మంచు విష్ణు ‘కన్నప్ప’ (Kannappa Team)చిత్ర బృందం హెచ్చరికలు: సినీ విమర్శకులు, రివ్యూయర్లు, మీమర్స్ జాగ్రత్త!
మంచు విష్ణు ఎంతో ప్రతిష్టాత్మకంగా భావించి, తన డ్రీమ్ ప్రాజెక్ట్గా నిర్మించిన ‘కన్నప్ప’ సినిమా రేపు, జూన్ 27న ప్రపంచవ్యాప్తంగా ఘనంగా విడుదల కానుంది. ఈ సందర్భంగా చిత్ర బృందం (Kannappa Team) ఒక కీలకమైన హెచ్చరికను జారీ చేసింది. సినీ విమర్శకులు, రివ్యూయర్లు, మరియు సోషల్ మీడియా మీమర్స్ తమ సినిమాపై ఉద్దేశపూర్వకంగా తప్పుడు ప్రచారం, వ్యక్తిగత దూషణలకు పాల్పడితే చట్టపరమైన చర్యలు తీసుకుంటామని స్పష్టం చేసింది. తమ హక్కులను కాపాడుకోవడానికి ఢిల్లీ హైకోర్టు నుంచి ముందస్తు అనుమతి పొందినట్లు ‘కన్నప్ప’ చిత్ర యూనిట్ వెల్లడించింది. ఈ చర్య సినిమా విడుదలకు ముందు టాలీవుడ్లో ఒక సంచలనం సృష్టించింది.
కన్నప్ప సినిమాపై చిత్ర బృందం తీసుకున్న జాగ్రత్తలు:
‘కన్నప్ప’ చిత్రం విడుదలకు ముందు నిర్మాతలు ఎన్నో జాగ్రత్తలు తీసుకున్నారు. ఇది ఒక చారిత్రక నేపథ్యం ఉన్న కథ కావడంతో, శ్రీకాళహస్తి క్షేత్ర పురాణం తెలిసిన వారి నుంచి, ఆలయ పూజారుల నుంచి వ్రాతపూర్వక అనుమతులు తీసుకున్నట్లు తెలిపారు. అంతేకాకుండా, సినిమాకు సెన్సార్ బోర్డు (Sensor board) నుంచి ‘యు/ఎ’ సర్టిఫికెట్ లభించింది. గ్రాఫిక్స్ నాణ్యత విషయంలో ఎక్కడా రాజీ పడకుండా, ప్రేక్షకులకు అత్యుత్తమ దృశ్యమానాన్ని అందించాలనే ఉద్దేశంతో విడుదల తేదీని కూడా మార్చి, అత్యుత్తమ అవుట్పుట్ కోసం శ్రమించినట్లు పేర్కొన్నారు. విష్ణు ఈ సినిమా కోసం పడిన కష్టం, ఆయన అంకితభావం ప్రతి అడుగులోనూ కనిపిస్తుంది.
దుష్ప్రచారంపై కన్నెర్ర: కోర్టుకు వెళ్ళిన కన్నప్ప టీమ్:
నిర్మాతలు ఇంత కష్టపడినా, తమ కుటుంబంపై కొందరికి ఉన్న వ్యక్తిగత కక్షల కారణంగా సినిమాను లక్ష్యంగా చేసుకుని దుష్ప్రచారం చేసే అవకాశం ఉందని ‘కన్నప్ప’ చిత్ర బృందం ముందుగానే పసిగట్టింది. అందుకే, ఈ విషయంలో వారు న్యాయస్థానాన్ని ఆశ్రయించారు. ఉద్దేశపూర్వకంగా సినిమా ప్రతిష్ఠను దెబ్బతీసేలా, లేదా వ్యక్తిగత దూషణలకు పాల్పడితే తీవ్రమైన చర్యలు తప్పవని, ఈ విషయమై తాము తీసుకునే చర్యలకు వారే బాధ్యత వహించాల్సి ఉంటుందని స్పష్టం చేస్తూ సోషల్ మీడియాలో ఒక పబ్లిక్ కాషన్ నోటీస్ను (Public Caution Notice) కూడా విడుదల చేశారు. సినిమాను చూసి, వాస్తవాల ఆధారంగా తమ అభిప్రాయాలను పంచుకోవాలని, అంతేగానీ వ్యక్తిగత ద్వేషంతో, పరువు నష్టం కలిగించేలా వ్యవహరిస్తే న్యాయపరమైన మార్గాలను అనుసరిస్తామని చిత్ర బృందం తేల్చి చెప్పింది. గతంలో కేరళలో ఒక నిర్మాత ఇలాంటి చర్యలు తీసుకున్న ఉదంతాన్ని కూడా ఈ సందర్భంగా గుర్తుచేశారు. సినిమాపై దుష్ప్రచారం చేసేవారిని నిలువరించేందుకే ఈ ముందస్తు జాగ్రత్తలు తీసుకుంటున్నట్లు ‘కన్నప్ప’ టీమ్ స్పష్టం చేసింది. ఈ పరిణామం తెలుగు సినీ పరిశ్రమలో కొత్త చర్చకు దారి తీస్తోంది.
Read also: Kannappa: ‘కన్నప్ప’ ప్రివ్యూ చూసిన బాలీవుడ్ ప్రముఖులు
