మన భోజన సంస్కృతిలో ప్రతి ఆహార పదార్థానికి ప్రత్యేక స్థానం ఉంటుంది. రుచిలో, శక్తిలో సమతుల్యతను కలిగి ఉండే మన వంటకాలలో ఆరోగ్యాన్ని ప్రభావితం చేసే కొన్ని అపరిచితమైన కలయికలు ఉండే అవకాశముంటుంది. అలాంటి వాటిలో వంకాయ మరియు పాలు కలయిక ఒకటి. వంకాయతో చేసే వంటకాలు ఎంతగా ప్రజాదరణ పొందినా, ఆయుర్వేదం ప్రకారం వంకాయను పాలతో కలిపి తీసుకోవడం మంచిది కాదని చెబుతోంది.
వంకాయ అనేది నైట్షేడ్ కుటుంబానికి చెందిన శాకహారం. గుత్తి వంకాయ కూర, వంకాయ బజ్జీలు, వంకాయ పచ్చడి లాంటి ఎన్నో రుచికరమైన వంటకాల్లో ప్రధాన పాత్ర పోషిస్తుంది. ఫైబర్, విటమిన్లు, ఖనిజాలు ఉన్న వంకాయ శరీరానికి ఆరోగ్యదాయకమే కానీ, ఇది ఒక వేడి స్వభావ గల ఆహారం. పాలు అనేవి పిల్లల నుండి పెద్దల దాకా ఆరోగ్యానికి అనేక విధాలుగా మేలు చేస్తాయి. కాల్షియం, ప్రోటీన్లు, విటమిన్ D, B12 లాంటి పోషకాల బంగారు బుట్ట. కానీ పాలు స్వభావంగా చల్లని గుణం కలిగి ఉంటాయి.
వంకాయ, పాలు కలయిక వల్ల వచ్చే ఆరోగ్య సమస్యలు:
1. అజీర్తి:
ఈ కలయిక అత్యంత సాధారణంగా అజీర్తి సమస్యలకు దారి తీస్తుంది. కడుపు ఉబ్బరం, గ్యాస్, తేన్పులు, అసౌకర్యం అనుభవించవచ్చు. వంకాయ వేడి చేసే గుణం కలిగి ఉండగా, పాలు చల్లదనం కలిగి ఉండటం వలన శరీరంలో వ్యతిరేక ప్రభావాలు చూపించవచ్చు.
2. చర్మ సమస్యలు:
విరుద్ధాహారం కారణంగా ఏర్పడిన ఆమం చర్మంపై ప్రతికూల ప్రభావాన్ని చూపిస్తుంది. దురద, మొటిమలు, ఎగ్జిమా వంటి చర్మవ్యాధులు రావచ్చు.
3. అలెర్జీలు:
వంకాయ లేదా పాల పట్ల అలెర్జీ ఉన్నవారు ఉంటారు. ఈ రెండు కలిపి తీసుకుంటే అలెర్జీ తీవ్రత పెరిగే ప్రమాదం ఉంటుంది. ఉదాహరణకు: లాక్టోస్ ఇంటాలరెన్స్ ఉన్నవారు పాల తాగితే జీర్ణ సమస్యలు ఎదుర్కొంటారు.
4. జీర్ణశక్తి మందగించడం:
తరచూ ఇలాంటి విరుద్ధాహారాల వినియోగం జీర్ణశక్తి నెమ్మదించడమే కాకుండా పోషకాలు శరీరంలో సరైన పద్ధతిలో శోషించబడకుండా చేస్తుంది.
5. శ్వాసకోశ సమస్యలు:
కొన్ని సంప్రదాయ వాదనల ప్రకారం వంకాయ–పాలు కలయిక వల్ల జలుబు, దగ్గు వంటి శ్వాసకోశ సమస్యలు రావచ్చని చెబుతారు.
జాగ్రత్తలు –
వంకాయ తిన్న వెంటనే పాలు తాగవద్దు. పాలతో చేసిన స్వీట్లు వంకాయ కూర తినాక వెంటనే తినవద్దు, ఈ రెండు ఆహారాల మధ్య కనీసం 2-3 గంటల గ్యాప్ ఉండాలి. చర్మ సమస్యలు, అలెర్జీలు ఉన్నవారు పూర్తిగా ఈ కలయికను నివారించాలి. పెరుగు/మజ్జిగ వంటి పులియబెట్టిన పాల పదార్థాలు కొంత వరకూ సర్దుబాటు కావచ్చు, కానీ మితంగా తీసుకోవాలి. జీర్ణవ్యవస్థ బలహీనంగా ఉన్న వారు కచ్చితంగా దూరంగా ఉండాలి. వంకాయ, పాలు రెండూ తమ తమ స్థాయిలో శ్రేష్ఠమైన ఆహార పదార్థాలే. కానీ వాటి కలయిక విషయంలో ఆయుర్వేదం చెప్పే మార్గదర్శకాలను గమనించి, అప్రమత్తంగా ఉండాలి. అలాంటి చిన్న జాగ్రత్తలే మన ఆరోగ్యానికి పెద్ద రక్షణ కవచంలా పనిచేస్తాయి.
