Dokka Seethamma : తెరపైకి డొక్కా సీతమ్మ కథ చిత్రం తెలుగు సినిమా ప్రేక్షకులను ఆకట్టుకునే విభిన్నమైన కథాంశాలతో చిత్రాలు వస్తున్న తరుణంలో, ఇప్పుడు ఓ స్ఫూర్తిదాయకమైన మహనీయురాలి జీవిత చరిత్ర ఆధారంగా ‘ఆంధ్రుల అన్నపూర్ణ డొక్కా సీతమ్మ’ అనే చిత్రం రూపొందుతోంది.ఈ సినిమా మురళీ మోహన్, ఆమని ప్రధాన పాత్రల్లో, టి.వి.రవి నారాయణ్ దర్శకత్వంలో తెరకెక్కుతోంది.ఉషారాణి మూవీస్ బ్యానర్పై వల్లూరి రాంబాబు ఈ చిత్రాన్ని నిర్మిస్తున్నారు.తాజాగా చిత్ర బృందం సినిమా టైటిల్ పోస్టర్ను విడుదల చేసింది, దీంతో ప్రేక్షకుల్లో ఆసక్తి పెరిగింది.దర్శకుడు టి.వి.రవి నారాయణన్ మాట్లాడుతూ, “నేను చిరంజీవి గారి అభిమానిగా 2012లో ఇండస్ట్రీలోకి అడుగుపెట్టాను. పవన్ కళ్యాణ్ గారి మాటలు నన్ను డొక్కా సీతమ్మ గారి జీవితాన్ని సినిమాలో చూపించాలని ప్రేరేపించాయి.డొక్కా సీతమ్మ పేరు తెలుగువారికి మరింత చేరువ కావాలనే ఉద్దేశంతో ఈ చిత్రాన్ని తీసేందుకు సిద్ధమయ్యాను.ఈ సినిమా కోసం డబ్బు సంపాదించాలన్న ఉద్దేశం లేదు. దీని ద్వారా వచ్చే ప్రతి రూపాయిని డిప్యూటీ సీఎం పవన్ కళ్యాణ్ గారు, ముఖ్యమంత్రి నారా చంద్రబాబు నాయుడు గారికి విరాళంగా ఇవ్వాలని మా టీమ్ నిర్ణయించుకుంది.
డొక్కా సీతమ్మ గారి పేరిట ఉన్న పథకాలకు ఆ మొత్తాన్ని అందించాలనుకుంటున్నాం” అని అన్నారు.సినిమా కథ విషయంలో దర్శకుడు ఎంతో శ్రద్ధ తీసుకున్నారని, ఎన్నో పరిశోధనలు చేసి, ఆమని గారిని ప్రధాన పాత్ర కోసం ఎంచుకున్నారని తెలిపారు. “ఆమని గారు అద్భుతమైన నటి. ఆమె ఈ పాత్రకు సంపూర్ణ న్యాయం చేశారు. అలాగే మురళీ మోహన్ గారి సహకారం అమోఘం. ఈ చిత్రం ద్వారా ఆమని గారికి జాతీయ అవార్డు రావాలని మనసారా కోరుకుంటున్నాను” అని దర్శకుడు తెలిపారు.మురళీ మోహన్ మాట్లాడుతూ, “ఈ సినిమా ఓ మహనీయురాలి జీవితాన్ని తెరపై ఆవిష్కరించబోతుంది. అన్నదానం కంటే గొప్ప దానం మరొకటి లేదు. వచ్చిన ప్రతి వ్యక్తిని ఆప్యాయంగా ఆహ్వానించి, కడుపు నిండా భోజనం పెట్టి పంపించే గొప్ప మనసున్న మహనీయురాలు డొక్కా సీతమ్మ గారు.ఈ తరం వారికి ఆమె జీవితం గురించి తెలియాల్సిందే. రవి గారు ఎంతో పరిశోధన చేసి, ఈ కథను తెరకెక్కిస్తున్నారు.
ఆమని గారు ఈ పాత్రను చేయడం చాలా సంతోషంగా ఉంది.ఆమెకు జాతీయ స్థాయిలో గుర్తింపు రావాలని ఆశిస్తున్నాను.దర్శక నిర్మాతలకు నా హృదయపూర్వక ధన్యవాదాలు” అని తెలిపారు.ఆమని మాట్లాడుతూ, “డొక్కా సీతమ్మ గారి కథ నాకు తెలియదు.దర్శకుడు ఈ ప్రాజెక్ట్ గురించి చెప్పిన వెంటనే గూగుల్లో ఆమె గురించి శోధించాను.ఆమె జీవిత విశేషాలు చదివాక నిజంగా అలాంటి పాత్రను చేయడం నా అదృష్టంగా భావించాను. మురళీ మోహన్ గారితో స్క్రీన్ షేర్ చేసుకోవడం గొప్ప అనుభూతి.అంతేకాదు సుచిత్ర మాస్టర్ గారితో మళ్లీ పని చేసే అవకాశం రావడం సంతోషంగా ఉంది.మంచి ఉద్దేశంతో తెరకెక్కుతున్న ఈ సినిమా అందరికీ నచ్చుతుందనే నమ్మకం ఉంది” అని తెలిపారు.ఈ చిత్రానికి సంగీతం చంద్రబోస్ అందిస్తుండగా, ఆర్ట్ డైరెక్టర్ రవన్న అద్భుతమైన సెట్స్ రూపొందిస్తున్నారు.ఈ చిత్ర ట్రైలర్ను త్వరలోనే విడుదల చేయనున్నట్లు చిత్రబృందం ప్రకటించింది. డొక్కా సీతమ్మ గారి జీవితం ఆధారంగా వస్తున్న ఈ చిత్రం తెలుగు ప్రేక్షకుల మనసులను దోచుకోవడం ఖాయం.
