయ్యి, చివరికి మార్చి 2023లో మరణించింది.

టాక్సికాలజీ నివేదికలో సంచలన విషయాలు

పోస్ట్‌మార్టంలో భాగంగా జరిపిన టాక్సికాలజీ నివేదికలో ఏంజెలా (Angela) శరీరంలో సైనైడ్‌తో పాటు టెట్రాహైడ్రోజోలిన్ అనే రసాయనం ఉన్నట్లు గుర్తించారు. ఈ రసాయనం సాధారణంగా కంటి చుక్కలలో కనిపిస్తుంది. జేమ్స్ తన భార్యకు విడాకులిస్తే ఆస్తి పోతుందని, తన పేరు ప్రఖ్యాతలు దెబ్బతింటాయని భావించి ఈ ఘోరానికి పాల్పడినట్లు ప్రాసిక్యూటర్లు కోర్టుకు తెలిపారు.

కోర్టులో జరిగిన వాదోపవాదాలు

జేమ్స్ క్రెయిగ్ తరపు న్యాయవాదులు ఏంజెలా మరణం ఆత్మహత్యగా చిత్రీకరించడానికి ప్రయత్నించారు. అయితే జ్యూరీ ఈ వాదనను తిరస్కరించింది. ఈ కేసు విచారణలో జేమ్స్ కు జీవిత ఖైదుతో పాటు అదనంగా 33 సంవత్సరాలు శిక్ష విధించినట్లు అరపాహో కౌంటీ జిల్లా న్యాయమూర్తి షే విటేకర్ ప్రకటించారు. హత్య వెనుక జేమ్స్ ఆలోచించిన పద్ధతి విని న్యాయస్థానం కూడా ఆశ్చర్యపోయింది.