ఆంధ్రప్రదేశ్(AP)లో పట్టణాభివృద్ధి కార్యక్రమాలకు కేంద్రం నుంచి భారీగా నిధులు (Huge funding from the centre) విడుదలయ్యాయి. రాష్ట్రంలోని 40 ప్రాజెక్టులకు కేంద్ర పట్టణాభివృద్ధి శాఖ రూ.1,067 కోట్లు మంజూరు చేసినట్లు టీడీపీ పార్లమెంటరీ పార్టీ నాయకుడు లావు శ్రీకృష్ణదేవరాయలు వెల్లడించారు. ఈ నిధులు రాష్ట్రంలో కార్పొరేషన్ ప్రాంతాల్లో అభివృద్ధి పనులకు ఉపయోగపడనున్నాయి.
అర్బన్ ఇన్ఫ్రాస్ట్రక్చర్ డెవలప్మెంట్ ఫండ్ ద్వారా నిధులు
అర్బన్ ఇన్ఫ్రాస్ట్రక్చర్ డెవలప్మెంట్ ఫండ్ కింద ఈ నిధులు విడుదలయ్యాయని ఆయన తెలిపారు. మొదటగా ప్రాథమికంగా రూ.422 కోట్లు మాత్రమే కేటాయించగా, టీడీపీ పార్లమెంటరీ నేతల ప్రత్యేక స్పందనతో కేంద్రాన్ని మరోసారి సంప్రదించగా ఆ మొత్తాన్ని రూ.1,067 కోట్లకు పెంచినట్లు తెలిపారు.
కార్పొరేషన్ ప్రాంతాల్లో అభివృద్ధి వేగవంతం
ఈ నిధులతో రోడ్లు, డ్రైనేజీలు, తాగునీటి సరఫరా, పార్కులు వంటి మౌలిక సదుపాయాల అభివృద్ధికి రాష్ట్రంలోని నగర, పట్టణ ప్రాంతాల్లో వేగంగా పనులు ప్రారంభించనున్నారు. కేంద్రం సహకారం వల్ల రాష్ట్రంలో పట్టణాభివృద్ధి మరింత దూసుకెళ్లే అవకాశముందని టీడీపీ నేతలు విశ్వాసం వ్యక్తం చేశారు.
