ప్రముఖ నటుడు, హిందూపురం శాసనసభ్యుడు నందమూరి బాలకృష్ణ (Nandamuri Balakrishna) తన సినీ ప్రయాణంలో ఒక గొప్ప మైలురాయిని అందుకున్నారు. ఆయన వరల్డ్ బుక్ ఆఫ్ రికార్డ్స్ (World Book of Records) (గోల్డ్ ఎడిషన్)లో స్థానం సంపాదించారు. భారత సినిమా పరిశ్రమ నుంచి ఈ గౌరవానికి ఎంపికైన తొలి నటుడిగా చరిత్ర సృష్టించారు. దాదాపు 50 ఏళ్లుగా సినిమా రంగానికి అందిస్తున్న సేవలకు గుర్తింపుగా ఈ పురస్కారం దక్కింది.హైదరాబాద్లో జరిగిన ఘనమైన కార్యక్రమంలో బాలకృష్ణ ఈ ప్రతిష్ఠాత్మక అవార్డును స్వీకరించారు. ఈ వేడుకకు కేంద్ర సహాయ మంత్రి బండి సంజయ్, ఆంధ్రప్రదేశ్ ఐటీ మరియు మానవ వనరుల శాఖ మంత్రి నారా లోకేశ్ ముఖ్య అతిథులుగా హాజరయ్యారు. వారి చేతుల మీదుగా బాలకృష్ణ ఈ గౌరవాన్ని అందుకున్నారు.
నారా లోకేశ్ ప్రశంసల వర్షం
ఈ సందర్భంగా మంత్రి నారా లోకేశ్ బాలకృష్ణపై హృదయపూర్వకంగా ప్రశంసలు కురిపించారు.ఒక చరిత్ర రాయాలన్నా, దాన్ని తిరిగి రాయాలన్నా అది ఒక్క బాలయ్య బాబుతోనే సాధ్యం. ఆయన అందరికీ బాలయ్య అయితే, నాకు మాత్రం ముద్దుల మావయ్య అని అన్నారు.అలాగే, గత 50 ఏళ్లుగా సినిమా, రాజకీయ రంగాలలో ఆయన తనకంటూ ప్రత్యేక గుర్తింపు తెచ్చుకున్నారని లోకేశ్ కొనియాడారు.బాలకృష్ణ ఎప్పుడూ యంగ్, ఎనర్జిటిక్గా ఉంటారని లోకేశ్ గుర్తుచేశారు. ఆయన తన సినీ కెరీర్లో చారిత్రక, జానపద, ఆధ్యాత్మికం, సైన్స్ ఫిక్షన్ వంటి విభిన్న జానర్లలో నటించి ప్రేక్షకులను మెప్పించారని అన్నారు.
బాలయ్య బాబుది భోళాశంకరుడి మనస్తత్వం, అందుకే సినీ పరిశ్రమ ఆయన్ను అంతగా అభిమానిస్తుంది అని లోకేశ్ వ్యాఖ్యానించారు.
మానవత్వానికి ప్రతీక
బసవతారకం ఆసుపత్రి ఆయనలోని మానవత్వానికి నిదర్శనం అని లోకేశ్ అన్నారు. బాలకృష్ణ కేవలం నటుడిగానే కాకుండా, సామాజిక సేవలోనూ తన కృషి చూపుతున్నారని ఆయన చెప్పారు.సినిమాలతో పాటు బాలకృష్ణ డిజిటల్ ప్లాట్ఫార్మ్లో కూడా తన ప్రతిభను చాటుకున్నారు. ఆయన హోస్ట్ చేసిన ఓటీటీ షో ‘అన్స్టాపబుల్’ అద్భుత విజయాన్ని సాధించి కొత్త రికార్డులు సృష్టించింది.
తెలుగు జాతికి గర్వకారణం
లోకేశ్ మాట్లాడుతూ, బాలయ్య బాబుకు దక్కిన ఈ పురస్కారం కేవలం ఆయనకే కాకుండా మొత్తం తెలుగు జాతికి గర్వకారణం అని అన్నారు.బాలకృష్ణ సాధించిన ఈ అరుదైన గౌరవం ఆయన అభినయం, సేవ, మానవత్వంకి ప్రతీక. అర్థశతాబ్దం పాటు ప్రేక్షకులను అలరించిన ఆయన ప్రయాణం ఇలాగే మరిన్ని మైలురాళ్లను చేరుకోవాలని అభిమానులు కోరుకుంటున్నారు.
Read Also :
