H1B VISA : అమెరికా అధ్యక్షుడు డొనాల్డ్ ట్రంప్ మళ్లీ ఒకసారి హెచ్-1బీ (H-1B) వీసా విధానంపై కఠిన నిర్ణయం తీసుకున్నారు. ఆయన నిర్ణయం (H1B VISA) ప్రకారం ఇకపై అమెరికాలో పనిచేయడానికి ప్రతి హెచ్-1బీ వీసాపై ఏటా లక్ష డాలర్ల రుసుము (భారత కరెన్సీలో సుమారు రూ.88 లక్షలు) విధించబడనుంది. ఈ కొత్త నిబంధన త్వరలో అమల్లోకి రానుందని ట్రంప్ ప్రకటించారు.
ఈ నిర్ణయానికి మద్దతుగా అమెరికా కామర్స్ సెక్రటరీ హోవార్డ్ లుట్నిక్ వివాదాస్పద వ్యాఖ్యలు చేశారు. అమెరికన్ ఐటీ ఉద్యోగాలు కేవలం అమెరికన్లకే ఇవ్వాలని, పనికిరాని వ్యక్తులను దేశంలోకి రానీయకూడదని, కేవలం అత్యుత్తమ ప్రతిభ కలిగిన వారిని మాత్రమే అనుమతించాలని వ్యాఖ్యానించారు. అలాగే శిక్షణ ఇవ్వాలంటే, అమెరికా టాప్ యూనివర్సిటీల్లో చదివిన వారినే ఎంచుకోవాలని తెలిపారు. ఈ వ్యాఖ్యలు సోషల్ మీడియాలో పెద్ద దుమారం రేపుతున్నాయి. ముఖ్యంగా భారతీయులను టార్గెట్ చేసినట్లు నెటిజన్లు తీవ్రంగా విమర్శిస్తున్నారు.
ప్రస్తుతం హెచ్-1బీ వీసాదారులలో భారతీయులు 71% మంది ఉండగా, చైనీయులు 11.7% వాటా కలిగి ఉన్నారు. ఈ వీసాలు సాధారణంగా మూడు నుంచి ఆరు సంవత్సరాల వరకు మంజూరు అవుతాయి. తెలుగు రాష్ట్రాల నుంచి మాత్రమే దాదాపు 28 లక్షల మంది హెచ్-1బీ వీసా ద్వారా అమెరికాలో ఉన్నారని సమాచారం.
ఇప్పటికే వీసాలు పొందడంలో లాటరీ విధానం అమల్లో ఉంది. మొదట దరఖాస్తు సమయంలో సాధారణ ఫీజులు చెల్లించాలి, లాటరీలో ఎంపికైన తర్వాత అదనపు ఛార్జీలు ఉంటాయి. ఎక్కువగా ఈ ఖర్చులను కంపెనీలే భరిస్తాయి. కానీ ఇప్పుడు ట్రంప్ ప్రకటించిన లక్ష డాలర్ల కొత్త రుసుము కంపెనీలకు భారీ ఆర్థిక భారం కానుంది.
అమెరికా ప్రభుత్వం ప్రతి ఏడాది సుమారు 85 వేల హెచ్-1బీ వీసాలను జారీ చేస్తోంది. కొత్త రుసుము విధానం ప్రారంభమైన తర్వాత, భారతీయులు సహా ఇతర దేశాల నిపుణులు అమెరికాలో ఉద్యోగాలు పొందడంలో తీవ్ర ఇబ్బందులు పడవచ్చని నిపుణులు చెబుతున్నారు.
ప్రస్తుతం అమెజాన్, మైక్రోసాఫ్ట్, మెటా వంటి పెద్ద కంపెనీలు వేలాది భారతీయులను హెచ్-1బీ వీసాల ద్వారా ఉద్యోగాలలో నియమించుకుంటున్నాయి. ఇకపై వీసా రిన్యువల్ సమయంలోనే కోట్ల రూపాయలు ఖర్చు కావాల్సి వస్తుంది. ఇప్పటికే గ్రీన్ కార్డ్ కోసం సంవత్సరాలుగా ఎదురుచూస్తున్న భారతీయులకు ఈ కొత్త నియమం అమెరికా కలను మరింత దూరం చేసేదిగా మారనుంది.
Read also :
