Tamil Actor: సినీనటుడు “పవర్స్టార్” ఎస్. శ్రీనివాసన్ను ఢిల్లీ పోలీసులు భారీ మోసం కేసులో అరెస్టు చేశారు. ఒక కంపెనీకి రూ. 1000 కోట్ల రుణం ఇప్పిస్తానని హామీ ఇచ్చి, రూ. 5 కోట్లు అడ్వాన్స్గా తీసుకుని మోసం చేసినట్లు ఆయనపై ఆరోపణలు ఉన్నాయి.
మోసం కేసు వివరాలు
Tamil Actor: 2010లో బ్లూ కోస్ట్ ఇన్ఫ్రాస్ట్రక్చర్ డెవలప్మెంట్ లిమిటెడ్ (Blue Coast Infrastructure Development Limited) అనే సంస్థకు రూ. 1000 కోట్ల రుణం ఇప్పిస్తానని శ్రీనివాసన్ ఒప్పందం కుదుర్చుకున్నాడు. ఈ డీల్కు ప్రతిఫలంగా, ఆయన ఆ సంస్థ నుండి రూ. 5 కోట్లు ముందస్తుగా అందుకున్నాడు. నెల రోజుల్లో రుణం మంజూరు కాకపోతే డబ్బు తిరిగి చెల్లిస్తానని హామీ ఇచ్చాడు. అయితే, నిర్ణీత గడువు దాటినా రుణం అందకపోవడంతో, తాము మోసపోయామని గ్రహించిన సంస్థ యాజమాన్యం పోలీసులను ఆశ్రయించింది.
పోలీసుల దర్యాప్తులో, రూ. 5 కోట్లు నేరుగా శ్రీనివాసన్, అతని భార్య బ్యాంకు ఖాతాలకు బదిలీ అయినట్లు తేలింది. ఈ డబ్బును ఆయన తన వ్యక్తిగత అవసరాలతో పాటు సినిమా నిర్మాణాలకు ఉపయోగించినట్లు సమాచారం. ఈ కేసులో దర్యాప్తునకు సహకరించకుండా, విచారణకు హాజరుకాకుండా శ్రీనివాసన్ 2018 నుండి తప్పించుకు తిరుగుతున్నాడని పోలీసులు తెలిపారు. దీంతో న్యాయస్థానం అతడిని నేరస్థుడి (Proclaimed Offender) గా ప్రకటించింది.
అరెస్ట్, గత రికార్డు
తాజా సమాచారం ప్రకారం, శ్రీనివాసన్ (Srinivasan) చెన్నైలో ఉన్నట్లు తెలియడంతో ఢిల్లీ పోలీసులు అతడిని అదుపులోకి తీసుకుని తదుపరి విచారణ నిమిత్తం ఢిల్లీకి తరలించారు. శ్రీనివాసన్పై ఇలాంటి ఆరోపణలు రావడం ఇదే మొదటిసారి కాదు. గతంలో 2013లో కూడా ఇలాంటి మోసం కేసులోనే ఆయన అరెస్టయ్యారు. అప్పుడు రూ. 10 కోట్లు తిరిగి చెల్లిస్తానని హామీ ఇచ్చి బెయిల్పై విడుదలయ్యారు, కానీ కేవలం రూ. 3.5 లక్షలు మాత్రమే చెల్లించి పరారయ్యారని పోలీసులు వెల్లడించారు.
శ్రీనివాసన్పై మోసం ఆరోపణలు ఏంటీ?
రూ.1000 కోట్ల రుణం ఇప్పిస్తానని చెప్పి, ఒక కంపెనీ నుంచి రూ.5 కోట్లు అడ్వాన్స్గా తీసుకుని మోసం చేసినట్లు ఆరోపణలు ఉన్నాయి.
శ్రీనివాసన్ను ఎక్కడ అరెస్ట్ చేశారు, ఆయనపై గతంలో కూడా కేసులు ఉన్నాయా?
శ్రీనివాసన్ను చెన్నైలో అరెస్ట్ చేసిన ఢిల్లీ పోలీసులు, గతంలో కూడా 2013లో ఆయన మోసం కేసులో అరెస్టయ్యారు.
Read hindi news: hindi.vaartha.com
Read Also: Kingdom Review: ‘కింగ్డమ్’ ట్విట్టర్ రివ్యూ!
