అమెరికా అధ్యక్షుడు డొనాల్డ్ ట్రంప్ మరోసారి చైనాపై ఆర్థిక ఒత్తిడి పెంచే దిశగా కీలక వ్యాఖ్యలు చేశారు. ప్రస్తుతం చైనా నుంచి అమెరికాకు వస్తున్న దిగుమతులపై ఉన్న 55% సుంకాలను 155%కు పెంచే అవకాశం ఉందని ఆయన స్పష్టంగా హెచ్చరించారు. “సుంకాల రూపంలో చైనా నుంచి మన దేశానికి అపారమైన ఆదాయం వస్తోంది. కానీ, వారు సరైన వాణిజ్య ఒప్పందం కుదుర్చుకోకపోతే నవంబర్ 1 నుంచి భారీ సుంకాలు విధిస్తాం” అని ట్రంప్ తెలిపారు. ఈ వ్యాఖ్యలు ప్రపంచ మార్కెట్లలో ఆందోళన రేపాయి.
Latest News: Aravind: ఓలా ఉద్యోగి ఆత్మహత్య
ట్రంప్ ఈ వ్యాఖ్యలను ఆస్ట్రేలియా ప్రధాని ఆంథోని ఆల్బనీస్తో ద్వైపాక్షిక చర్చలకు ముందు మీడియాతో మాట్లాడుతున్న సమయంలో చేశారు. ఆయన మాట్లాడుతూ, “మేము చైనాతో వాణిజ్యం కొనసాగించాలనుకుంటున్నాం, కానీ అది అమెరికా ప్రయోజనాలకు అనుకూలంగా ఉండాలి. చైనా తరచూ ఒప్పంద నిబంధనలను ఉల్లంఘిస్తోంది, దానికి ఇక మేము మౌనం వహించం” అని అన్నారు. చైనా తమ ఎగుమతుల ద్వారా అమెరికా మార్కెట్ను ప్రభావితం చేస్తోందని, అమెరికా పరిశ్రమల భద్రత కోసం కఠిన చర్యలు తప్పవని ఆయన స్పష్టం చేశారు.
అదే సమయంలో ట్రంప్ చైనా అధ్యక్షుడు షీ జిన్పింగ్తో వచ్చే వారంలో దక్షిణ కొరియాలో సమావేశం జరగనున్నట్లు తెలిపారు. ఆ సమావేశంలో వాణిజ్య ఒప్పందం, సుంకాల వ్యవహారం, ఆసియా పసిఫిక్ ప్రాంత భద్రతా అంశాలు చర్చకు రావచ్చని ఆయన వెల్లడించారు. అయితే అమెరికా సుంకాల పెంపు నిర్ణయం అమల్లోకి వస్తే ప్రపంచ ఆర్థిక వ్యవస్థపై పెద్ద ప్రభావం చూపే అవకాశం ఉందని ఆర్థిక నిపుణులు హెచ్చరిస్తున్నారు. చైనా నుంచి అమెరికాకు వచ్చే ఎలక్ట్రానిక్స్, స్టీల్, టెక్స్టైల్, ఆటోమొబైల్ ఉత్పత్తుల ధరలు భారీగా పెరగవచ్చని విశ్లేషకులు అంచనా వేస్తున్నారు.
Read hindi news: https://hindi.vaartha.com
Epaper : https://epaper.vaartha.com/
